ލޯބިވެރިޔާއަށް ބިރުދައްކައި ބްލެކްމެއިލް ކުރި ފުލުހަކު ހައްޔަރުކޮށްފި

ލޯބިވެރިޔާއަށް ބިރުދައްކައި ބްލެކްމެއިލް ކުރި ފުލުހަކު ހައްޔަރުކޮށްފިއެވެ.

ފުލުހުން ބުނީ މި މައްސަލައގައި ހައްޔަރުކޮށްފައިވަނީ އއ.މަތިވެރި ޕޮލިސް ސްޓޭޝަންގައި މަސައްކަތްކުރާ، މަތިވެރި/ފަޒާ، ޒައިދާން މުހައްމަދު (19އ) ކަމަށެވެ.

ރެކްރުޓް ފުލުހެއްގެ މަގާމުގައި ހުރި އޭނާގެ މައްޗަށް ކޮށްފައިވަނީ ލޯބިވެރިޔާއަށް ބިރުދައްކައި، އޭނާގެ އޮރިޔާން މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މީޑިއާގައި ލީކް ކޮށްލާނެ ކަމަށް ބުނެ ބިރު ދައްކައި، އިންޒާރުދީ، ބްލެކްމެއިލް ކުރިކަމުގެ ތުހުމަތެވެ.

އެއާއިއެކު، މި މަހުގެ 13 ވަނަ ދުވަހު ކޯޓު އަމުރެއްގެ ދަށުން ޒައިދާން ހައްޔަރުކުރިއިރު، މި މައްސަލައާއި ގުޅިގެން އޭނާގެ ބަންދާއި މެދު ގޮތެއް ނިންމުމަށް މަތިވެރި މެޖިސްޓްރޭޓް ކޯޓަށް މިއަދު ހާޒިރުކުރުމުން 3 ދުވަހަށް ބަންދުކުރުމަށް އަމުރުކޮށްފައިވާކަމަށް ފުލުހުން ބުނެއެވެ.

ފުލުހުން ބުނީ، މި މައްސަލަ ތަހުގީގުކުރަމުން އަންނަ ކަމަށެވެ.