އެމްޑީޕީ ވެރިކަމަށް އައި އިރުވެސް ޤައުމުގެ މާލީ ހާލަތު އޮތީ ރަނގަޅަކަށް ނޫން: ރައީސް ޞާލިހު

އެމްޑީޕީ ވެރިކަމަށް އައި އިރުވެސް ޤައުމުގެ މާލީ ހާލަތު އޮތީ ރަނގަޅަށް ނޫން ކަމަށާ، އެ ސަރުކާރުން މަޝްރޫއުތައް ފެއްޓީ އެކި ގޮތް ގޮތުން ހޯދި ފައިސާއިން ކަމަށް، އެމްޑީޕީގެ އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރޭ އައްޑޫގައި ބޭއްވި މިސްރާބު ހަމަ މަގަށް ޖަގަހަ ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، އަދުގެ ސަރުކާރުން ފައިސާ ނެތް ކަމަށް ބުނެ، 17،00 އެއްހާ ޕްރޮޖެކްޓް ހުއްޓާލަާފައިވާ ކަމަށެވެ.

އަދި ފައިސާ ނެތީގެން ކަމަށް ބުނެ ޕްރޮޖެކްޓްތައް ހުއްޓާލާފައިވާއިރު، އެކަން އެހެންވެފައިވަނީ، ރައީސުލްޖުމްހޫރިއްޔާއަށް ކަންކަން މެނޭޖްކުރައްވަން އެނގުވަޑައިނުގަންނަވާތީ ކަމަށް ޞާލިހު ވިދާޅުވިއެވެ. އަދި އެމަބިކުފާނުގެ ވެރިކަމާއި ހަވާލުވެވަޑައިގެންނެވިއިރުވެސް ރާއްޖޭގެ މާލީ ހާލަތު ރަނގަޅު ނޫން ކަމަށް ރައީސް ޞާލިހު ވުދާޅުވިއެވެ.

އަޅުގަނޑުމެން ވެރިކަމަށް އައި އިރުވެސް ރާއްޖޭގެ މާލީ ހާލަތު އޮތީ ރަނގަޅަކަށް ނޫން. އަޅުގަނޑުމެންގެ ސަރުކާރުގެ ފުރަތަމަ ތިން މަސް ދުވަހުގެ ތެރޭގައި، ބަޖެޓަށް އެބޭނުންވާ ފައިސާ ނުލިބުނު ނަމަ، ހަމަ ދަތި ހާލަތަކަށް ދިޔައީސް

އެމްޑީޕީގެ އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު

ރައީސް ސާލިހު ވިދާޅުވި ގޮތުގައި، އެ ހާލަތުން އަރައިގަތުމަށް އެ ސަރުކާރުން އެންމެ ފުރަތަމަ ވެސް ކުރި ކަމަކީ ބޭނުންވާ ފައިސާ ހޯދުން ކަމަށެވެ.

އެގޮތުން، ވެރިކަމުގެ ފުރަތަމަ ތިން މަސް ދުވަހުގެ ތެރޭގައި ބަޖެޓަށް ބޭނުންވާ ގްރާންޓްގެ ގޮތުގައި 200 މިލިއަން ޑޮލަރު ހޯދުނު ކަމަށް އެމަނިކުފާނު ވިދާޅުވިއެވެ. ކޮންޑިޝަނަލް ފައިނޭންސްގެ ގޮތުގައި 800 މިލިއަން ޑޮލަރު އަޅުގަނޑުމެން ހޯދިން.

އެމްޑީޕީގެ އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު

ޞާލިހު ވިދާޅުގައި އެ ސަރުކާރުން ފެށި ޕްރޮޖެކްޓްތައް ހިނގަމުންދަނީ އޭރު އެ ހޯދި ފައިސާއިން ކަމަށެވެ. އަދި އޭރު ޑޮލަރުގެ ދަތިކަން އޮތުމުން، ބޭނުން އިރެއްގައި ބޭނުން ކުރެވޭ ގޮތަށް 400 މިލިއަން ޑޮލަރުވެސް ހޯދައި ތައްޔާރު ކުރި ކަމަށާ، އެ ސަރުކާރުން ޕްރޮޖެކްޓްތައް ފަށައިގަތީ އެ ހޯދި ފައިސާއިން ކަމަށް އެމަނިކުފާނު ވިދާޅުވިއެވެ.

ރައީސް ޞާލިހު އިތުރަށް ވިދާޅުވީ، މި ސަރުކާރުން މިއަދުވެސް އަންނަނީ ރައްޔޮތުންނަށް އޮޅުވާލައިގެން ރައްޔޮތުންގެ މަޖިލީހުގެ މެޖޯރުޓީ ހޯދަން ކަމަށާ އެއީ ބިރުހުރި ކަމެއް ކަމަށެވެ. އެގޮތުން، މި ސަރުކާރުން ސިޔާސީ ޕާޓީ ތަކާއި، ނޫސްވެރިންނަށާއި، ޚިޔާލުފާޅު ކުރުމުގެ މިނިވަންކަމަށްވެސް ހުރަސް އަަޅަމުންދާ ކަމަށާ، އެއީ ބިރުވެރިކަމެއް ކަމަށް އެމަނިކުފާނު ވިދާޅުވިއެވެ.

އެހެންކަމުން، ރައްޔޮތުންގެ މަޖިލީހުގެ މެޖޯރިޓީ އެމްޑީޕިއަށް ދޭންޖެހޭ ކަމަށް ވެސް ޞާލިހު ވިދާޅުވިއެވެ.