2 މިލިއަން ޑޮލަރު ހުރި އެސްޑީއެފްއަށް މި ސަރުކާރުން 3 މަސްތެރޭ 30 މިލިއަން ޑޮލަރު ޖަމާކޮށްފި: ސަޢީދު

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާއި ހަވާލުވެވަޑައިގެންނެވި އިރު ސޮވެރިން ޑިވެލޮޕްމަންޓް ފަންޑު، އެސްޑީއެފް ގައި ހުރީ 2 މިލިއަން އެމެރިކާ ޑޮލަރާއި، 2.4 މިލިއަން ރުފިޔާ ކަމަށާ، އެހެންނަމަވެސް މި ސަރުކާރުން 3 މަސްތެރޭ، 30 މިލިއަން އެމެރިކާ ޑޮލަރު އެ ފަންޑަށް ޖަމާކޮށްފައިވާ ކަމަށް އިކޮނޮމިކް މިނސްޓަރ ސަޢީދު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު އުތުރުގެ ރަށްތަކަށް ކުރައްވަމުންދާ ދަތުރުފުޅުގެ ތެރެއިން، ހއ. ކެލާ ރައްޔިތުންނާއި އެމަނިކުފާނު ބައްދަލުކުރެއްވުމަށް ބޭއްވުނު ޖަލްސާގައި ވާހަކަދައްކަވަމުން މިނިސްޓަރ ސަޢީދު ވިދާޅުވީ, ދައުލަތުން ނަގާ ލޯނުތައް އަނބުރާ ދެއްކުމަށް، ފައިސާ ރައްކާ ކުރުމަށް އުފައްދާފައިވާ ސޮވެރިން ޑިވެލޮޕްމަންޓް ފަންޑުގައި, މިދިޔަ އަހަރުގެ ނޮވެންބަރ 17 ގައި ރައީސް މުޢިއްޒު ވެރިކަމާއި ހަވާލުވެވަޑައިގަތްއިރު ބާކީ ހުރީ 2 މިލިއަން އެމެރިކާ ޑޮލަރާއި 2.4 މިލިއަން ރުފިޔާކަަމަށެވެ.

ރައީސް މުޢިއްޒު ވެރިކަމާއި ހަވާލުވެވަޑައިގެންނެވި އިރު، 17 ނޮވެމްބަރު ގައި، ސޮވެރިން ޑިވެލޮޕްމަންޓް ފަންޑުގައި، އެސްޑީއެފްގައި ބާކީ ހުރީ، 2 މިލިއަން އެމެރިކާ ޑޮލަރާއި 2.4 މިލިއަން ރުފިޔާއާ. ސޮވެރިން ޑިވެލޮޕްމަންޓް ފަންޑަކީ ރާއްޖެއިން ނަގާ ލޯން އަނބުރާ ދެއްކުމަށް ގާއިމްވެފައި ހުރި ފަންޑެއް. އެ ފަންޑުގައި ހުރި، ހުރިހާ ފައިސާއެއް، މާރުކޮށް ކޮށް ކޮށް ގޮސް، އެއްކޮށް ހުސްކޮށްލާފައި އޮތީ. ބާކީ 2.4 މިލިއަން ރުފިޔާ އާއި 2 މިލިއަން ޑޮލަރު ހުރީ. ރައީސް މުޢިއްޒު ވެރިކަމާއި ހަވާލުވެވަޑައިގެން، އެންމެ ތިން މަސް ދުވަހުގެ ތެރޭގައި، 30 މިލިއަން އެމެރިކާ ޑޮލަރު އެހެރީ ސޮވެރިން ޑިވެލޮޕްމަންޓް ފަންޑަށް ޖަމާކޮށްފައި.

އިކޮނަމިކް މިނިސްޓަރު މުހައްމަދު ސަޢީދު

ސަޢީދު އިތުރަށް ވިދާޅުވީ، ރައީސް މުޢިއްޒު ވެރިކަމަށް ވަޑައިގެން، ފައިސާ ޗާޕުކުރުން ހުއްޓާލައްވާފައިވާ ކަމަށާ، އެމާނިކުފާނުގެ މިސަރުކާރުން ގެންގުޅުއްވާ އިގްތިސާދީ ޕޮލިސީތަކަކީ ދުނިޔެ ޤަބޫލުކުރާ ޕޮލިސީތަކެއް ކަމަށެވެ.

އަދި ޒިންމާދާރު އިގްތިސާދީ ރިފޯމްތަކާއެކު މިޤައުމުގެ އިގްތިސާދު ދެން ދާނީ ކުރިއަށް ކަމުގައިވެސް މިނިސްޓަރ ވިދާޅުވިއެވެ.

މީގެ އިތުރުން، ރައީސް ޑރ. މުޢިއްޒުގެ ސަރުުކާރުން, ރާއްޖެއިން ބޭރުގެ މާލީ އިދާރާތަކުގެ އިތުބާރު ހޯއްދަވާފައިވާކަމަށާއި ރަށް ރަށުގައި ރިސޯޓް ތަރައްޤީކުރުމަށް ޕްރައިވެޓް އިންވެސްޓްމަންޓްތައް ހޯދުމަށް މަސައްކަތްކުރާނެކަމަށްވެސް މިނިސްޓަރ ވިދާޅުވިއެވެ.