ބަންޑާރަ ގޯތި ދޫކުރުން ހުއްޓުވަދޭން ޤާނޫނަށް ބަދަލު ގެނެސްދިނުމަކަށް ނޭދެން: މުއްޠަލިބު

ބަންޑާރަ ގޯތި ދޫކުރަން ހުއްޓުވަދޭން ޤާނޫނަށް ބަދަލު ގެނެސްދިނުމަށް މިއަދު މަޖިލީހުގެ ޖަލްސާގައި އެދިލައްވާފައި ނުވާނެ ކަމަށް ގެދޮރުވެރިކަމާ ޢިމާރާތް ކުރުމާ ބެހޭ ވަޒީރު ޑރ. ޢަބްދުالله މުއްޠަލިބު ވިދާޅުވެއްޖެއެވެ.

ވަޒީރު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި، ތުލުސްދޫ ދާއިރާގެ ޕީއެންސީ މެމްބަރު އިބްރާހިމް ނަސީމް ކުރެއްވި ސުވާލަކަށް ޖަވާބުދެއްވަމުންނެވެ.

އެގޮތުން، މެންބަރު ނަސީމް ވަނީ، ބަންޑާރަ ގޯތި ހިލޭ ބެހުމަކީ ރާއްޖެ ފިޔަވައި ދުނިޔޭގެ އެއްވެސް ތާކު ކުރާ ކަމެެއް ނޫން ކަމަށާ، އޭގެ ސަބަބުން ބޯހިޔާވަހިކަމަށް ދާއިމީ ހައްލެއް ނުލިބޭކަން ފާހަގަކުރައްވައި އޭގެ ބަދަލުގައި، ދިގު މުއްދަތުން ފައިސާ ދޫކުރާ ގޮތަށް ހައުސިން ޔުނިޓުތަކުން ފްލެޓު ދޭ ގޮތަށް އޫސޫލު ބަދަލުކުރަންޖެހޭ ކަމަށް ވިދާޅުވެފައެވެ. އަދި އެފަދަ ވިސްނުމެއް ސަރުކާރުގެ އޮތްތޯ ސުވާލުކުރެއްވިއެވެ.

މުއްތަލިބު ވިދާޅުވީ ބަންޑާރަ ގޯތި ދޫކުރުމަކީ ރާއްޖޭގެ އާދަކާދަ އާއި ތާރީހާ ގުޅިފައިވާ ރާއްޖެއަށް ހާއްސަ ސިފައެއް ކަމަށެވެ.

"އެހެންވީމާ މިފަދަ ކަލްޗަރަލީ ވެސް ހިސްޓޮރިކަލީ ވެސް ރާއްޖެއަށް މުހިންމު ކަމެއްގެ ގޮތުގައި ފާހަގަކުރެވިފައި އޮތް ކަމެއް ބަދަލު ކުރުމަކީ އެ ސިޔާސަތު ބަދަލު ކުރުމަކީ އަޅުގަނޑަށް އެކަނި ލިބިގެންވާ ބާރެއް ނޫން. އެހެންވީމާ ބަންޑާރަ ގޯތި (މައްސަލަ) ތިބޭފުޅުން ގާނޫނެއް ގެނެސްގެން މަޖިލީހުން އެކަމަށް ހައްލެއް ހޯދައި ދިނުމަކީ އަޅުގަނޑު އެދޭ ކަމެއް. އެހެންނަމަވެސް ކުރިއަށްދާއިރުގައި ދާއިމީ ގޮތެއްގައި ކުރިއަށް ދިއުމަކީ ދަތިކަމަކަށް ވެދާނެ. އެހެންވީމާ އެކަމަށް ހައްލެއް ހޯދުމަށް މަޖިލިސް ތެރެއިން، ގާނޫނެއްގެ ތެރެއިން އެ ހައްލު ހޯދައިދިނުމަކީ ވަރަށް މުހިންމު ކަމެއް ކަމަށް އަޅުގަނޑު ދެކެން،"

ވަޒީރު އަބްދުالله މުއްޠަލިބު

އެވާހަކައާއި ގުޅިގެން އޮންލައިން ނޫހެއްގައިވަނީ، ބަންޑާރަ ގޯތި ދޫކުރުން ހުއްޓުވުމަށް ގާނޫނަށް ބަދަލު ގެނެސްދޭން ވަޒީރު އެދިވަޑައިގެންނެވި ކަމަށް ބުނެ ރިޕޯޓްކޮށްފައެވެ.

އެ ޚަބަރާއި ގުޅިގެން ވަޒީރު އެކްސްގައި ކުރެއްވި ޕޯސްޓެއްގައިވަނީ އެކަން ދޮގުކުރައްވާފައެވެ.

”ބަންޑާރަ ގޯތި ދޫކުރަން ހުއްޓުވަދޭން ޤާނޫނަށް ބަދަލު ގެނެސްދިނުމަށް އަޅުގަނޑު މިއަދު މަޖިލީހުގައި އެދިފައިނުވާނެއެވެ. ކުރެވުނު ސުވާލަކާ ގުޅިގެން އަޅުގަނޑު ދެންނެވީ އެކަމަކީ ރާއްޖެއަށް ޚާއްޞަ ކަމެއް ކަމަށާއި ދާއިމީ ގޮތެއްގައި ކުރިއަށް ގެންދިއުމަށް ދަތިވެދާނެ ކަމެއްކަމަށެވެ. އަދި އެއީ މަޖިލިސް ތެރެއިން ޙައްލެއް ހޯދަންޖެހޭ ފަދަ މައްސަލައެއްކަމަށެވެ.“ ވަޒީރު ވިދާޅުވިއެވެ.