މައުރަޒުން އެއްވަނަ އައްޑޫއަށް، ރަށު ފެންވަރުގެ ބައިން ގއ. ވިލިނގިއްޔަށް

ދިވެހީންގެ އުފެއްދުންތެރިކަމުގެ މައުރަޒު 2025ގެ އެއްވަނަ އައްޑޫ ސިޓީ ހޯދައިފި އެވެ.

ދިވެހީންގެ އުފެއްދުންތެރިކަމުގެ މައުރަޒުގެ އިނާމު ދިނުމުގެ ރަސްމިއްޔާތު މިރޭ ވަނީ ބާއްވާފަ އެވެ. މިރޭގެ ރަސްމިއްޔާތު ގައި ވަނީ މައުރަޒުން އެންމެ ފާހަގަކޮށްލެވޭ ވަނަަތައް ހޮވާފަ އެވެ.

މިރޭގެ ރަސްމިއްޔާތުގައި ރައީސުލްޖުމްހޫރިއްޔާ ވަނީ އެކި ދާއިރާތަކުން 1 ވަނަ ހާސިލުކުރި ފަރާތްތަކަށާއި، މުޅި މައުރަޒުން އެންމެ މަތިން މާކްސް ހޯދި 5 ފަރާތަށް ރަން ވަނަ ހަވާލުކޮށްދެއްވާފަ އެވެ.

މުޅި މައުރަޒުން އެއް ވަނަ ސިޓީ/ރަށަކަށް ހޮވުނީ އައްޑޫ ސިޓީ ހިތަދޫ އެވެ. ސިޓީ ފެންވަރުގައި ތަކެތި ބައިވެރިކުރުމުގެ ދާއިރާއިން އެއް ވަނަ ލިބުނީ އައްޑޫ ސިޓީ ކައުންސިލްގެ އިދާރާ އަށެވެ. ރަށު ފެންވަރުގައި ތަކެތި ބައިވެރިކުރުމުގެ ދާއިރާއިން އެއް ވަނަ، ހުވަދު އަތޮޅު އުތުރުބުރީ ވިލިނގިލި ކައުންސިލްގެ އިދާރާ އަށެވެ.

ވިޔަފާރިތަކުގެ ދާއިރާއިން އެއް ވަނަ، ސިޑީސް ކިޗަން ޕްރައިވެޓް ލިމިޓެޑަށް ލިބިފައިވާއިރު ތައުލީމުދޭ މަޒުކަޒުތަކުގެ ދާއިރާއިން އެއް ވަނަ ލިބުނީ މޯލްޑިވްސް ޕޮލިޓެކްނިކަށެވެ. އަދި ހާއްސަ އެހީއަށް ބޭނުންވާ ފަރާތްތަކުގެ ދާއިރާއިން އެއް ވަނަ، ތ. ވިލުފުށި, ރެޑިއަމްގެ ފާތުމަތު ޝަފަޤް ހޯދިއިރު ޖަމުއިއްޔާ ޖަމާއަތްތަކުގެ ދާއިރާއިން އެއް ވަނަ، ވިމެން އޮންޓަރޕްރަނިއަރސް އެސޯސިއޭޝަން މޯލްޑިވްސް އަދި ސަރުކާރު ހިއްސާވާ ކުންދުނިތަކުގެ ދާއިރާއިން އެއް ވަނަ، ސްޓޭޓް އިލެކްޓްރިކް ކޮމްޕެނީ ޕްރައިވެޓް ލިމިޓެޑް ވަނީ ހޯދާފަ އެވެ.

އަމިއްލަ ފަރުދުންގެ ބައިން އެއް ވަނަ ހޯދީ ހ. ހުޅުދުއްފާރު އާގެ، ލުޖައިން އަލީ ވަހީދެވެ.

މުޅި މައުރަޒުން އެންމެ މަތިން މާކްސް ހޯދި 5 ފަރާތް

* ލުޖައިން ޢަލީ ވަޙީދު، ހ. ހުޅުދުއްފާރު އާގެ، މާލެ

* އަބުޑީ މޯލްޑިވްސް

* މޯލްޑިވްސް ޕޮލިޓެކްނިކް

* މުޙައްމަދު މޫސާ، ގަރާޑީގެ، ރ. އިނގުރައިދޫ

* އަލީ މާހިރު

މިރޭގެ ރަސްމިއްޔާތުގައި ޖުމްލަކޮށް 275 ވަނައެއް ހޮވާފައިވެ އެވެ.

ދިވެހީންގެ އުފެއްދުންތެރިކަމުގެ މައުރަޒުގައި ޖުމްލަ 383 ފަރާތަކުން ބައިވެރިވެފައިވެއެވެ. އެއީ 14 ކެޓެގަރީއަކުންނާއި 82 ސަބް ގިންތިއަކުންނެވެ. މިގޮތުން އެންމެ ގިނައިން ބައިވެރިވެފައިވަނީ އަތްތެރި މަސައްކަތުގެ ދާއިރާއިންނެވެ. މި މައުރަޒުގައި ހދ އަތޮޅުން ފެށިގެން ލ އަތޮޅާއި ހަމައަށް ގިނަ ރަށްތަކަކުން ބައިވެރިވެފައިވެއެވެ.

މައުރަޒުގައި އެންމެ ގިނަ ތަކެތި ބައިވެރިކޮށްފައިވަނީ މާލެ އާއި ބ.ތުޅާދޫ އިންނެވެ. މައުރަޒުގައި 3600އަށް ވުރެ ގިނަ ތަކެތި ބައިވެރި ކުރުމަށް އެޕްލިކޭޝަން ފޯމް ފުރާފައިވެ އެވެ.