މިރޭ ހުޅުމާލޭގައި ހަވާ އަރުވަނީ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކޮށްގެން ބާއްވާ "މޯލްޑިވްސް ފައިނޭންޝަލް އެކްސްޕޯ" އާ ގުޅިގެން މިރޭ ހުޅުމާލޭގައި ހަވާ އެރުވުމަށް ނިންމައިފިއެވެ.

އެމްއެންޑީއެފް އިން މަޢުލޫމާތު ދޭގޮތުގައި، ހަވާ އެރުވުން އޮންނާނީ މިރޭ 22:00 ހާއިރު ހުޅުމާލޭގެ އިރުމަތީ ފަރާތުގައެވެ. މި ހަރަކާތް ގާތްގަނޑަކަށް 3 މިނެޓުގެ ވަގުތަކަށް ކުރިއަށްދާނެ ކަމަށް އެ އިދާރާއިން ބުނެއެވެ.

މި އެކްސްޕޯއަކީ ޖުލައި މަހުގެ 2 އިން 4 އަށް ހުޅުމާލޭ ސެންޓްރަލް ޕާކުގައި ކުރިއަށްދާ އިވެންޓެކެވެ. މިއީ ނުވަ އަހަރުގެ މެދުކެނޑުމަކަށްފަހު، ރާއްޖޭގެ މާލީ ދާއިރާގައި މަސައްކަތްކުރާ މުހިއްމު ހުރިހާ ފަރާތްތަކެއް އެއްތަނަކުން ބައްދަލުވެ، މަޢުލޫމާތު ބަދަލުކުރުމަށް ހުޅުވާލެވުނު ފުރުޞަތެކެވެ.

"އެމްޕަވަރިންގ ސަސްޓެއިނަބަލް ފިއުޗަރސް: އިންކްލޫޝަން، އިނޮވޭޝަން އެންޑް އިންޓެލިޖެންސް" މި ޝިޢާރުގެ ދަށުން ބާއްވާ މި އެކްސްޕޯގައި ރާއްޖޭގެ ކޮމާޝަލް ބޭންކުތަކާއި، އިންޝުއަރެންސް ކުންފުނިތަކާއި، ފައިނޭންސް ދާއިރާގެ އެކި ޚިދުމަތްދޭ ފަރާތްތަކުގެ އިތުރުން ސަރުކާރުގެ ކަމާބެހޭ މުހިއްމު އިދާރާތަކުން ބައިވެރިވެއެވެ.

މި އެކްސްޕޯގެ މައިގަނޑު މަޤްޞަދަކީ އާންމުންނަށް ރާއްޖޭގެ މާލީ ނިޒާމުގައި ހިމެނޭ މުއައްސަސާތަކާ ސީދާ ގުޅި، އެ ފަރާތްތަކުންދޭ ޚިދުމަތްތަކާ ބެހޭ އެންމެ ފަހުގެ މަޢުލޫމާތު ފަސޭހަކަމާއެކު ފޯރުކޮށްދިނުމެވެ.