ސަރުކާރުގެ ހަރަދުގައި އިތުރު 6 ރަށެއްގައި މިސްކިތްތައް ބިނާކުރުމަށް ތައްޔާރުވެއްޖެ

ރާއްޖޭގެ އެކި ކަންކޮޅުތަކުގައި މިސްކިތްތައް ބިނާކުރުމަށް ސަރުކާރުން ގެންގުޅެމުންދާ ސިޔާސަތުގެ ދަށުން ސަރުކާރުގެ ހަރަދުގައި އިތުރު 6 ރަށެއްގައި މިސްކިތްތައް އެޅުމަށް ތައްޔާރުވެއްޖެއެވެ.

އިސްލާމިކް މިނިސްޓްރީން ބުނީ އއ. ރަސްދޫ، އދ. ފެންފުށި، ފ. ފީއަލި، ގދ. މަޑަވެލި، ހ.އ ބާރަށް، ތ. ވޭމަންޑޫގައި މިސްކިތްތައް އެޅުމަށް ތައްޔާރުވަމުންދާކަމަށެވެ. މިސްކިތްތަށް ޑިޒައިން ކުރެވިފައިވާނީ ކޮންމެ މިސްކިތެއްގައި ވެސް ޤުރުއާން ކިޔަވައިދެވޭ ގޮތަށް ކްލާސް ރޫމާއެކުގައެވެ. އިސްލާމިކް މިނިސްޓްރީން ބުނީ، މި މަޝްރޫޢުތަކަކީ ސަރުކާރުގެ ޚަރަދުގައި ކުރިއަށް ގެންދެވޭ މަޝްރޫޢުތަކެއް ކަމަށެވެ.

މަޝްރޫޢުތަކުގެ މަސައްކަތް ކުރިއަށްގެންދިއުމަށް ނިންމާފައިވަނީ ރޯދަމަސް ފަހުންނެވެ. މި މިސްކިތްތަށް ނިމޭއިރު، ސޯލާއާއި އޭސީ ވެސް ހަރުކުރެވި، ހުންނާނީ ނެވިލޯން ވެސް އަޅާ ނިމިފައިކަމަށް އިސްލާމިކް މިނިސްޓްރީން ބުނެއެވެ.

މި މިސްކިތްތައް ފަރުމާކޮށްފައިވަނީ މުޅިން ތަފާތު ގޮތަކަށެވެ. މިގޮތުން މިއީ ރާއްޖޭގެ ތާރީޚާއި ސަޤާފަތާއި މާޙައުލާއި ގުޅޭގޮތައް ޑިޒައިންކުރެވިފައިވާ މިސްކިތްތަކެއް ކަމަށްވެސް އިސްލާމިކް މިނިސްޓްރީން ބުނެއެވެ. މި މިސްކިތްތަކުގެ ތެރޭގައި ހިމެނެނީ ތިން ސައިޒެއްގެ މިސްކިތެވެ. އެއީ 300، 500، އަދި 700 މީހުންނަށް ނަމާދުކުރެވޭނެ ޖާގަ ހިމެނޭ މިސްކިތްތަކެވެ.