އިންޑިއާއާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް ދެ ގައުމުގެ ފައިސާއިން ކުރުމަށް ހުއްދަދީފި

އިންޑިއާއާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތަކުގައި ދެ ޤައުމުގެ ފައިސާ ބޭނުންކުރުމުގެ ހުއްދަ އިންޑިއާގެ މަރުކަޒީ ބޭންކް، ރިޒާވް ބޭންކް އޮފް އިންޑިއާއިން ދީފިއެވެ.

ރިޒާވް ބޭންކް އޮފް އިންޑިއާއިން އިއްޔެ ނެރުނު ސަރކިއުލާއެއްގައި ބުނެފައިވާ ގޮތުގައި، އިންޑިޔާ އާއި ދިވެހިރާއްޖެއާ ދެމެދު ކުރެވޭ ވިޔަފާރި މުޢާމަލާތްތައް، އޭޝިއަން ކްލިއަރިންގ ޔޫނިއަން (އޭސީޔޫ) މެކޭނިޒަމްގެ އިތުރުން އިންޑިއަން ރުފިޔާ އަދި ދިވެހި ރުފިޔާއިން ވެސް ކުރެވޭނެ ގޮތް ހަމަޖެހިފައިވާ ކަމަށެވެ.

އޭސީޔޫ މެކޭނިޒަމަކީ ސަރަހައްދީ ޤައުމުތަކުގެ މަރުކަޒީ ބޭންކުތަކުގެ ތެރެއިން އޭސީޔޫގައި ބައިވެރިވާ ޤައުމުތަކުން މާލީ މުއާމަލާތްތައް ހިންގާ ނިޒާމެކެވެ.

މި ނިޒާމުގައި ބަންގްލަދޭޝް، ބެލަރޫސް، ބޫޓާން، އިންޑިޔާ، އީރާން، ދިވެހިރާއްޖެ، މިޔަންމާ، ނޭޕާލް، ޕާކިސްތާން އަދި ސްރީލަންކާގެ މަރުކަޒީ ބޭންކުތަކާއި ފައިސާގެ އިދާރާތައް ބައިވެރިވެއެވެ.

2024 ވަނަ އަހަރުގެ ނޮވެމްބަރު މަހު އާރްބީއައި އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާ ދެމެދު ސޮއިކުރެވުނު އެމްއޯޔޫގެ ދަށުން، ދެ ޤައުމުގެ ދެމެދުގައި ކުރެވޭ މުޢާމަލާތްތަކުގައި އިންޑިއަން ރުފިޔާ އަދި ދިވެހި ރުފިޔާ ބޭނުންކުރުމަށް ވަނީ އެއްބަސްވެފައެވެ.

އިންޑިއާގެ މަރުކަޒީ ބޭންކުން ބުނީ އެ ބޭންކުގެ ނިންމުމާ އެއްގޮތަށް ވަގުތުން އެއްބަސްވުމަށް އަމަލުކުރެވެން ފެށޭނެ ކަމަށެވެ.