ރައީސް މައުމޫންގެ ވެރިކަންވެސް ވެއްޓުނު؛ މި އައީ ރައީސް މުޢިއްޒު ވެރިކަމުން ބާލަން: ރައީސް ނަޝީދު

އެމަނިކުފާނު ނުކުންނަވައި ހުންނެވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަން ނިމުމަކަށް ގެންނަވަން ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ ”ބޮޑު ބަދަލު“ ގެ ކެމްޕެއިނަށް ލަންކާއަށް ވަޑައިގެން ލަންކާގައި އުޅޭ ދިވެހިންނާއެކު ބޭއްވި ބައްދަލުވުމުގަ އެވެ.

ނަޝީދު ވިދާޅުވީ، ރައީސް މުއިއްޒުގެ ސަރުކާރުން ލަންކާގައި ތިބި ދިވެހިންނަށް ބިރުދެއްކުމަށް މަސައްކަތް ކުރަމުންދާ ކަމަށާ އެއީ ކުރަން ރަނގަޅު ކަމެއް ނޫން ކަމަށެވެ.

”މިތަނުގައި ތިބި ދިވެހިންނަށް ބިރުދައްކައި އުނދަގޫ ކުރަން އުޅުމަކީ ރައީސް މުއިއްޒު ކުރައްވާ ވަރަށް ބޮޑު ޅައެއްޗެއް“ ނަޝީދު ވިދާޅުވުއެވެ.

މިތަނުގައި ދިވެހިންނާ މައްލަވަކޮށް އުނދަގޫކޮށް ބިރުދައްކާ ހައްދަވަންޏާ ދެން ވާގޮތް ރައީސް މައުމޫނަށް އެނގިވަޑައިގެންނެވި. ވެއްޓުނު. ވެރިކަމުން ފައިބާން ޖެހިވަޑައިގަތް. ރައީސް މުޢިއްޒަށްވެސް މިއަދު އެނގިވަޑައިގަންނަވަންވީ ހަގީގަތަކީ އެބޭފުޅާ ވެރިކަމުން އަޅުގަނޑުމެން ބާލާނެކަން. މިތަނަށް އައިސް މިހުރީ ރައީސް މުޢިއްޒު ވެރިކަމުން ބޭލުމަށް އަޅުގަނޑުމެން ތައްޔާރުވާން.

ރައީސް ނަޝީދު

ރައީސް ނަޝީދު އިތުރަށް ވިދާޅުވީ، 2008 ވަނަ އަހަރު އެކުލަވާލެވުނު ގާނޫނު އަސާސީއާއެކު ސަރުކާރަށާއި ރައްޔިތުންނަށްވެސް ބޮޑެތި ފައިދާތަކެއްވެ، ތަނަވަސްކަން އިތުރުވެގެންދިޔަ ކަމަށެވެ. ނަމަވެސް، ފާއިތުވި ދެމަސްދުވަހުގެ ތެރޭގައި، މަގުމައްޗަށް ނުކުމެވަޑައިގެން، ރައްޔިތުންނާ ވާހަކަދައްކަވައި، ކަންކަން އޮޅުންފިލުވުމުން އެނގިގެން ދިޔައީ، އޭރުން ފެށިގެން އެ ލިބެމުން އައި ތަނަވަސްކަން ކައްސާލުމުގެ ބިރު ހީވާން ފަށާފައިވާ ކަން ކަމަށްވެސް ވިދާޅުވިއެވެ.

”މިކަންކަމާ ފުންކޮށް ވިސްނައި ބޮޑު ބަދަލަކަށް ތައްޔާރުވާން ޖެހިއްޖެ.“ ނަޝީދު ވިދާޅުވިއެވެ.

ނަޝީދު ވިދާޅުވިގޮތިގައި، ޚިޔާލު ފާޅުކުރުމާއި އެއްވެ އުޅުމުގެ މިނިވަންކަމަކީ މަޖަލަކަށް ދީފައި އޮންނަ ޙައްގެއް ނޫން ކަމަށާ، އެކަންކަމަކީ ރައްޔިތުންގެ ތަނަވަސްކަމާ ގުޅިފައިވާ ކަންކަން ކަމަށެވެ. އެގޮތުން، ރައްޔިތުންނަށް ލިބޭ އެއްޗެއް އިތުރުވަނީ ފާޑުކިޔައި، ބަސް އިއްވައިގެން ކަމަށް އެމަނިކުފާނު ވިދާޅުވިއެވެ.