ފެނަކައިގެ އޮޑިޓް ކުރަންބެލިއިރު، ބޭނުންވާ ގިނަ ލިޔެކިޔުންތައް ފެންނަން ނެތް: އޮޑިޓަރ

ފެނަކަ ކޯޕަރޭޝަނުގެ އޮޑިޓް ރިޕޯޓް ތައްޔާރުކުރުމުގެ މަސައްކަތް ފެށިއިރު، އެކަމަށް ބޭނުންވާ ގިނަ އދަަދެއްގެ ލިޔެކިޔުންތައް ފެންނަން ނެތްކަމަށް އޮޑިޓަރ ޖެނެރަލް ހުސައިން ނިޔާޒީ ފާހަގަކުރައްވައިފިއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި އިއްޔެ ވާހަކަދައްކަވަމުން ނިޔާޒީ ވިދާޅުވީ އޮޑިޓް އޮފީހުން އެންމެފަހުން ނެރުނު ފެނަކައިގެ އޮޑިޓް ރިޕޯތް ތައްޔާރުކުރަން ބެލިއިރު، އެކަމަށް ބޭނުންވާ ގިނަ އަދަދެއްގެ ލިޔެކިޔުންތައް ފެންނަ ހިސާބުގައި ނެތްކަމަށެވެ. ސިސްޓަމްތަކަށް ނާލާ ގާތްގަނޑަކަށް 3 ބިލިއަން ރުފިޔާގެ ލިޔެކިޔުންތައް ހުރިކަމަށް ނިޔާޒީ ވިދާޅުވިއެވެ. ކޮމިޓީގައި ވާހަކަދައްކަވަމުން ނިޔާޒީ ވިދާޅުވީ ފެނަކަ އޮޑިޓްކުރުން ދިގުލައިގެންދިޔައީ ލިޔެކިޔުންތައް ފުރިހަމައަށް ބެލެހެއްޓިފައިނުވާތީކަމަށެވެ.

އޮޑިޓަރ ޖެނެރަލް ވިދާޅުވީ ކުންފުނިތަކުގައި ހިނގާ ކޮރަޕްޝަން ފަދަ ކަންކަމަކީ ނެރޭ އޮޑިޓް ރިޕޯތަކުން ފަރުޖައްސާލެވޭނެ ކަމެއް ނޫންކަމަށާއި، މިކަމުގައި ޒިންމާ ނަގަންޖެހޭ ވަރަށް މުހިންމު ފަރާތްތަކެއް ތިބިކަމަށެވެ. އެގޮތުން ކުންފުނީގެ މެނޭޖިންގ ޑިރެކްޓަރާއި އެސްއޯއީތަކުގެ ބަލަދުވެރިފަރާތް ޕީސީބީގެ ޒިންމާ ބޮޑުކަން އޮޑިޓަރ ޖެނެރަލް ފާހަގަކުރެއްވިއެވެ.

ނިޔާޒީ ވިދާޅުވީ އެސްއޯއީތަކަކީ ދައުލަތުގެ ބައިތުލްމާލުން ސަބްސިޑީ ދީގެން ހިންގާ ތަންތަންކަމަށްވީއިރު، ސަބްސިޑީ ދޫކުރުމުގައިވެސް ބަލަންޖެހޭ ކަންތައްތައް އެބަހުރިކަމަށެވެ. އެގޮތުން ފެނަކަ ފަދަ ކުންފުނިތަކަކީ މީގެ ކުރިންވެސް އޮޑިޓްތައް ކުރެވި، ކުންފުނިން އުސޫލުން ބޭރުން ގިނަ އަދަދެއްގެ ފައިސާ ގެއްލިފައިވާކަމަށެވެ. އެގޮތުން އެ ފައިސާ ހޯދުމަށް ކުރެވުނު މަސައްކަތްތައްވެސް ބަލައި އެކަންކަން މުރާޖައާ ކުރަންޖެހޭކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

އޮޑިޓަރ ޖެނެރަލް ނެރުއްވާފައިވާ ފެނަކައިގެ މި އޮޑިޓް ރިޕޯޓަށް ބަލާއިރު، އެންމެ ފާހަގަކުރެވިގެން ގޮސްފައިވަނީ 2021 ވަނަަ އަހަރުން 2023 ވަނަ އަހަރުގެ ނިޔަލަށް ވާދަވެރި ބީލަމުގެ އުސޫލުން ބޭރުން 1.3 ބިލިއަން ރުފިޔާގެ އެއްބަސްވުން ފެނަކަ ކޯޕަރޭޝަނުން ހަދާފައިވާ މައްސަލައެވެ. ފެނަކަ ހިންގުމަށް ސަބްސިޑީ ދެމުން އަންނައިރު، އޮޑިޓް ރިޕޯޓްގައި ބުނެފައިވަނީ، 2021 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް ސަރުކާރުން ފެނަކައަށް 4.03 ބިލިއަން ރުފިޔާގެ އެހީދީފައިވާކަމަށެވެ.

އޮޑިޓާ ގުޅިގެން އިސްލާހީ ފިޔަވަޅުތައް އެޅުމަށް ފެނަކައިން މަސައްކަތް ފަށާފައިވާކަމަށް އެކުންފުނިން ވަނީ ބުނެފައެވެ.