މިއީ ހަމައެކަނި އެމްޑީޕީގެ ސަރުކާރެއް ނޫން: އަލްހާން

މި ސަރުކާރަކީ ހަމައެކަނި އެމްޑީޕީގެ ސަރުކާރެއް ނޫންކަމަށް ރައްޔިތުންގެ މަޖިލީހުގެ އިންތިޚާބުގައި ޖޭޕީގެ ޓިކެޓްގައި ހެންވޭރު އުތުރު ދާއިރާއަށް ވާދަކުރައްވާ އަލްހާން ފަހުމީ ވިދާޅުވެއްޖެއެވެ.

އަލްހާން މިހެން ވިދާޅުވީ އެބޭފުޅާގެ ކެމްޕެއިން އިފްތިތާހުކުރުމަށް މިރޭ އޮތް ރަސްމިއްޔާތުގައި ވާހަކަފުޅު ދައްކަވަމުންނެވެ.

އަލްހާން ވިދާޅުވީ މިއީ ހަމައެކަނި އެމްޑީޕީގެ ސަރުކާރެއް ނޫން ކަމަށާއި މި ސަރުކާރަކީ ރައްޔިތުންގެ ސަރުކާރެއް ކަމަށެވެ. އެގޮތުން މި ސަރުކާރު ގެނައުމުގައި އަލްހާން ނިސްބަތްވެވަޑައިގެންނަވާ ޖުމްހޫރީ ޕާޓީގެ ހިއްސާވެސް އެބައޮތްކަމަށް އަލްހާން ފާހަގަކުރެއްވިއެވެ.

މިރޭ ވާހަކަފުޅު ދައްކަވަމުން އަލްހާން ވަނީ ރައީސް ސޯލިހުގެ ފުރިހަމަ ތާއިދު އަލްހާނަށް އޮތްކަމަށް ހާމަކުރައްވާފައެވެ.

އެގޮތުން އަލްހާން ވިދާޅުވީ ރައްޔިތުންގެ މަޖިލީހަށް ކުރިމަތި ލާން ވެސް ރައީސް ސޯލިހާއި އެކު މަޝްވަރާ ކުރެއްވިކަމަށާއި ޖުމްހޫރީ ޕާޓީއަކީވެސް ސަރުކާރުގެ ކޯލިޝަންގެ ޕާޓީއަކަށްވުމުން ޖުމްހޫރީ ޕާޓީ ޓިކެޓް ހޯއްދަވައިގެން މަޖިލީހަށް ނުކުތުމަށް ލަފާދެއްވިކަމަށެވެ.

" އެހެންވީމަ އަޅުގަނޑު މިހުރީ އެގޮތަށް އައިސް"، އަލްހާން ވިދާޅުވިއެވެ.