ފިލިޕީންސްގެ އަސްކަރިއްޔާއަށް ފާރަލި ޗައިނާ މީހަކު ހައްޔަރުކޮށްފި
ލިޔުންތެރިޔާ
އަބްދުﷲ ހުސައިން
ފިލިޕީންސްގެ އަސްކަރިއްޔާއާއި ފުލުހުންގެ ކޭމްޕްތަކަށް ފާރަލަމުންދިޔަ ޗައިނާގެ ސޮފްޓްވެއަރ އިންޖިނިއަރަކު ހައްޔަރުކޮށްފިކަމަށް އެގައުމުން ހާމަކޮށްފިއެވެ.
ޗައިނާގެ ސޮފްޓްވެއަރ އިންޖިނިއަރާއި އޭނާގެ ޑްރިވަރުންގެ ގޮތުގައި މަސައްކަތްކުރި ފިލިޕީންސްގެ ދެމީހަކު ޖާސޫސުކުރުމުގެ ތުހުމަތުގައި ހައްޔަރުކޮށްފައި ވަނީ މިދިޔަ ހަފްތާގައެވެ. ފިލިޕީންސްގެ އަސްކަރީ އަދި ސަލާމަތީ މައުލޫމާތު ހޯދައި ޖާސޫސުކުރާ މީހުން ހޯދުމުގެ މަސައްކަތް އެގައުމުގެ ނޭޝަނަލް ބިއުރޯ އޮފް އިންވެސްޓިގޭޝަނުން ވަނީ ދާދިފަހުން ފަށާފައެވެ. މިމަސައްކަތް ފަށާފައި މިވަނީ މިލްކުވެރިކަމާމެދު ޚިޔާލުތަފާތުވެފައިވާ ކަނޑުގެ ސަރަހައްދުގެ މައްސަލައިގައި ފިލިޕީންސްއާއި ޗައިނާގެ ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ.
ފިލިޕީންސްގެ އޮފިޝަލުން ތުހުމަތުކުރާ ގޮތުގައި ހައްޔަރުކުރި ޗައިނާ މީހާއަކީ ޗައިނާގެ އަސްކަރިއްޔާއިން ކޮންޓްރޯލްކުރާ ޔުނިވަރސިޓީއެއްގައި މަސައްކަތްކުރާ މީހެކެވެ. އަދި އޭނާ ފިލިޕީންސްއަށް އައުމުގެ މައިގަނޑު ބޭނުމަކީ ޖާސޫސުކުރުމެވެ. ފިލިޕީންސްއަށް އައިސް، އެގައުމުގެ މުހިއްމު ވިއުގަތައް އަޅާފައިވާ ތަންތަނަށް އެމީހާ ވަރަށް ގިނައިން ޒިޔާރަތް ކޮށްފައިވާކަމަށްވެއެވެ. ތަންތަނަށް ގޮސް، އެތަންތަނުން ޑޭޓާ އެއްކޮށް، އެޑޭޓާ ވަގުތުން ފިލިޕީންސްއިން ބޭރަށް ފޮނުވަމުން ދިޔަކަން އެނގޭކަމަށް ފިލިޕީންސްގެ ތަހުގީގީ އިދާރާގެ ވެރިޔާ ވިދާޅުވިއެވެ.
ފިލިޕީންސްގެ އަސްކަރިއްޔާގެ ވެރިޔާ ޖެނެރަލް ރޯމިއޯ ބްރޯނާ ވިދާޅުވީ ޗައިނާގެ މީހާ އެއްކުރި މައުލޫމާތަކީ އަސްކަރީ ޓާގެޓްތަކަށް އެތަންތަން ހެދުމަށް ޗައިނާގެ އަސްކަރިއްޔާއިން ހޯދި މައުލޫމާތުތަކަށް ވުން އެކަށީގެންވާ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
