ޓޮބްލެރޯން ޗޮކްލެޓްގެ ދެ ވައްތަރެއްގައި ޕްލާސްޓިކް ހިމެނޭތީ ވިއްކުން މަނާކޮށްފި

ޓޮބްލެރޯން ޗޮކްލެޓްގެ ދެ ވައްތަރެއްގައި ޕްލާސްޓިކް ހިމެނޭތީ އެ ދެ ބާވަތް ރާއްޖޭގައި ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފި އެވެ.

އެމްއެފްޑީއޭއިން މަނާކުރި އެކުންފުނިން އުފައްދާ ޗޮކްލެޓްގެ ދެ ބާވަތަކީ ޓޮބްލެރޯން މިލްކް އަދި ޓޮބްލެރޯން މިލްކް ހަނީ އެންޑް އަލްމަންޑް ނޫގަޓް އެވެ. މީގެ ތެރެއިން ތަޣައްޔަރުވެފައިވާ ޓޮބްލެރޯން މިލްކް އުފެއްދި ތާރީހަކީ 1 ސެޕްޓެމްބަރު 2023 ކަމަށްވާއިރު  ޓޮބްލެރޯން މިލްކް ހަނީ އެންޑް އަލްމަންޑް ނޫގަޓް ގެ މުއްދަތު ހަމަވަނީ 2 ޑިސެންބަރު 2023 ގައެވެ.

އެމްއެފްޑީއޭ އިން ނެރުނު ނޫސް ބަޔާނެއްގައި ބުނީ ޕްލާސްޓިކުން ތަޣައްޔަރުވެފައިވާ ސްވިޒަރލޭންޑް ގެ ޓޮބްލެރޯން ބްރޭންޑް ގެ މިލްކް ޗޮކްލެޓް ރާއްޖެއަށް އެތެރެވެފައިވާ ކަމުގެ މައުލޫމާތު ޔޫރަޕުގެ ރެޕިޑް އެލާޓް ސިސްޓަމް ފޯ ސޭފްޓީ އޮތޯރިޓީސް ނެޓްވޯކް (އާރުއޭއެސްއެފްއެފް) އާއި ދުނިޔޭގެ ސިއްހަތު ޖަމިއްޔާއިން އެ އޮތޯރިޓީއަށް އަންގާފައިވާ ކަމަށެވެ.

މިއީ އެ ކުންފުނީގެ ޗޮކްލެޓް އުފައްދާ މެޝިނަކަށް ދިމާވި މައްސަލައެއްގެ ސަބަބުން ކުރިމަތި ކަމެއް ކަމަށާއި، އެހެންކަމުން ތަޣައްޔަރު ވެފައިވާ މި އުފެއްދުމުގެ ސަބަބުން ކަރުގައި ޕްލާސްޓިކް ތާށިވުން ނުވަތަ ދަތަށް ގެއްލުމެއް ލިބުން ފަދަ ކަމެއް ކުރިމަތި ވެދާނެ ކަމުގެ ފުރުސަތު އޮތް ކަމަށް އެކުންފުނިން އަންގާފައިވާކަމަށް ވެސް އެމްއެފްޑީއޭ އިން ވަނީ ބުނެފައެވެ.

އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން އެމްއެފްޑީއޭ އިން ވަނީ މި ދެ ބްރޭންޑްގެ މިލްކް ޗޮކްލެޓް ރާއްޖެ އެތެރެކޮށް ނުވިއްކުމަށް އަންގާފައެވެ.