ދުނިޔޭގެ މަޝްހޫރު ހުރިހާ އީ ވޮލެޓެއް ރާއްޖެ ގެންނަން މަސައްކަތް ކުރާނަން: ސަޢީދު

ރައްޔިތުންގެ މަޖިލީހުގެ މެޖޯރިޓީ ލިބިއްޖެނަމަ، ދުނިޔޭގެ މަޝްހޫރު ހުރިހާ އީ ވޮލެޓެއް ރާއްޖެ ގެންނަން ބާރަށް މަސައްކަތް ކުރައްވާނެ ކަމަށް އިޤްތިސާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ސައީދު މިހެން ވިދާޅުވީ، ރައީސުލްޖުމްހޫރިއްޔާ އާއި ސަރުކާރުގެ އިސް ވަފުދެއް ހައްދުންމައްޗަށް މިއަދު ފެއްޓެވި ދަތުރުފުޅުގެ ތެރެއިން ލ. މާވަށަށް ވަޑައުގެން އެ ރަށު ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި، ވާހަކަ ދައްކަވަމުންނެވެ.

އެގޮތުން ސައީދު ވިދާޅުވީ، އިރާދަކުރެއްވިއްޔާ ދުނިޔޭގެ މަޝްހޫރު ހުރިހާ އީވޮލެޓެއް ރާއްޖެ ގެންނާނެކަމަށާ، އޭގެތެރޭގައި ކޮރެއާ، ޖަޕާން، ޗައިނާ، ޔޫއެސްއޭ، ސިންގަޕޯރ، މެލޭޝިއާ، އިންޑިއާ، ޔޫއޭއީ ފަދަ ޤައުމުތައްވެސް ހިމެނޭ ކަމަށެވެ.

އަޅުގަނޑުމެންނަށް މެޖޯރިޓީ ތި ބޭފުޅުން ދެއްވާ. އަޅުގަނޑުމެންނަށް ދޫކޮށްލައްވާ ބާކީ އޮތް ބައި، އިރާދަކުރެއްވިއްޔާ ކުރިއަށް އޮތް މަދު ދުވަސް ކޮޅެއްގެ ތެރޭގައި ހުރިހާ، ކޮރެއާ، ޖަޕާން، ޗައިނާ، ޔޫއެސްއޭ، ސިންގަޕޯރ، މެލޭޝިއާ، އިންޑިއާ، ޔޫއޭއީ މިހެން ގޮސް ހުރިހާ ވަރުގަދަ އީ ވޮލެޓެއް އިރާދަކުރެއްވިއްޔާ އަޅުގަނޑުމެން ރާއްޖެ ގެންނަން ވަރަށް ބާރަށް މަސައްކަތް ކުރާނަން. މިމަހު 14 ގަ އިރާދަކުރެއްވިއްޔާ އަލިޕޭ އަދި ވީޗެޓް، ރަސްމީ ސިފައެއްގައި އަޅުގަނޑުމެންނާ ވާހަކަދައްކަވަން މާލެ ވަޑައިގަންނަވާނެ

އިޤްތިސާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު

އެހެންކަމުން ސަޢީދު ވަނީ، އެކަމަށްޓަކައި ހައްދުންމަތީގެ ހުރިހާ ގޮނޑިއެއް ސަރުކާރަށް ދެއްވުމަށް އެދިލައްވާފައެވެ.

ރާއްޖޭގައި ކްރިއޭޓިވް އިކޮނޮމީ ގާއިމު ކުރުމުގެ ގޮތުން އޮންލައިން ޕޭމެންޓް ޕްލެޓްފޯމް ތައް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުމަށް ރާއްޖޭގައި އީވޮލެޓް ގެ ހިދުމަތް ގާއިމު ކުރުމަށް ރަައީސް މުއިއްޒު ވެވަޑައިގެންނެވި ވައުދުފުޅާއި އެއްގޮތަށް އީ ވޮލެޓްގެ ޚިދުމަތް ތައާރަފް ކޮށްފައިވަނީ މިދިޔަ މާރިޗު މަހުގެ 31 ގައެވެ.

އެގޮތުން އެކާއި ގުޅިގެން ބޭންކް އޮފް މޯލްޑިވްސް (ބީއެމްއެލް) އިން ބުނީ އަލަށް ތައާރަފް ކުރެވިގެންދިޔަ އީ-ވޮލެޓްގެ ހިދުމަތާއި އެކު ކަސްޓަމަރުންނަށް ބޭންކްގެ ވިސާ ޔޫއެސްޑީ ކްރެޑިޓް ކާޑު ނުވަތަ މާސްޓަރކާޑް ޕްރީޕެއިޑް ޔޫއެސްޑީ ޓްރެވަލް ކާޑު ބޭނުންކޮށްގެން ސްކްރިލް، ޕޭޕަލް އަދި އެނޫންވެސް މިފަދަ ހިދުމަތްތައް ފޯރުކޮށްދޭ  ޕްލެޓްފޯމްތައް މެދުވެރިކޮށް ފައިސާ ފޮނުވުމާއި ފައިސާ ލިބޭނެ ގޮތް ހަމަޖެހިގެންދާނެކަމަށެވެ.

އަދި، އަލަށް މި ގެނެވުނު ބަދަލާއި އެކު ކަސްޓަމަރުންނަށް ފައިސާ ފޮނުވުމަށް ކާޑުގެ ޕްރައިމަރީ އެކައުންޓްގެ ގޮތުގައި ޔޫއެސް ޑޮލަރު އެކައުންޓް ކަނޑައަޅާފައިވާ ބީއެމްއެލް ޑެބިޓް ކާޑުވެސް ބޭނުންކުރެވޭނެ ކަމަށްވެސް ބުންޏެވެ.

މީގެ އިތުރުން، އީކޮމާސް ޕްލެޓް ފޯމެއް ކަމަށްވާ ޕޭޕަލްއަށް އެކްސެސް ހޯދުމާއި ބެހޭގޮތުން އެމެރިކާގެ ސަރުކާރާއި މަޝްވަރާ ކުރައްވައިގެން މި ހިދުމަތަށް އެކްސަސް ލިބޭނެ ގޮތް ހޯދުމާއި މިކަމާއި ގުޅޭ އެހެނިހެން ފަރާތްތަކާއި މަޝްވަރާ ކޮށްގެން ޕޭޕަލް ފަދަ އެހެން ޕްލެޓްފޯމް ތަކަށް ވެސް އެކްސަސް ހޯދުމަކީވެސް މި ސަރުކާރުގެ އަމާޒެވެ.