ދިޔަވަރު ބޮޑުވާ ގަޑީގައި އުދަ އަރާފާނެ: މެޓް

މިއަދުވެސް ރާއްޖޭގެ ބޮޑު ސަރަހައްދަކަށް މޫސުން ގޯސްވާނޭކަމަށް ލަފާކުރެވޭކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.

މެޓް އޮފީހުން ވަނީ މޫސުން ގޯސްވާނޭކަމަށް ލަފާކޮށް މިއަދުގެ މެންދުރުފަހު 15:30 ހާ ހަމަޔަށް ހއ.އަތޮޅުން ފެށިގެން ތ. އަތޮޅާ ހިސާބަށް ހުދު ސަމާލު ނެރެފައެވެ. މެޓް އޮފީހުން ބުނީ ހުދު ސަމާލު ނެރެފައިވާ ސަރަހައްދުތަކަށް 22 މޭލާއި 27 މޭލާއި ދެމެދު ވައި ގަދަވާ އިރު 45 މޭލަށް ކަނޑު ގަދަ ވާނެ ކަމަށް ލަަފާ ކުރެވޭ ކަމަށެވެ.

މީގެ އިތުރުން މެޓް އޮފީހުން ވަނީ ރާއްޖޭގެ ހުރިހާ ހިސާބަކަށް ވެސް ދިޔަވަރު ބޮޑުވާ ވަގުތު އުދަ އަރާފަާނެ ކަމަށް ލަފާކޮށްފައެވެ. އެހެންކަމުން އެކަމަށް ސަމާލުވުމަށް ވަނީ އިލްތިމާސްކޮށްފައެވެ.

މޫސުން ގޯސްވުމާ ގުޅިގެން އެމްއެންޑީއެފުން ވަނީ، މޫސުމާ ގުޅޭގޮތުން ކަމާބެހޭ ފަރާތްތަކުން ދީފައިވާ އިރުޝާދުތަކަށް ބަލައިގެން ދަތުރުފަތުރުކުރުމަށް އެދިފައެވެ.

އެގޮތުން ދަތުރުފަތުރު ކުރުމުގައި ކޮންމެހެން ކުރަންޖެހޭ ދަތުރެއް ނޫނީ ނުކުރުމަށް އިލްތިމާސްކޮށްފއިވާއިރު، ކޮންމެހެން ދަތުރުކުރަންޖެހޭ ފަރާތްތަކުން ވެސް، ދަތުރުކުރާއިރު މޫސުމަށް ޚާއްޞަ ސަމާލުކަމެއް ދެއްވުމަށް ވަނީ އެދިފައެވެ. މީގެ އިތުރުން ރޭގަނޑު ދަތުރު ނުކުރުމަށާއި، މޫސުން ތަންނުދޭ ނަމަ މޫސުން ރަނގަޅު ވަންދެން ދަތުުރު ފަސްކޮށްލުމަށާއި، މޫސުމާ ބެހޭ ޤައުމީ އިދާރާއިން ރީނދޫ ނުވަތަ އޮރެންޖު ސަމާލު ނެރެފައިވަނިކޮށް ދަތުރު ނުކުރުމަށް އެމްއެންޑީއެފުން ވަނީ އިލްތިމާސްކޮށްފައެވެ.

މޫސުން ގޯވެ ވޭތުވެދިޔަ 24 ގަޑިއިރުގެ ތެރޭގައި ކަނޑުމަތީގެ ބައެއް ހާދިސާތައް ވަނީ ހިނގާފައެވެ. އެގޮތުން ދެމީހުންނާއެކު، ގދ. މަޑަވެއްޔާ ދިމާލު ބޭރުން ދަތުރުކުރަމުންދިޔަ ޑިންގީއެއް ވަނީ ބަންޑުން ޖަހާލާފައެވެ. ނަމަވެސް ޑިންގީ ހޯދުމަށް ކުރަމުންދިޔަ މަސައްކަތުން ފުލުހުންގެ ޓީމަކަށް ވަނީ އެ އުޅަނދު ފެނިފައެވެ. މީގެ އިތުރުން އެމްއެންޑީއެފްގެ ޓީމަކަށްވެސް ވަނީ ބެހިގެން އުޅުނު ޑިންގީއެއް ފެނިފައެވެ.