މި ސަރުކާރަކުން ސިޔާސީވެރިން ހިފާ ހައްޔަރުކުރަމުން ނުދާނެ: ރައީސް ޑރ.މުއިއްޒު

މި ސަރުކާރުން ސިޔާސީވެރިން ހިފައި ހައްޔަރުކުރަމުން ނުދާނޭކަމުގެ ޔަގީންކަން މިއަދުވެސް ދެއްވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވަމުން ގެންދަވާ ބަސްފުޅު މިރޭވެސް ތަކުރާރު ކުރައްވައިފިއެވެ.

ޖުމްހޫރީދުވަހުގެ ރަސްމީ ޖަލްސާގައި ވާހަކަދައްކަވަމުން ރައީސް ޑރ.މުހައްމަދު މުއިއްޒު ވިދާޅުުވީ، ސިޔާސީ ވާދަވެރިކަމުގެ ތެރެއިން ސިޔާސީވެރިން ހިފާ ހައްޔަރުކުރުމަކީ މި ސަރުކާރު ވެރިކަމަށް އައުމުގެ ކުރިންވެސް ދެއްކި ވާހަކައެއް ކަމަށާއި، އަދިވެސް އެކަން އޮތީ އެ ބީދައިންކަމަށެވެ.

ރައީސް ވިދާޅުވީ ސިޔާސީގޮތުން ބަދަލު ހިފަމުންދާތަން މިހާރު ނުފެންނާނޭ ކަމަށާއި ވާދަވެރިޔާ ޖަލައި ލައި އުޅުމަކީ މީގެކުރިން ފެނިގެންދިޔަ ކަމެއް ނަމަވެސް މިހާރު އެކަން ނިމުމަކަށް ގެނެސްފައިވާކަމަށެވެ. ނަމަވެސް ދައުލަތުގެ މުދާ ނަހަމަގޮތުގައި ބޭނުންކުރުން ކަހަލަ މައްސަލަތައް އެ އޮންނަގޮތަށް ގާނޫނީ އިމުގެ ތެރެއިން އެފަދަ މައްސަލަތައް ކުރިއަށްދާނޭކަން ރައީސް ފާހަގަކުރެއްވިއެވެ.

ރައީސް ވިދާޅުވީ ވެރިކަންކުރަން ލިބުމަކީ އެއީ މާބޮޑު މޮޅެއް ނުވަތަ މުދާގަނޑެއްވެސް ނޫންކަމަށާއި، އެއީ ވަރަށްބޮޑު ޒިންމާއެއް އަދި އަމާނާތެއްކަމަށެވެ. ވެރިކަމަށް މިވީހާ ދުވަސް ވީއިރު އެމަނިކުފާނު މަސައްކަތް ކުރެއްވީ ރައްޔިތުންގެ ފަޅީގައި ހުރެ ހެޔޮވެރިކަމެއް ކުރަން ކަމަށާއި، އެގޮތުން މީގެ ކުރީ ސަރުކާރުތަކުން އަޅާނުލައި ދޫކޮށްލާފައި ހުރި ކަންކަން ކުރަމުންދާކަމަށް ރައީސް ވިދާޅުވިއެވެ.

މިގައުމުގައި ބަދަލުހިފުމުގެ ރޫހު ނައްތާލައިފިން. ސިޔާސީގޮތުން ސަރުކާރުން މިހާރު ނުފެންނާނެ ކުރީގައި ފެނުނުގޮތަށް ބަދަލު ހިފުމެއް ނޯންނާނެ. ސިޔާސީ މީހަކަށް ވީތީ އަޅުގަނޑުގެ ވާދަވެރިޔާ އެއީ ސިޔާސީ ވާދަވެރިއަކަށްވީތީ ގެންގޮސް ހިފާ ހައްޔަރުކޮށް ޖަލަށްލާތަން ނުފެންނާނެ. ކުރިއަށް އޮތްތަނުގައިވެސް ނުފެންނާނެ

ރައީސް ޑރ.މުއިއްޒު ވިދާޅުވިއެވެ

ސިޔާސީ މީހުންނަށް އަދބުދިނުމަކީ މި ސަރުކާރުން ކުރާނޭކަމެއް ނޫންކަމަށް ރައީސް ޑރ.މުއިއްޒު ވިދާޅުވެފައިވާއިރު، މިފަހުން މީޑިއާއަކަށް ދެއްވި ބަސްދީގަތުމެއްގައި ރައީސް ޔާމިނު ވަނީ ރައީސް ޑރ.މުއިއްޒުގެ ބައެއް ސިޔާސަތްތަކަށް ވަރަށްބޮޑަށް ފާޑުވިދާޅުވެފައެވެ. އެ ބަސްދީ ގަތުމުގައި ރައީސް ޔާމީނު ވަނީ ޑރ.މުއިއްޒު ވެރިކަމަށް ގެނައުމަށް މަސައްކަތް ކުރެވުނީތީވެ އެކަން ރެގްރެޓް ކުރައްވާކަމަށް ވިދާުވެފައެވެ.

ރައީސް ޑރ.މުއިއްޒުގެ ސިޔާސަތްތަކުގެ ތެރެއިން ޗާގޯސް މައްސަލަ އާއި އިންޑިއާ ސިފައިން ރާއްޖެއިން ބޭލުމުގެ ކަންކަން ތެދުވެރިކަމާއެކު ތަންފީޒުކޮށްފައި ނުވާކަމަށް ރައީސް ޔާމިނު ވަނީ ތުހުމަތު ކުރައްވާފައެވެ.

ރައީސް ޔާމީނު ވިދާޅުވެފައިވަނީ، ރައީސް ޑރ.މުއިއްޒު އާ މެދު ޕާސަނަލީ އެއްވެސް މައްސަލައެއް ނެތްކަމަށާއި މައްސަލައަކީ ހަމައެކަނި އެމަނިކުފާނުގެ ސިޔާސަތުތައް ކުރިއަށްގެންދަވާ ގޮތްތައްކަމަށެވެ.