ޤާނޫނާ ޚިލާފަށް ބިދޭސީން ލައްވާ މަސައްކަތް ކުރުވާ ފަރާތްތަކަށް ފިޔަވަޅުއެޅޭނެ: ޝަމްޢާން

ޤާނޫނާ ޚިލާފަށް ބިދޭސީން ލައްވާ މަސައްކަތް ކުރުވާ ފަރާތްތަކަށް ފިޔަވަޅުއެޅޭނެ އިމިގްރޭޝަން ކޮންޓްރޯލަރ މުހައްމަދު ޝަމްޢާން ވަޙީދު ވިދާޅުވެއްޖެއެވެ.

ޝަމްޢާން އެކްސްގައި ކުރެއްވި ޕޯސްޓެއްގައި ވިދާޅުވޫ، ޤާނޫނު ނަންބަރު 2007/1 (ދިވެހިރާއްޖޭގެ އިމިގްރޭޝަން ޤާނޫނު) ގެ 30 ވަނަ މާއްދާގެ ދަށުން، ރާއްޖޭގައި މަސައްކަތްކުރުމުގެ ހުއްދަނެތް ބިދޭސީއަކު ލައްވާ އެއްވެސް މަސައްކަތެއް ކުރުވުމަކީ ކުށެއްކަމަށެވެ.

އަދި މިފަދަ ކުށެއް ކުރާ ފަރާތްތައް އެ ޤާނޫނުގެ 33 ވަނަ މާއްދާގެ (ށ) ގެ ދަށުން 50,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކޮށް، އެމީހެއްގެ ޕާސްޕޯޓު ވަކި މުއްދަތަކަށް ހިފެހެއްޓުމުގެ އިޚްތިޔާރު ކޮންޓްރޯލަރ އޮފް އިމިގްރޭޝަނަށް ލިބިގެންވާކަމަށްވެސް އޭނާ ފާހަގަކުރެއްވިއެވެ.

ޝަމްޢާން އިތުރަށް ވިދާޅުވީ، އެންމެހާ ފަރާތްތަކުންވެސް އިމިގްރޭޝަންގެ ޤާނޫނާއި އެ ޤާނޫނުގެ ދަށުން ހެދިފައިވާ ގަވާއިދުތަކާ އެއްގޮތަށް ޢަމަލުކުރުމަށް އިލްތިމާސްކުރައްވާ ކަމަށެވެ.

ޝަމްޢާން މިހެން ވުދާޅުވެފައި ވާއިރު، ރާއްޖޭގައި ޤާނޫނާ ޚިލާފަށް މަސައްކަތްކުރާ ބިދޭސީންގެ މައްސަލަ އިތުރުވަމުން ދާތީ، އެކަން ހައްލު ކުރުމަށް އިމިގްރޭޝަނުން ޚާއްސަ އޮޕަރޭޝަނެއްވެސް ކުރިއަށް ގެންދާކަން ފާހަގަކޮށްލަންޖެހެއެވެ.