އޭޕްރީލް މަހު ބިލު ބޮޑުވާތީ، އެ ބިލުންވެސް ޑިސްކައުންޓް ދިނިން؛ މާރިޗު މަހުގެ ބިލާ އެއްވަރުވީ އެހެންވެ: ފެނަކަ

ބައެއް ގޭބީސީތަކަށް މިދިޔަ މަހު ފޮނުވި ކަރަންޓް ބިލާއި މާރިޗު މަހުގެ ކަރަންޓް ބިލާ އެއްވަރުވެފައިވަނީ އެޕްރީލް މަހުގެ ބިލުތަކަށްވެސް ޑިސްކައުންޓު ދީފައިވާތީ ކަމަށް ފެނަކައިން ބުނެފިއެވެ.

މިކަން ހާމަކޮށް ފެނަކައިން މިއަދު ނެރުނު ނޫސްބަޔާނެއްގައި ބުނީ، މި އަހަރުގެ މާރިޗު މަހުގެ (ރަމަޟާން މަހުގެ) ކަރަންޓު ބިލަށް ޑިސްކައުންޓު ދީފައިވާ ފަދައިން އެޕްރީލް މަހުގެ ކަރަންޓު ބިލަށްވެސް ޑިސްކައުންޓު ދީފައިވާ ކަމަށެވެ.

އަދި މާރިޗު މަހުގެ އިތުރުން އޭޕްރީލް މަހުގެ ބިލްތަކުންވެސް މިއަހަރު ޑިސްކައުންޓެއް ދެވިފައިވަނީ، އޭޕްރީލް މަހަކީ ހޫނު ގަދަވުމުގެ ސަބަބުން ޢާއްމުކޮށް ކަރަންޓުބިލުތައް ވަރަށް ބޮޑުވާ މަހަކަށްވާތީ ރައްޔިތުންނަށް އިތުރު ލުޔެއް ދިނުމަށް ކަމަށް އެ ކުންފުނިން ބުނެއެވެ.

ވުމާއެކު އޭޕްރީލްމަހުގެ ކަރަންޓުބިލު މިކުންފުނީގެ ކަސްޓަމަރުންނަށް ފޯރުކޮށްދިންއިރު، ބިލުގައިވާ ”ކަރަންޓު ބޭނުންކުރެވުނު ވަރު“ އޭގެ ކުރީ މަހާ ތަފާތުވި ނަމަވެސް، ބައެއް ބިލްތަކުގައި ބިލް އަމައުންޓު (ފައިސާގެ އަދަދު) މާރިޗު މަހުގެ (ރަމަޟާން މަހުގެ) ބިލާއި ސީދާ އެއް އަދަދެއްގެ ގޮތުގައި އޮތީ، މިދެންނެވި ލުއި ދިނުމުން، ކަމުގައި ދެންނެވީމެވެ.

ފެނަކަ

ބައެއް މީހުން ވަނީ މާޗްމަހާ އޭޕްރީލް މަހުގެ ބިލްގައި އެއް އަދަދެއް ހިމަނާފައިވުމުން އެކަން ފާހަގަކޮށް ސޯޝަލް މީޑިއާގައި އެކި ޝުއޫރުތައް ފާޅުކޮށްފަ އެވެ.