އިސްލާމިކް ކެލިގްރަފީން އާދަޔާޚިލާފު ފަންނުވެރިކަން ދައްކާލި، ނާއިޝްއަށް މިނިސްޓްރީގެ ގިނަ އެހީތަކެއް

ކީރިތި ޤުރުއާން ލިއުމާއި އިސްލާމިކް ކެލިގްރަފީގެ ދާއިރާއިން އާދަޔާ ޚިލާފު ހުނަރު ދައްކާލާފައިވާ، ޖަމާލުއްދީން ސުކޫލުގެ ދަރިވަރު ހުސައިން ނާއިޝްއަށް އިސްލާމިކް މިނިސްޓްރީގެ ފަރާތުން ގިނަ އެހީތަކެއް ދިނުމަށް ނިންމައިފިއެވެ.

މިކަން ހާމަކުރެއްވީ އިސްލާމިކް މިނިސްޓަރ ޑރ. މުހައްމަދު ޝަހީމް ޢަލީ ސައީދު ފޭސްބުކް ޕޭޖްގައި ކުރެއްވި ޕޯސްޓެއްގައެވެ.

އެގޮތުން މިނިސްޓަރ ވިދާޅުވިީ، އިއްޔެ ނާއިޝްއާއި އޭނާގެ ބެލެނިވެރިންނާ ބައްދަލުކުރައްވާފައިވާ ކަމަށެވެ. އަދި، ނާއިޝް އެދޭ ގޮތަށް، މި ދާއިރާއިން އޭނާއަށް ބޭނުންވާ އިތުރު ހުނަރުތައް ދަސްކޮށްދިނުމަށް މިނިސްޓްރީން އެހީތެރިވާނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.

މީގެ އިތުރުން މިނިސްޓްރީގެ ފަރާތުން ނާއިޝްއަށް ދިނުމަށް ނިންމާފައުވާ އެހީތަކަކީ:

- ނާއިޝް ސްކޫލް ނިމުމުން، ޤުރުއާން މަރުކަޒު ތެރޭގައި މި ހުނަރު އެހެން ކުދިންނަށް ދަސްކޮށްދިނުމަށް އޭނާއާ މަސައްކަތްތަކެއް ޙަވާލު ކުރުން

- ރާއްޖޭގައި މި އަންނަ އަހަރު ހުޅުވާ އައްޑޫ އިސްލާމިކް ސެންޓަރާއި ހިތަދޫ އިސްލާމިކް ސެންޓަރާއި ފުވައްމުލައް ސިޓީގެ ޤުރުއާން މަރުކަޒުގައި ނާއިޝްގެ އިސްލާމިކް ކެލިގްރަފީގެ ފަންނުވެރި ލިޔުންތައް ބެހެއްޓުން

- އިސްލާމިކް ކެލިގްރަފީ ހެދުމަށް ބޭނުންވާ އެންމެހައި ޒަމާނީ ވަސީލަތްތައް މި ދަރިވަރަށް ހޯދައިދިނުން.

- މި ދާއިރާއިން އިތުރު ހުނަރު ދަސްކޮށްދިނުމަށް ދާއިރާގެ ފަންނުވެރިޔަކު ހަމަޖެއްސުން.

"އިސްލާމީ ދާއިރާތަކުން ކުރިއަށް ދާން ޝައުޤުވެރިކަން ހުރި މިފަދަ ހުރިހައި ކުދިންނަށް މި ފުރުޞަތު އޮންނާނެ," މިނިސްޓަރ ވިދާޅުވިއެވެ.

ވާހަކަ ދެއްކުމާއި އިވުމުން މަހުރޫމްވެފައިވާ ނާއިޝް ވަނީ، އޭނާގެ ސްކޫލު، ޖާލުއްދީންގެ އެކި ފާރުތަކުގައި ގުރުއާނުގެ އާޔަތްތައް ކެލިގްރާފްކޮށްފަ އެވެ. އެއަށް ގިނަ ބައެއްގެ ސަމާލުކަން ވަނީ ލިބިފައެވެ.