ހަތަރު މިލިއަން ރުފިޔާ ދެއްކުމަށް އާޒިމާގެ މައްޗަށް ކުރި ހުކުމް އިސްތިއުނާފް ކުރަން ނިންމައިފި

ކުރީގެ ބަންޑާރަ ނައިބު އަދި މާލޭ ސިޓީ މޭޔަރު ކަމަށް ކުރިމަތިލައްވާފައިވާ އާއިޝަތު އާޒިމާ ޝުކޫރުގެ މައްޗަށް ހަތަރު މިލިއަން ރުފިޔާގެ ލޯނެއް ދެއްކުމަށް ސިވިލް ކޯޓުން ކޮށްފައިވާ ހުކުމް އިސްތިއުނާފް ކުރަން ހުށައެޅުމުގެ މަސައްކަތް ކުރަމުންދާ ކަމަށް އާޒިމާ ވިދާޅުވެއްޖެއެވެ.

ޢާޒިމާ މިފަދައިން ވިދާޅުވީ މިއަދު ނެރުނު ބަޔާނެއްގައެވެ.

މި ބަޔާނުގައި އެކަމަނާ ވިދާޅުވީ މޯލްޑިވްސް އިސްލާމިކް ބޭންކް (އެމްއައިބީ) އިން ނަގާފައިވާ ފައިނޭންސިން ފެސިލިޓީ އަކަށް ގަވާއިދުން ފައިސާ ނުދައްކައިގެން މިއަދު އެކަމަނާގެ ޣައިރު ހާޒިރުގައި ހުކުމް ކުރިކަން އެނގުނީ މީޑިއާ ތަކުން ކަމަށެވެ.

އާޒިމާ ނެންގެވި ފެސިލިޓީ އަކީ ހުޅުމާލޭގައި އެކަމަނާ ދިރިއުޅުއްވާ ފްލެޓް ގަތުމަށް 2016 ވަނަ އަހަރު ނަންގަވާފައިވާ ލޯނެއްކަމަށް ވިދާޅުވެ އާމްދަނީ ލިބެމުން ދިޔަ ދުވަހު މި ލޯނަށް ގަވާއިދުން ފައިސާ ދެއްކި ނަމަވެސް ކުރީގެ ސަރުކާރުން އެކަމަނާގެ މައްޗަށް ކުރި ދައުވާ އާއި އެކު، އެ ކަމަނާ މަސައްކަތް ކުރައްވާ ދާއިރާ ކަމުގައިވާ ގާނޫނީ ވަކީލު ކަމުގެ މަސައްކަތަށް ހުރަސްތަކެއް ކުރިމަތި ވެގެން ދިޔަ ކަން އާޒިމާ ފާހަގަ ކުރެއްވިއެވެ. މިކަމުގެ ސަބަބުން ރާއްޖެއިން ބޭރުން ލިބުނު ވަޒީފާ ގެ ފުރުސަތުވެސް ގެއްލިފައިވާކަމަށް އާޒިމާ ވިދާޅުވިއެވެ.

މީގެ އިތުރުންވެސް އާޒިމާ ވިދާޅުވީ ލޯނު ގަވާއިދުން ދެއްކުމުގައި ކުރި އެރުމެއް ލިބިފައި ނުވަނީ އާޒިމާ އަކީ އަމިއްލަ މަސައްކަތުން ދިރިއުޅުމުގެ ހަރަދުތައް ހަމަޖައްސައިގެން ދިރިއުޅޭ މަޔަކަށް ވެފައި ކޮވިޑް ގެ ހާލަތުގެ ސަބަބުން އާމްދަނީއެއް ހޯދުމަށް ކުރި ތަފާތު މަސައްކަތްތަކަށް އެކަށީގެންވާ ކުރިއެރުމެއް ލިބިފައި ނުވާތީ ކަމަށެވެ. އަދި މި ހުކުމް ކޮށްފައި މިވަނީ މި ލޯނު ދެއްކުމަށް ތާވަލެއް ރާވައި، ލޯނު ރީސްޓަރަކްޗާ ކުރުމުގެ މަޝްވަރާތައް ބޭންކާއި އެކު ކުރިއަށް ދަނިކޮށް ކަމަށެވެ.

ދައުލަތުގެ ބާރުގަދަ އެތައް މަގާމެއް އެތައް ފަހަރަކު އަދާކުރެއްވި ނަމަވެސް އެކަމަނާއަށް ލިބޭ މުސާރަގެ އިތުރުން އެހެން އެއްވެސް އެއްޗެއް ދައުލަތުން ނުނަގާ ކަމަށާއި، އެއްވެސް ފަރާތަކުން ނާޖާއިޒު ފައިދާ ނަގާފައި ނުވާނެ ކަމަށާއި މަސައްކަތް ކުރެވޭތޯ ބައްލަވަނީ ލިބިފައި ހުރި ތައުލީމެއް ގެ މައްޗަށް ބިނާ ކޮށް ކުރާ މަސައްކަތްތަކުން ކަމަށް ވެސް އާޒިމާ ވިދާޅުވިއެވެ.

ހަމައެހެންމެ މިފަދަ ދަނޑިވަޅެއްގައި ކުއްލި އަކަށް މިފަދަ ހުކުމެއް ނެރުމުން އާޒިމާ ކުރައްވަމުން ގެންދާ މަސައްކަތަކަށް މަޑު ޖެހުމެއް ނާންނާނެ ކަމަށާއި މާލޭ މޭޔަރު ކަމަށް އިންތިޚާބު ވުމަށް ކުރައްވަމުން ގެންދަވާ މަސައްކަތް އިހުނަށް ވުރެ ބާރަށް ކުރިއަށް ދާނެ ކަމަށްވެސް އެކަމަނާގެ ފަރާތުން ނެރުނު ބަޔާނުގައި ވެއެވެ.

މިއަދު ސިވިލް ކޯޓުން 2 ޖެނުއަރީ 2024 ގެ ނިޔަލަށް ފެސިލިޓީގެ އިތުރުން ޗެރިޓީގެ ގޮތުގައި ދައްކަން ޖެހޭ 4،156،355 ރުފިޔާ އާއި މަހުން މަހަށް އަރަމުންދާ ޗެރިޓީ ފައިސާ 6 މަސްދުވަހުގެ ތެރޭގައި ކޮންމެ މަހަކުވެސް، އެމަހަކަށް ދައްކަން ޖެހޭ ފައިސާ ގެ އަދަދަށް ވުރެ މަދު ނޫން އަދަދަކަށް ދައްކާ ޚަލާސް ކުރުމަށް އާޒިމާގެ މައްޗަށް ވަނީ ހުކުމް ކޮށްފައެވެ.