ލާމަރުކަޒީ ނިޒާމް އެންމެ ފުރިހަމަގޮތުގައި ފެންނަންފެށީ މިއަދު: ނާޒިމް

ލާމަރުކަޒީ ނިޒާމް އެންމެފުރިހަމަ ގޮތުގައި ފެންނަން ފެށީ މިއަދު ކަމަށާއި، އެ ނިޒާމުގެ ފުރިހަމަކަން ގެނެސްދެއްވި ވެރިޔަކީ އަދުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒުކަމަށް ހެލްތު މިނިސްޓަރު ޢަބްދުﷲ ނާޒިމް ވިދާޅުވެއްޖެއެވެ.

ކޮންގްރެސް ޕާޓީގެ ކެނޑިޑޭޓް އާއިޝަތު އަލައިކާ އަދުނާނުގެ ކެމްޕެއިން އޮފީސް ހުޅުވުމަށް ބޭއްވި ޖަލްސާގައި ވާހަކަދައްކަވަމުން މިނިސްޓަރު ނާޒިމް ވިދާޅުވީ، ބާރުތައް ފެށިގެން އަންނަނީ ރައްޔިތުންގެ ކިބައިންކަން ޤާނޫނު އަސާސީގައި ވަރަށް ފުޅާކޮށް ލިޔެފައި އޮންނަ ކަމަށާއި، އޭގެ މާނައަކީ ދައުލަތުގެ ސިޔާސަތުތައް ބައްޓަން ކުރެވިފައި ހުންނަންވާނީ ރައްޔިތުންގެ ވިސްނުމާ ފިކުރާ އެއްގޮތަށް ކަމަށެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަމުން ގެންދަވަނީ އެމަގުންކަން ފާހަގަކުރައްވަމުން މިނިސްޓަރު ވިދާޅުވީ، ފިނިކޮޓަރިން ނިކުމެ ރައީސް މަސައްކަތް ކުރައްވަނީ ރައްޔިތުންނާ ކައިރިއަށް ވަޑައިގެންކަމަށެވެ. ތާރީހު ބައްލަވައިފިނަމަ ވެރިކަމުގެ ފުރަތަމަ ދެ އަހަރުދުވަހުގެ ތެރޭގައި އެއްވެސް ވެރިއަކު ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން ރައްޔިތުންނާ ބައްދަލުކުރައްވާފައި ނުވާއިރު، ރައީސް ޑރ.މުއިއްޒު ވަނީ އެކަންވެސް ހާސިލް ކުރައްވާފައިކަން މިނިސްޓަރު ވަނީ ފާހަގަކުރައްވާފައެވެ.

އެގޮތުން ވަޒީރުން، ކުންފުނިތަކުގެ ވެރިންގެ އިތުރުން ރައްޔިތުންގެ މަޖިލިހުގެ މެންބަރުން ފިނި ކޮޓަރިތަކުން ނުކުމެ ރައްޔިތުންނާ ހަމައަށް އަންނަންޖެހޭކަމަށް ވަޒީު ވިދާޅުވިއެވެ.

ރައީސް އޮފީހުގެ ފިނި ކޮޓަރިން ނުކުމެވަޑައިގެން އެ ރަށަށް ވަޑައިގެން އެ ރަށްރަށުގެ ލޯކަލް ކައުންސިލްތަކާ ބައްދަލުކުރައްވާ އަމިއްލަ އަތްޕުޅުން، އަމިއްލަ ގަލަންކޮޅުން އެ ރަށްރަށުގެ ކަންތައްތައް އޮޅުންފިލުވާ ލިޔުއްވަވައިގެން މާލެއަށް ވަޑައިގެން އަޅުގަނޑުމެންނާ އެ މަސައްކަތްތައް ހަވާލުކުރަނީ

މިނިސްޓަރު ނާޒިމް

މި ހަފްލާގައި ވާހަކަދައްކަވަމުން މިނިސްޓަރު ނާޒިމް ވަނީ ލާމަރުކަޒީ ނިޒާމަށް މިފަހުން ލިބުނު ބާރުވެރިކަން ފާހަގަކުރައްވައި ބައެއް މިސާލުތައް ކިޔައިދެއްވާފައެވެ. އެގޮތުން މާލޭގެ ހުރިހާ ރައްޔިތުން ވޯޓުލައިގެން މާލެސިޓީ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސަކު ހޮވި ތާރީހެއް ނޯންނާނެކަން ފާހަގަކުރައްވަމުން ނާޒިމް ވިދާޅުވީ އެއީ ރައީސް ޑރ. މުހައްމަދު މުއިއްޒުގެ ވިސްނުންފުޅެއްކަަމަށެވެ.

ކުރިއަށްއޮތް ލޯކަލް ކައުންސިލް އިންތިހާބުގެ ވޯޓު ކަރުދާސްކޮޅުގައި ޒިންމާދާރުކަމާއެކު ވޯޓު ދެއްވުމަކީ އަދާކުރަންޖެހޭ ގައުމީ ވާޖިބެއްކަން ފާހަގަކުރައްވަމުން މިނިސްޓަރު ވިދާޅުވީ، އެޕްރީލް މަހުގެ ހަތަރުވަނަ ދުވަހު ފެށިގެންދާނީ ލޯކަލް ގަވަރމަންޓްގެ މުޅިން އާ ބާބެއްކަމަށެވެ.