ބޮޑުތަކުރުފާނުމަގު އެއް ނަމްބަރު ފާލަން ސަރަހައްދަށް ދެން އަންނަން އޮތީ ކޮން ބަދަލެއް؟

މާލޭގެ ބޮޑުތަކުރުފާނުމަގު ފުޅާކުރުމަށް ސަރުކާރުން ފަށާފައިވާ އުމްރާނީ ތަރައްޤީގެ މަޝްރޫޢުއަކީ މި ފަހުގެ ތާރީހެއްގައިވެސް މާލެއަށް އައި އެންމެ ފާަހގަކޮށްލެވޭ ބަދަލެވެ. މި މަޝްރޫޢުގެ ދަށުން މިހާރު ވަނީ ބާޒާރުމަތީ ސަރަހައްދުން ފެށިގެން ހެންވޭރު ފެރީ ޓާމިނަލާހަމަޔަށް ވަނީ ފުޅާކުރުމުގެ މަސައްކަތް ނިމިފައެވެ. މި ސަރަހައްދަކީ މާލޭގެ އެންމެ ބާރުބޮޑު ސަރަަހއްދެވެ. އެއްގަމު ދަތުރުފަތުރުގެ އިތުރުން މާލެއަށް މީހުންފައިބާ އަދި އުލަނދުތައް އެންމެ ގިނައިން ލަފާފުރާ ހަދަނީވެސް އެ ސަރަހައްދުތަކުންނެވެ.

ފިޔަވަހިތަކަކަށް ބަހާލައިގެން ފެށި މި މަސައްކަތުގެ އެންމެ ފުރަތަމަ ނިމިފައިވަނީ ބާޒާރުމަތީ ސަރަހައްދެވެ. އެއަށްފަހު ހެންވޭރު ފެރީ ޓާމިނަލުން ފެށިގެން އެއްނަމްބަރު ފާލަމާ ހިސާބަށް ތަރައްޤީކޮށް ނިންމައި އިއްޔެ ވަނީ އެ ސަރަހައްދު އާއްމުނަށް ހުޅުވާލާފައެވެ. މި ސަރަހައްދު އާންމުނަށް ހުޅުވާލިއިރު އެންމެބޮޑު ފަސޭހަކަމެއް ލިބިގެންދިޔައީ ޕާކްކުރުމަށް ޖާގައެއް ހައްސަކޮށްފައި އޮތުމުންނެވެ.

މާލޭގެ އެންމެ ކާރޫބާރޫބޮޑު ސަރަހައްދުމަގު ހަތަރު ލޭނަށް ބަދަލުކުރުމާއެކު އެ ސަރަހައްދުގެ ދަތުރުފަތުރަށް ވަނީ ވަރަށްބޮޑު ފަސޭހަކަމެއް ލިބިގެންގޮސްފައެވެ.

މާލޭ ވަށައިގެންވާ މަގު ތަރައްޤީކުރި ހިސާބަށް ދެން އަންނާނެ ބަދަލުގެ ތަސްވީރެއް ރައީސްލްޖުމްހޫރިއްޔާ ޑރ.މުހައްމަދު މުއިއްޒު މިއަދު ވަނީ އެކްސްގައި ކުރެއްވި ޕޯސްޓެއްގައި ދައްކާލާފައެވެ.

އެ ބަދަލަކީ އެއްނަމްބަރާ ދިމާލު ލޯންޗްފަހަރު ގާތްކުރާ ސަރަހައްދަށް ގެނައުމަށް ނިންމާފައިވާ ބަދަލެވެ. މިހާރު އެ ސަރަހައްދުން ލޯންޗުތަކުގައި ފުރާ ރައްޔިތުންގެ އެންމެބޮޑު ޝަކުވާއަކަށް ވެފައި އޮންނަނީ ލޯންތައް ގިނަކަމުން ފަހަރަކު ލޯންޗަކަށް އަރަންޖެހޭ މައްސަލައެވެ.

ބައެއްފަހަރު ބޭނުންވާ ލޯންޗަށް އެރެނީ ތިން ހަތަރު ލޯންޗަށް އަރައިގެންނެވެ. މިއީ މުސްކުޅިންނާއި ކުޑަކުދިން އަދި އަންހެނުންނަށް ކުރިމަތިލާންޖެހޭ ވަރަށްބޮޑު ތަކްލީފެކެވެ. މިހެއް އެއްލޯންޗުން އަނެއް ލޯންޗަށް އެރުމުގެ ތެރޭގައި ބައެއްމީހުން ކައްސާލާފައިވެސް އެބަހުއްޓެވެ. އަދި ފަޅުތެރެ އުފުލަންޖެހޭ ތަކްލީފް ވަކިން ބޮޑެވެ.

އެއްނަމްބަރު ޖެޓީ ކައިރި ލޯންޗުތައް ގާތްކުރާ ސަެަހައްދަށް މިހާރު ގެނައުމަށް ނިންމާފައިވާ ބަދަލާއެކު ލޯންތައް ގިރާކުރަން ޖެހޭޖެހުމުގެ މައްސަލައަށް ހައްލެއް ލިބިގެންދާނޭކަމަށް ސަރުކާރުން ވަނީ ބުނެފައެވެ.

މާލެ ވަށައިގެންވާ މަގު ތަރައްޤީކުރުމުގެ މަޝްރޫޢުއަކީ މި ސަރުކާރުން މާލޭގެ އުމްރާނީ ތަރައްޤީގެ މަސައްކަތްތަކުގެ ތެރޭގައި ހިމެނޭ މުހިންމު އެއް ބައެވެ. މި މަޝްރޫއަކީ ދިވެހި ދައުލަތުގެ ބަޖެޓުން ހަރަދުކޮށްގެން، މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާއިން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ ހަވާލުކޮށްފައިވާ މަޝްރޫއު އެކެވެ. އެ ކުންފުންޏަށް މި މަސައްކަތް ހަވާލުކޮށްފައި ވަނީ 144,5 ރުފިޔާގެ އަގަކަށެވެ.