އެފްޓީއޭގެ ދަށުން އެންސިސް ކުންފުނިން ޗައިނާއަށް މަސްބޭރުކުރަން ތައްޔާރުވަނީ!

ޗައިނާ އާއި ދިވެހިރާއްޖެއާ ދެމެދު ޤާއިމްކުރި މިނިވަން ވިޔަފާރީގެ އެއްބަސްވުމުގެ ދަށުން ފުރަތަމަ ފަހަރަށް ރާއްޖޭގެ ކުންފުންޏަކުން ޗައިނާއަށް މުދާ ބޭރުކުރުމުގެ މުއާމަލާތްތައް ފަށައިފިއެވެ.

އެފްޓީއޭ އެއްބަސްވުމުގެ ދަށުން ރާއްޖެއިން ފުރަތަމަ ފަހަރަށް ޗައިނާއަށް މުދާ ބޭރުކުރުމުގެ މަސައްކަތް ފަށާފައިވަނީ މަސްވެރިކަމުގެ ސިނާއަތުގައި ހަރަކާތްތެރިވާ އަމިއްލަ ކުންފުންޏެއްކަމަށްވާ އެންސިސް ކުންފުންނެވެ. އެންސިސް ފިޝަރީޒުން ވަނީ އެކުންފުނީގެ މަހުގެ އުފެއްދުންތައް ޗައިނާގެ ބާޒާރަށް ނެރުމަށްޓަކައި އެޤައުމުގެ ޒިންޖުއާން ސޯވް ބެއިޖިން ކޮމާޝަލް މެނޭޖްމަންޓް ކޯޕަރޭޝަނާއެކު އެއްބަސްވުމުގައި ސޮއިކޮށްފައެވެ.

ޗައިނާގެ ވެރިކަންކުރާސިޓީ ބެއިޖިންގައި ކުރިއަށްދިޔަ ރަސްމިއްޔާތެއްގައި އެންސިސްގެ ފަރާތުން އެއްބަސްވުމުގައި ސޮއިކުރެއްވީ ޖެނެރަލް މެނޭޖަރު ހުސައިން އަފީފެވެ. އަދި ޒިންޖުއާން ސޯވް  ފަރާތުން ސޮއިކުރެއްވީ ޗެއަރމަން ލިން ޔުޗެންޖް އެވެ. މި ރަސްމިއްޔާތުގައި ރާއްޖެއިން ޗައިނާއަށް ކަނޑައަޅާފައި ހުންނަވާ ސަފީރު ޑރ.ފަޒީލް ނަޖީބު އާއި ސްޓޭޓް މިނިސްޓަރ ޑރ. އަމްޒަތު އަޙްމަދުގެ އިތުރުން ޗައިނާގެ ނަގާކިޔާ މީޑިއާތަކުން ބައިވެރިވިއެވެ.

މި އެއްބަސްވުމުގެ ދަށުން އެންސިސް ކުންފުނިން އުފައްދަމުންދާ މަހުގެ އެކި ބާވަތްތައް ޗައިނާގެ ބާޒާރުތަކަށް ނެރޭނެއެވެ. މީގެ ތެރޭގައި ގަނޑުކުރި މަހުގެ އިތުރުން ވެލިއު އެޑެޑް އުފެއްދުންތައްކަމަށްވާ ދަޅުމަހުގެ ބާވަތްތައް ހިމެނެއެވެ. އެންސިސްއިން މައުލޫމާތުދޭ ގޮތުގައި މި އެއްބަސްވުމުގެ ދަށުން ފުރަތަމަ ޝިޕްމަންޓް އަންނަމަހުގެ ތެރޭގައި ފޮނުވާނެއެވެ.

ރާއްޖެއިން ޗައިނާ ސަރުކާރާއެކު ޤާއިމްކުރި މިނިވަން ވިޔަފާރީގެ އެއްބަސްވުމުގެ ދަށުން ޑިއުޓީއެއްނެތި ޗައިނާގެ ބާޒާރުތަކަށް މަހުގެ އެކިކަހަލަ އުފެއްދުންތައް ބޭރުކުރުމުގެ ފުރުސަތު ލިބެއެވެ. މީގެ އިތުރުން އޮންލައިނުކޮށްވެސް މުދާ ވިއްކުމުގެ ފުރުސަތު ލިބިގެންދާކަން ފާހަގަކޮށްލެވެއެވެ.

ޗައިނާ އާއި ރާއްޖެއާ ދެމެދު ޤާއިމްކުރި މިނިވަން ވިޔަފާރީގެ އެއްބަސްވުމުގެ މުއާމަލާތްތައް އެންމެފުރަތަމަ ފަށާފައިވަނީ 2016 ވަނަ އަހަރެވެ. އެއްބަސްވުން ޤާއިމްކޮށް ނިންމައި އެއަށް އަމަލުކުރަން ފަށާފައިވަނީ ހުސްވި ޖެނުއަރީމަހުގެ އެއްވަނަ ދުވަހުން ފެށިގެންނެވެ.