ކުރިއަށްއޮތް ރަމަޟާންމަހުން ފެށިގެން ޑަބްލިއުޑީސީގެ މެމްބަރުންނަށް ރޯދަ އިނާޔާތް ލިބިގެންދާނެ: ރައީސް ޑރ.މުއިއްޒު

ކުރިއަށްއޮތް ރަމަޟާންމަހުން ފެށިގެން އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ)ގެ މެމްބަރުންނަށް ރޯދަ އިނާޔާތް ލިބިގެންދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު އަރިއަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ދަނގެއްޗަށް ވަޑައިގެން، މިރޭ އެރަށުގެ ރައްޔިތުންނާ ބައްދަލުކޮށްލެއްވުމަށް ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަކީ ވަރަށް ބޭއިންސާފުގޮތަކަށް ގާނޫނުގައި އޮންނަ ޕޮއިންޓެއް ނަގައިގެން ވަރަށް ނިކަމެތިގޮތެއް ހަދާފައި އޮންނަ ކޮމިޓީއެއް ކަމަށެވެ. ކޮންމެ ރަށެއްގައިވެސް އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަކީ އެރަށެއްގެ ތަރައްޤީއަށް ވަރަށް މުހިއްމު ދައުރެއް އަދާކުރާ ކޮމިޓީއެއްކަން ފާހަގަކުރައްވަމުން ރައީސް ޑރ.މުއިއްޒު ވިދާޅުވީ، އެފަދަ ކޮމިޓީތަކަށް ދިމާވެފައިވާ ވަރަށް ގިނަ ކަންކަން ޤާނޫނު ހަދާ މަޖިލީހުގެ ތެރެއިން ރަނގަޅު ކޮށްދެއްވާނޭކަމަށް ވިދާޅުވެފައިވާނޭކަމަށެވެ.

ފެބުރުއަރީމަހު މަޖިލީހުގެ އައު ދައުރު ފެށުމާއެކު ސަރުކާރުގެ ފަރާތުން ގާނޫނުތަކަށް ގެންނަންޖެހޭ އިސްލާހުތައް ގެނައުމުގެ މަސައްކަތް ކުރައްވާނޭކަމަށާއި އެގޮތުން ޑަބްލިއުޑީސީގެ މެމްބަރުންނަށް ފައިދާކުރާނޭ ގޮތަށް ބައެއް އިސްލާހުތައް ގެންނަވާނޭކަން ރައީސް ވަނީ ފާހަގަކުރައްވާފައެވެ.

ޑަބްލިއުޑީސީގައި މަސައްކަތްކުރާ މެމްބަރުންނަކީ ފުލްޓައިމް ވަޒީފާއެއްނޫން. އެހެން ނަމަވެސް ވަރަށް ގިނަ ވަގުތު ހޭދަކުރައްވާ މެމްބަރުންތަކެއް. އަޅުގަނޑު ވައުދުވީ އެ ލިބިލައްވާ އެލަވަންސަކީ މުސާރައެއް ގޮތުގައި އެ އެލަވަންސް ގާނޫނުން ކަނޑައެޅޭނޭ ގޮތް ހަދައިދީ އެބޭފުޅުންގެ ކަންބޮޑުވުންތަކަށް ހައްލު ގެނެސްދިނުން.

ރައީސް ޑރ.މުއިއްޒު ވިދާޅުވިއެވެ

ރައީސް ވިދާޅުވީ ރޯދަމަހުގެ އިނާޔަތާއި ވިހެއުމުގެ ޗުއްޓީއާއި އެ މެމްބަރުންނަށް ލިބޭ މުސާރަ ނުވަތަ އިނާޔަތް ބޭންކުތަކުން އެ ބަލައިގަނެ ލޯނު ހޯދުން ކަންކަމަށް މަގުފަހިކޮށްދިނުމަކީ މިހާރު ވާކަންކަމެއް ނޫންކަމަށާއި، ލާމަރުކަޒީ ޤާނޫނާއި ވަޒީފާއާ ބެހޭ ޤާނޫނަށް އިސްލާހު ގެނެސްގެން އަންހެނުން ކޮމިޓީތަކުގެ މެމްބަރުންނަށް އެ އިނާޔަތްތައް ލިބޭނޭމަގުފަހިކޮށްދޭނޭކަމަށެވެ.

މިގޮތުން އަންނަ ރަމަޟާންމަހުން ފެށިގެން އަންހެނުން ކޮމިޓީގެ މެމްބަރުންނަށް ރޯދަ އިނާޔަތް ދޭން ފަށާނޭކަން ރައީސް ވިދާޅުވިއެވެ. ރައީސް ވިދާޅުވީ، މި ސަރުކާރުން ރާއްޖޭގެ އިގްތިސާދު ރަނގަޅުކުރުމަށް ފިޔަވަޅުތައް އަޅަމުންދަނީ، ރައްޔިތުންނަށް ދެމުންގެންދާ އެއްވެސް އެއްޗެއް އުނި ނުކުރާނޭކަމަށެވެ. އަދި ފައިސާވެސް ޗާޕު ނުކުރާނޭކަމަށް ރައިސް ވިދާޅުވިއެވެ.