ރާއްޖެ ބޮއިކޮޓް ކުރަން ގޮވާލި ޑޭވިޑް ހާޑިންހަމް ޓުއަރިޒަމް ޕޮރޮމޯޓްކުރުމުގެ ކެމްޕެއިންއަށް ރާއްޖޭގައި

ރާއްޖެ ބޮއިކޮޓް ކުރަން ގޮވާލި ޑޭވިޑް ހާޑިންހަމް ރާއްޖޭގެ ޓުއަރިޒަމް ޕްރޮމޯޓް ކުރުމަށް ރާއްޖޭގައި ކެންޕެއިންފަށައިގެން ހަރަކާތްތެރިވާން ފަށައިފިއެވެ.

ޑޭވިޑް އަކީ ރައީސް މައުމޫން ސަރުކާރުގައި ކްރިސްޓިއަން ދީން ފަތުރަން މަސައްކަތް ކޮށްފައިވާތީ ރާއްޖެއިން ޑީޕޯޓްވެސް ކޮށްފައިވާ މީހެކެވެ. އޭގެ ފަހުން އޭނާ ފެނިފައިވަނީ ރާއްޖޭގެ ޓުއަރިޒަމް ބޮއިކޮޓް ކުރުމުގައި އިސްސަފުގައި ހަރަކާތްތެރިވަމުން އަންނަ ފަރާތެއް ގޮތުގައެވެ.

ޑޭވިޑް ހާޑިންހަމްޓީމުން ހިންގާ މި ކެންޕެއިންގައި އެއްފަހަރާ ބޭނުންކޮށްފައި އުކާލާ ޕްލާސްޓިކާ ބެހޭ ގޮތުން ހޭލުންތެރި ކުރުމަށް މުޅި ރާއްޖޭގައި ޕެރަމޯޓާރގައި ދަތުރުކުރުމަށް ވަނީ ނިންމާފައެވެ.

ވެހި ކުންފުންޏެއް ކަމުފަގައިވާ “ސްކައި ގައިސް” އިން އިންތިޒާމުކޮށްގެން ކުރިއަށް ގެންދާ މި ހަރަކާތުގައި ޕެރަމޯޓަރ ދުއްވާ 10 ޕައިލެޓުން ބައިވެރިވެއެވެ. އޭގެ ތެރޭގައި ބައިނަލް އަޤުވާމީ މުބާރާތްތަކުން ރަން ވަނަތައް ހޯދާފައިވާ ޕައިލެޓުން ހިމެނެއެވެ.

ސްކައި ގައިސްގެ މެނޭޖިން ޑިރެކްޓަރ ޖާވިދު ހުސެއިން ވިދާޅުވީ މި އިވެންޓުގެ މައިގަނޑު މަޤުސަދަކީ “އެވެއާނެސް އެގެއިންސްޓް ސިންގްލް ޔޫސްޑް ޕްލާސްޓިކް” ނުވަތަ އެއްފަހަރާ ބޭނުންކޮށްފައި އުކާލާ ޕްލާސްޓިކާ ބެހޭ ގޮތުން ހޭލުންތެރި ކުރުމެވެ. ޖާވީދު ވިދާޅުވި ގޮތުގައި މި އިވެންޓްގައި ޓީމުން ލޭންޑް ކުރާ ކޮންމެ ރަށެއްގެ ގޮނޑުދޮށުގައި ދިރާގުން ފޯރުކޮށްދޭ ރިސައިކަލް ބޭގް ތަކެއް ބެހުމާއި ހޭލުންތެރި ކުރުމުގެ ޕްރޮގްރާމްތައް ހިންގުން ކުރިއަށް ދާނެއެވެ.

ޖާވީދު އިތުރަށް ވިދާޅުވީ މި ދަތުރުގެ އަނެއް ބޭނުމަކީ ގެސްޓް ހައުސް ވިޔަފާރި ޕްރޮމޯޓު ކުރުމާއި ރާއްޖޭގައި އެޑްވެންޗަރަސް ޓޫރިޒަމް ޕްރޮމީޓު ކުރުމެވެ. މި ދަތުރުގައި ޓޫރިޒަމް ޕްރޮމޯޓު ކުރުމަށް ޑޮކިއުމެންޓްރީއެއް ތައްޔާރުވެގެން ދާނެކަމަށް ޖާވިދު މަޢުލޫމާތު ދެއްވިއެވެ.

500 ފޫޓާއި 1000 ފޫޓާ ދެމެދުގެ އުސްމިނެއްގައި އުދުހޭ މި ޓީމުން ހއ.ތުރާކުނުން ފަށައިގެން އައްޑުއާ ހަމައަށް ދަތުރުކުރާ އިރު ރާއްޖޭގެ 24 ރަށަކަށް ދިއުމަށް ނިންމާފައިވެއެވެ.