ކޮމިޝަނަރު އޮފް ޕޮލިސްގެ މަގާމަށް ހުޅުވާލައިފި
ލިޔުންތެރިޔާ
އަހުމަދު ހަމީދު އާދަމް
ކޮމިޝަނަރު އޮފް ޕޮލިސްގެ މަގާމަށް ހުޅުވާލައިފި އެވެ
ހޯމް މިނިސްޓްރީން ކުރި އިއުލާނެއްގައި ބުނެފައި ވަނީ ކޮމިޝަނަރު އޮފް ޕޮލިސްގެ މަގާމަށް ޝައުގުވެރިވާ ބޭފުޅުން އަންނަ މަހުގެ ދެވަނަ ދުވަހުގެ 12:00 ގެ ކުރިން އެކަމަށް އެދި ހުށަހެޅުމަށް އެދޭ ކަމަށެވެ.
ކޮމިޝަނާ އޮފް ޕޮލިސްގެ މަގާމަށް ކުރިމަތިލެވޭނީ އެސިސްޓަންޓް ކޮމިޝަނާ އޮފް ޕޮލިސް ރޭންކުން މަތީ ރޭންކުތަކުގެ އޮފިސަރުންނަށެވެ. އެ މަގާމަށް ބޭފުޅަކު ކަނޑައަޅުއްވާނީ، މަގާމަށް ކުރިމަތިލައްވާ އޮފިސަރުންގެ ފެންވަރު ވަޒަންކުރުމަށްފަހު، ނުވަތަ އިންޓަވިއު ކުރުމަށް ފަހު ހޯމް މިނިސްޓަރުގެ ލަފާގެ މަތިން، ރައީސުލްޖުމްހޫރިއްޔާ އެވެ.
ކޮމިޝަނަރު އޮފް ޕޮލިސްގެ މަގާމު ހުސްވީ އެ މަގާމުގައި ކުރީން ހުންނެވި އަލީ ޝުޖާއު އިސްތިއުފާ ދެއްވުމުންނެވެ. މިދިޔަ މަހުގެ 26 ވަނަ ދުވަހު މަގާމުން އިސްތިއުފާ ދެއްވި ސީޕީ އަލީ ޝުޖާއު, ޝަރަފުވެރިކަމާ އެކު ރިޓަޔާ ކުރެއްވުމުގެ ރަސްމިއްޔާތު ބާއްވާފައި ވަނީ މެއި މަހުގެ ހަތްވަނަ ދުވަހު އެވެ.
ސީޕީ ޝުޖާއު ފުލުހުންގެ ހިދުމަތާ ގުޅިވަޑައިގަތީ 2006 ވަނަ އަހަރުގެ ސެޕްޓެމްބަރު މަހު އެވެ. ފުލުހުންގެ ހިދުމަތާ ގުޅިވަޑައިގަތުމުގެ ކުރިން ތައުލީމީ ދާއިރާއަށް އަށް އަހަރު ދުވަހު ހިދުމަތް ކުރައްވާފައިވެ އެވެ.
ދިވެހި ފުލުހުންގެ ހިދުމަތުގެ ރޭންކުތަކުގެ ތެރެއިން ކޮމިޝަންޑު ރޭންކަށް ކޮމިޝަނާ އަލީ ޝުޖާއު އިސްކުރެވުނީ 2008 ވަނަ އަހަރު އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
