ރާއްޖޭގެ އާބާދީގެ ކޮންމެ 3 މީހުންގެ ތެރެއިން އެކަކީ ބިދޭސީއެއް

ރާއްޖޭގައި ދިރިއުޅެމުންދާ ބިދޭސީންގެ އާބާދީ ވަރަށްބޮޑަށް އިތުރުވެގެން ގޮސްފައިވާކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސްހިސާބުތަކުން ދައްކައިފިއެވެ.

ދުނިޔޭގެ އާބާދީ ދުވަހު ތަފާސްހިސާބާ ބެހޭ އިދާރާއިން ނެރެފައިވާ ތަފާސްހިސާބުތަކުގައި ވާގޮތުން މިހާރު ރާއްޖޭގެ އާބާދީގެ ކޮންމެ ތިން މީހަކުން އެކަކީ ބިދޭސީއެކެވެ. ތަފާސްހިސާބުތަކަށް ބަލާއިރު އަންދާޒާކުރެވޭ ރާއްޖޭގެ ޖުމްލަ އާބާދީ 590،079 ގައި ހުރިއިރު، ބިދޭސީންގެ އަދަދަކީ 215،911 އެވެ.

ބިދޭސީންގެ އާބާދީއަށް ބަލާއިރު، ބިދޭސީންގެ އަންހެނުންގެ އަދަދާއި ފިރިހެނުންގެ އަދަދު ވަރަށްބޮޑު ފަރަގެއް ހުރިކަން ފާހަގަކޮށްލެވެއެވެ. އެގޮތުން ރާއްޖޭގައި އެންމެގިނައިން އުޅެނީ ފިރިހެނުންނެވެ. ފިރިހެނުންގެ އަދަދު 174،005 ގައި އުޅޭއިރު އަންހެނުންގެ އަދަދަކީ 22،019 އެވެ.

ތަފާސްހިސާބަށް ބަލާއިރު، ރާއްޖޭގައި ދިރިއުޅޭ ފިރިހެނުންގެ 47 އިންސައްތައަކީ ބިދޭސީ ފިރިހެނުންނެވެ. ރާއްޖޭގައި ދިރިއުޅެމުންދާ ބިދޭސީންގެ އާބާދީގެ އެންމެބޮޑު އިންސައްތައެއް ދިރިއުޅެނީ މާލޭގައެވެ. އެގޮތުން މަސައްކަތްކުރާ އުމުރުފުރާގެ އެންމެ ގިނަ މީހުންނަކީވެސް ބިދޭސީންނެވެ. މީގެ އިތުރުން ސިނާއީ މަސައްކަތްކުރާ ރަށްރަށުގައިވެސް ދިވެހިންނަށްވުރެ ބިދޭސީން ގިނަކަމަށް ތަފާސްހިސާބުތަކުން ދައްކައެވެ.

ނުރަސްމީ ތަފާސްހިސާބުތަކުން ދައްކާގޮތުގައި ރާއްޖޭގައި ގިނައިން ދިރިއުޅެނީ ބަންގްލަދޭޝްއަށް ނިސްބަތްވާ މީހުންނެވެ. އޭގެއިތުރުން ދެން އެންމެގިނައީ އިންޑިއާ، ސްރީލަންކާ މީހުންނެވެ. މީގެ އިތުރުން ނޭޕާލް، ފިލިޕީންސް ފަދަ ޤައުމުތަކުގެ މީހުން މަސައްކަތްކުރާ އަދަދު އިތުރުވަމުން އަންނަކަން ފާަހަގަކޮށްލެވެއެވެ.