ލަފާކުރެވެނީ މި އަހަރު ނިމޭއިރު ގޯތި ލިބިފައިވާ ހުރިހާ ފަރާތަކަށް ގޯތިތައް ހަވާލުކޮށް ނިމޭނެކަމަށް: ޑރ. ހައިދަރު

މި ހިނގަމުންދާ 2024 ވަނަ އަހަރު ނިމޭއިރު، ކުރީ ސަރުކާރުން ހިންގި ބިންވެރިޔާ ސްކީމްގެ ދަށުން ގޯތި ލިބިފައިވާ ހުރިހާ ފަރާތްތަކަށް ގޯތި ހަވާލު ކުރެވޭނެ ކަމަށް ގެދޮރުވެރިކަމާއި ބެހޭ ވުޒާރާގެ ވަޒީރު ޑރ އަލީ ހައިދަރު އަހުމަދު ރޭ ވިދާޅުވެއްޖެއެވެ.

ވީޓީވީގެ ފަސްމަންޒަރު ޕްރޮގްރާމްގައި ވާހަކަ ދައްކަވަމުން ހައިދަރު ވިދާޅުވީ، މިސަރުކާރު ވެރިކަމަށް އައި އިރު، ހުޅުމާލެ އާއި، ގިރާވަރު ފަޅާއި، ގުޅިފަޅުން ވަރަށް ގިނަ ގޯތިތައް ދެވިފައިވާ ކަމަށެވެ. އަދި އެ ގޯތިތައް ދީފައިވަނީ އެ ސަރަހައްދު ތަކަށް “އެކަށީގެންވާ ވަރަށް ވުރެވެސް ގިނައިން” ކަމަށް ވަޒީރު ވިދާޅުވިއެވެ.

އޭރު ހަދާފައި އޮތީ، އާބަން ޕްލޭނިންގ މިން ގަޑަކުން ބަލާއިރު އެކަށިގެންވާ ޕްލޭންތަކެއް ނޫން. ހަމަ ގޮޅިތަކެއް ޖަހާލާފައި ގޯތި ދީފައި އޮތީ އިނގޭތޯ. މިސަރުކާރުން އައީ ހުޅުމާލެ، ގުޅިފަޅު އަދި ގިރާވަރަށްވެސް ވަކި ތަސައްވަރު ތަކަކާއެކު. އެކަމަކު އެ ޕްލޭން ތަންފީޒުކުރަން ވަރަށް އުނދަގޫވި ހުރިހާ ފަރާތަކަށް (އެގޮތަށް) ގޯތި ދޫކޮށްފައި ހުރުމުން. ދެން ގޯތި ދޫކުރާނަން. ރައީސް ވައުދުވެވަޑައިގެންފައި އޮތީ އެ ދޫކުރި ސަރަހައްދުން ގޯތި ދޫކުރާނެ ކަމަށް. އެކަންތައް ކުރާނަން އަޅުގަނޑުމެން

ޑރ ޢަލީ ހައިދަރު އަހުމަދު

ހައިދަރު ވިދާޅުވީ މިހާރުވެސް ހުޅުމާލެއިން ގޯތިތައް ދޫކުރެވެމުންދާ ކަމަށާ، ގުޅިފަޅާއި ގިރާވަރު ފަޅުންގެވެސް ހިއްކާ ނިމިފައި ހުރި ސަރަހައްދު ތަކުން ވަރަށް އަވަހަށް ގޯތިތައް ދޫކުރަން ފަށާނެ ކަމަށެވެ. އަދި އެ ހުރިހާ ސަރަހައްދެއް ހިއްކައި ނިންމައި، މިއަހަރު ނިމޭއިރު ގޯތި ލިބުނު ހުރިހާ ފަރާތްތަކަށް ގޯތި ހަވާލު ކުރެވޭނެ ކަމަށް އޭނާ ވިދާޅުވިއެވެ.

ހުރިހާ ފަރާތްތަކަށް ދެވޭނެ ކަމަށް އަޅުގަނޑަށް ފެންނަނީ ހުރިހާ ބިމެއްވެސް ހިކި ނިމުނީމަ. މިހާރު އެދަނީ މަސައްކަތް ކުރަމުން ހުޅުމާލޭ ފޭސް 3 އާއި، ގިރާވަރުފަޅާ ހިއްކަމުން. އެހެން ނަމަވެސް ގުޅީފަޅުގައި ދެން ހިއްކަން އޮތީ ވަރަށް ފުން ސަރަހައްދަކަށްވާތީ އެކަން ފަށައި ނުގަނެވިގެން މިއުޅެނީ. އެހެން ނަމަވެސް ވަރަށް އަވަހަށް ފެށިގެން އިރާދަކުރެއްވިއްޔާ މި އަހަރު ތެރޭގައި އެ މަސައްކަތް ނިންމާ ހުރިހާ އެންމެނަށް ހަވާލު ކުރެވޭނެ ކަމަށް އަޅުގަނޑު ކުރަނީ

ޑރ ޢަލީ ހައިދަރު އަހުމަދު

މީގެ އިތުރުން ހައިދަރު ވިދާޅުވީ، ގިރާވަރު ފަޅާއި ގުޅިފަޅު އަދި ހުޅުމާލޭ ފޭސް ތިނެއް ހިއްކުމުގެ މަސައްކަތްވެސް މަޑުޖެހިގެން ގޮސްފައިވަނީ މޫސުމީ ބައެއް ބަދަލުތަކާއި ގުޅިގެން ކަމަށެވެ. އެގޮތުން، ހޫނު ވުމުގެ ސަބަބުން މޫދުގައި ހުންނަ ގައު ހުދުވުމުގެ މައްސަލަ ކުރިމަތިވެފައިވާ ކަމަށާ، އެ ސަބަބާ ހުރެވެސް ބިންހިއްކުން މަޑު ޖައްސާލަން ޖެހުނު ކަމަށެވެ.