މިރޭގެ ސީދާ ހަރަކާތުގެ ތެރެއިން ހަ މީހަކު ހައްޔަރުކޮށްފި

ފަސް އަހަރުގެ ޖަލު ހުކުމެއް ތަންފީޒު ކުރަމުންދާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް، މިނިވަން ކުރުމަށް ގޮވައިލައި އިދިކޮޅު ފަރާތްތަކުން ކުރިޔަސް ގެންދާ ސީދާ ހަރަކާތުގެ ތެރެއިން މިހާތަނަށް ހަ މީހަކު ހައްޔަރުކޮށްފިއެވެ.

މިރޭގެ އެއްވުމުގައި އިދިކޮޅު ކޯލިޝަނުގެ ކައުންސިލުގެ ހަތަރު މެންބަރަކާއި ޕީޕީއެމްގެ ރެޖިސްޓްރާ މުހައްމަދު ލަމްއާނުގެ އިތުރުންދެން ހައްޔަރުކޮށްފައިވަނީ މުހައްމަދު ނަބީލު، ޝަހީދު އިބްރާހީމް، އަހުމަދު ހަމްދާނު، އަހުމަދު ނަރީޝް، އަދި އިތުރު އެކްޓިވިސްޓަކު ވަނީ ހައްޔަރުކޮށްފައެވެ.

އޭގެތެރެއިން ގިނަ މީހުން ހައްޔަރުކުރީ މަޖީދީ މަގާއި ޗާންދަނީމަގު ގުޅުނު ކަންމަތިން ކަމަށް ޕީޕީއެމްއިން ބުނެއެވެ.

މިރޭގެ އެއްވުމުގައި ހޯމް މިނިސްޓަރު އިމްރާން އަބްދުﷲ ދިރިއުޅުއްވާ ގެކޮޅު ކައިރިއަށް ބަޔަކު އެއްވެ މިނިސްޓަރުގެ އިސްތިއުފާ އަށް ގޮވާލާފައިވެއެވެ.

މިރޭވެސް ސީދާ ހަރަކާތަށް ނުކުތުމުގެ ކުރިން ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، ހަރަކާތުގެ ތެރެއިން ހައްޔަރުކުރާ މީހުންނަށް ކޯލިޝަނުގެ ފަރާތުން ގާނޫނީ އެހީތެރިކަން ފޯރުކޮށްދޭނެ ކަމަށެވެ.

ރޭގެ މުޒާހަރާގައި ވެސް ފަސް މީހަކު ހައްޔަރުކޮށްފައިވެއެވެ. އެމީހުން ރޭ 3:30 ގައި ވަނީ ދޫކޮށްލާފައެވެ.