ޗައިނާ ސަރުކާރުން ގުރައިދޫއަށް 100 ސޯލާ މަގުބައްތި ހަދިޔާކޮށްފި
ޗައިނާ ސަފީރުގެ ހާއްސަ އިސްނެންގެވުމުގެ މަތިން، ޗައިނާ ސަރުކާރުން ކ.ގުރައިދޫ ކައުންސިލަށް 100 ސޯލާ މަގުބައްތި ހަދިޔާ ކޮށްފިއެވެ.
މިކަމަށްޓަކައި ސްޓެލްކޯގެ 5 ވަނަ ފަންގިފިލާގެ އޮޑިޓޯރިއަމްގައި ބޭއްވި ރަސްމިއްޔާތުގައި ޗައިނާ ސަރުކާރުގެ ފަރާތުން މަގު ބައްތިތައް ހަވާލުކޮށްދެއްވީ، ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ވާންގ ލިޒިންއެވެ. ދިވެހި ސަރުކާރުގެ ފަރާތުން މި ތަކެއްޗާ ޙަވާލުވެވަޑައިގަތީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރެވެ.
މިކަމާއި ގުޅޭގޮތުން ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން ބުނީ، ޗައިނާ ސަރުކާރުގެ ފަރާތުން ރާއްޖެއަށް ހަދިޔާކުރި މި މަގު ބައްތިތަކަކީ، ޗައިނާ ސަފީރު ކ.ގުރައިދޫއަށް ކުރި ޒިޔާރަތެއްގެ ތެރެއިން ހަމަޖެހިގެން ދިޔަ މަގުބައްތިތަކެއްކަމަށެވެ.
މި ބައްތިތައް ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ސަފީރު ވާންގ ލިޒިން ވިދާޅުވީ، ގުރައިދޫއަށް ފޯރުކޮށްދޭ މަގުބައްތި އެހީއަކީ ދެ ޤައުމުގެ ވެރިން ބައްދަލުވެ ގުޅުން އިތުރަށް ބަދަހިކުރުމަށް ނިންމަވައި ކުރެއްވި މަޝްވަރާތަކުގެ އަލީގައި ކުރެވޭ މަސައްކަތެއްކަމަށެވެ.
"ގުރައިދޫއަށް ފޯރުކޮށްދޭ މަގުބައްތި އެހީއަކީ ވެސް، ދެ ޤައުމުގެ ވެރިން ބައްދަލުވެ ގުޅުން އިތުރަށް ބަދަހިކުރުމަށް ނިންމަވައި ކުރެއްވި މަޝްވަރާތަކުގެ އަލީގައި ކުރެވޭ މަސައްކަތެއް. ރައީސް ޑރ. މުޢިއްޒު ޗައިނާއަށް ކުރެއްވި ދަތުރުފުޅާއެކު ވަރަށް ގިނަ މި ފަދަ ކަންކަންކުރެވި ދެ ޤައުމުގެ ގުޅުން ވަނީ ބަދަހިކުރެވިފައި"
ސަފީރު ވާންގ ލިޒިން ވިދާޅުވިއެވެ.
މިގޮތުން ރާއްޖެއާއި ޗައިނާއާ ދެމެދު އޮތީ ޒަމާންވީ ގުޅުމެއްކަމަށާއި ޗައިނާއިން އަބަދުވެސް މަސައްކަތްކުރާނީ ދިވެހީންނަށް ބޭނުންވާ ލުއިފަސޭހަ ގޮތްތައް ހޯދައިދިނުމަށް ކަމަށް ސަފީރު ވިދާޅުވިއެވެ.
ރާއްޖޭގެ އިގްތިސާދީ އަދި އުމްރާނީ ތަރައްޤީގައި ޗައިނާއަކީ މުހިއްމު ބައިވެރިއެކެވެ. ޗައިނާއިން ވަނީ ރާއްޖޭގެ އުމްރާނީ ތަރައްޤީގެ ކުރިއެރުމަށް އެކިގޮތްގޮތުން އެހީތެރިކަން ދީފައެވެ. މިގޮތުން ޗައިނާ މޯލްޑިވްސް ފްރެންޑްޝިޕް ބްރިޖާއި، ހައްދުންމަތީ މަގުހެދުމުގެ އިތުރުން ބޯހިޔާވަހިކަމުގެ ގިނަ މަޝްރޫޢުތަކަށް ޗައިނާ ސަރުކާރުގެ އެހީތެރިކަން ވަރަށްބޮޑަށް ލިބިގެންގޮސްފައިވާކަމަށް ސަރުކާރުން ފާހަގަކުރެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
