ފޭސް ދޭއް ހިތިގަސްމަގުގައި ކާރަކާއި ސައިކަލެއްޖެހި ނުރައްކާތެރި އެކްސިޑެންޓެއް ހިނގައިފި

ހުޅުމާލެ ފޭސް ދޭއް، ވިނަރެސް ޓަވަރުތައް ހުންނަ ހިތިގަސްމަގުގައި ކާރަކާއި ސައިކަލެއްޖެހި ނުރައްކާތެރި އެކްސިޑެންޓެއް ހިނގައިފިއެވެ.

މި އެކްސިޑެންޓްގައި ހިނގާފައިވަނީ ހިތިގަސްމަގު ވިނަރެސް 6 ވަނަ ޓަވަރުކައިރީ ހިޔާކޮޅަށް ދާން އޮންނަ ލޭނުގައި ކާރަކާ ސައިކަލެއް ޖެހިގެންނެވެ.

މި އެކްސިޑެންޓްގައި ސައިކަލްގައި އިން އަންހެންމީހާ ވަނީ އިމަޖެންސީގައި އެމްބިއުލާންސެއް ގެނެސް ހޮސްޕިޓަލަށް ގެންގޮސްފައެވެ. އޭނާއަށް ލިބުނު ގެއްލުންތައް ސީދާ ބޭރުފުޅުން ނޭނގުނަސް ހަށިގަނޑުގެ ބައެއް ތަންތަން ވަނީ މަށައިގެން ގޮސްފައެވެ. އަދި ސައިކަލްގައި އިން ފިރިހެން މީހާއަށް މާބޮޑު ގެއްލުންތަކެއް ނުލިބުނު ނަމަވެސް އޭނާގެ އަތުގެ އެކި ތަންތަން ވަނީ މަށައިގެން ގޮސްފައިވާކަމަށް އެ ސަރަހައްދުގައި ހުރި ވޮއިސްގެ ނޫސްވެރިޔާ ބުންޏެވެ.

އެކްސިޑެންޓް ހިނގިތާ ކުޑަ ވަގުތުކޮޅެއްގެ ތެރޭގައި ފުލުހުން އައިސް، ކަމާ ގުޅޭ ފަރާތްތަކާ ވަނީ ސުވާލުކޮށްފައެވެ. ހުޅުމާލޭގެ އެ މަގަކީ ވަރަށްގިނައިން އެކްސިޑެންޓްތައް ހިނގަމުން އަންނަ މަގެކެވެ. މީގެ ކުރިން އެ މަގުގައި ވަރަށް ނުރައްކާތެރި އެކްސިޑެންޓްތައް ވަނީ ހިނގާފައެވެ. މީގެ ތެރެއިން ބައެއް އެކްސިޑެންޓްތަކުގައި މީހުން ނުކުޅެދޭ ހާލަތަށް ދިޔައިރު، ބައެއް އެކްސިޑެންޓްތަކުގައި މީހުންގެ ފުރާނަ ގެއްލިފައި އެބަހުއްޓެވެ.

ހުޅުމާލޭގެ މައި މަގުތަކުގައި އެކްސިޑެންޓްތައް ހިނގާލެއް އިތުރުވަމުން އަންނާތީވެ، އެކަން މަދުކުރުމަށް ފުލުހުން އަންނަނީ މަގުތަކުގައި ބަމްޕަރު ހަރުކުރަމުންނެވެ. އެގޮތުން ފޭސް ދޭއްގެ ނިރޮޅުމަގުގައި މިހާރު ވަނީ ބަމްޕަރުތައް ހަރުކޮށްފައެވެ.