މާލެ ސިޓީގެ މޭޔަރު ކަމަށް އާޒިމް އިންތިޚާބު ވެވަޑައިގެންފި

މާލޭ ސިޓީގެ މޭޔަރު ކަމުގެ ގޮނޑި ބޮޑު ތަފާތަކުން އިދިކޮޅު އެމްޑީޕީގެ ކެނޑިޑޭޓް އާދަމް އާޒިމް ކާމިޔާބު ކުރައްވައިފިއެވެ.

މިއަދު ބޭއްވުނު މާލޭ ސިޓީ ކައުންސިލަށް މޭޔަރަކު ހޮވުމާއި، ކައުންސިލްގެ ގެ ހުސްވެފައިވާ ގޮނޑިތަކަށް މެންބަރުން ހޮވުމަށް ބޭއްވި މި އިންތިހާބުގައި މޭޔަރުކަން އާޒިމް ކާމިޔާބު ކުރައްވާފައި މިވަނީ 3،529 ވޯޓާއެކު އެވެ. މިއީ ވޯޓްލީ މީހުންގެ ނިސްބަތަށް ބަލާއިރު 46 އިންސައްތަ ވޯޓެވެ.

އާޒިމްއާއި އެންމެ ކައިރިން ދެން ވާދަކުރެއްވި ޕީއެންސީގެ ކެނޑިޑޭޓް އާޒިމާ ޝަކޫރަށް ލިބިވަޑައިގަތީ 2،167 ވޯޓާއެކު ޖުމްލަ ވޯޓުގެ 27 އިންސައްތަ ކަމަށް އިއުލާން ކޮށްފައިވާ ނަތީޖާއިން ދައްކައެވެ.

މި އިންތިހާބުގައި ދަ ޑިމޮކްރެޓްސް ގެ ފަރާތުން ވާދަކުރެއްވި ސައިފް ފާތިހް އަށް ލިބުނީ 1،634 ވޯޓެވެ.ކުރީގެ ކޮމިޝަނަރ އޮފް ޕޮލިސް ހުސެއިން ވަހީދަށް 1،326 ވޯޓު ލިބުނުއިރު، އަމިއްލަ ގޮތުން ވާދަކުރާ ޝުއައިބު އަލީ އަށް ލިބިފައިވަނީ 91 ވޯޓެވެ.

މި އަހަރުގެ މާލޭ ސިޓީ ކައުންސިލްގެ ހުސްވެފައިވާ މަގާމުތަކަށް މީހުން ހޮވުމަށް ބޭއްވި އިންތިހާބަކީ ވަރަށް މަދު ބަޔަކު ވޯޓު ލާން ދިޔަ އިންތިހާބެއް ކަން ފާހަގަކޮށްލެވެއެވެ. މިގޮތުން ވޯޓު ލުމުގެ ހައްގު ލިބިފައިވާ ފަރާތްތަކުގެ ތެރެއިން ވޯޓް ލީ ކަމަށް ބެލެވެނީ 40 އިންސައްތަ ކަމަށް އިލެކްޝަން ކޮމިޝަން (އީސީ) އިން ވަނީ ބުނެފައެވެ.

މާލޭގެ މޭޔަރުގެ ގޮނޑި ހުސްވީ އެ މަގާމުގައި ހުންނެވި ރައީސް ޑރ. މުހައްމަދު މުއިއްޒު ރާއްޖޭގެ ރައީސުލްޖުމްހޫރިއްޔާ ކަމަށް އިންތިހާބު ވެވަޑައިގަތުމުންނެވެ. އަދި ސިޓީ ކައުންސިލްގެ ތިން ގޮނޑި ހުސްވީ އެ މަގާމުތަކުގައި ތިއްބެވި ބޭފުޅުން ސަރުކާރުގެ މަގާމުތަކަށް ވަޑައިގަތުމުންނެވެ.