ރޯދައިގެ ކުރިން މަސްވެރިންގެ ފައިސާ ދިނުމަށް މަސައްކަތްޕުޅު ކުރައްވާކަމަށް ރައީސް ޑރ.މުއިއްޒު ވިދާޅުވެއްޖެ

މަސްވެރިންނަށް ސަރުކާރުން ދޫކުރަންޖެހޭ ފައިސާގެ ތެރެއިން ބާކީ ނުދެވި ހުރި ފައިސާ، ކުރިއަށް އޮތް ރަމަޟާން މަހުގެ ކުރިން ދިނުމަށް މަސައްކަތްޕުޅު ކުރައްވަމުން އަންނަ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެެއެވެ.

ރ.ދުވާފަރު ރައްޔިތުންނާއި ބައްދަލުކުރައްވާ، ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ފިޝަރީޒް މިނިސްޓްރީ އާއި ސަރުކާރުގެ ބޮޑު ކުންފުންޏެއް އެކީގައި މަސައްކަތްކޮށްގެން، މަސްވެރިންގެ ފައިސާ ހަމަޖައްސަމުން އަންނަ ކަމަށެވެ.

"ރޯދަ މަސް އަންނަންވާ އިރަށް މި ބަލަނީ ކޮންމެވެސް ފައިނޭންސް މެކޭނިޒަމެއް ހަމަޖައްސަން. އެ މަސައްކަތް އެބަކުރަން މިހާރު. ފިޝަރީޒް މިނިސްޓްރީ އާއި ސަރުކާރުގެ ބޮޑު ކުންފުންޏެއް އެކީގައި މަސައްކަތްކޮށްގެން، ގާނޫނީ އުސޫލުތަކުގެ ތެރެއިން އަޅުގަނޑު މި ބަލަނީ ފައިސާ ހަމަޖައްސަން."

ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު ވިދާޅުވީ، މަސްވެރިންނަށް ދޫކުރަންޖެހޭ ފައިސާ ދޫކުރުމަށްފަހު ދެން އެމަނިކުފާނު ވައުދުވެވަޑައިގެންނެވި ފަދައިން 48 ގަޑި އިރު ތެރޭގައި، މަސްވެރިން ބާނާ މަހަށް ފައިސާ ދޫކުރާނެ ކަމަށާއި، މިހާތަނަށް އެކަން ހާސިލުވެފައި ނުވަނީ، އަދިވެސް ބެކް ލޮގްގައި އުޅެން ޖެހޭތީ ކަމަށެވެ.

ރައީސް މުއިއްޒު ވިދާޅުވީ މި ސަރުކާރު މިހާތަނަށް މަސްވެރިންނަށް 600 މިލިއަނެއްހާ ރުފިޔާ ދީފައިވާ ކަމަށާއި، މި ސަރުކާރު ވެރިކަމާއި ހަވާލުވިި އިރު މަސްވެރިންނަށް ނުދީ އޮތް 230 މިލިއަން ރުފިޔާ މި ސަރުކާރުން ދީ އޭގެ އިތުރުން ވެސް 400 މިލިއަން ރުފިޔާ މިހާތަނަށް މަސްވެރިންނަށް ދީފައިވާނެ ކަމަށެވެ.

ސަރުކާރު މަސްވެރިންނަށް ދޫކުރަން ޖެހޭ ފައިސާގެ ތެރެއިން، މިދިޔަ އަހަރުގެ ނޮވެންބަރު މަހުގެ 17 ވަނަ ދުވަހުން ފެށިގެން، މިދިޔަ މަހުގެ 26 އާއި ހިސާބަށް  މިހާތަނަށް ޖުމްލަ 561 މިލިއަން ރުފިޔާ މަސްވެރިންނަށް ދޫކުރެވިފައިވާނެ ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވެސް ވަނީ ހާމަކޮށްފައެވެ.