ހަލާލު ޓޫރިޒަމަށް ފަސް އަތޮޅަކުން ރަށްތަކެއް ޚާއްސަ ކުރަނީ

ފަސް އަތޮޅަކުން ހަލާލް ޓޫރިޒަމަށް ހާއްސަކޮށް ރަށްތަކެއް ކަނޑައަޅަން ޓޫރިޒަމް މިނިސްޓްރީން ނިންމައިފި އެވެ.

ޓޫރިޒަމް މިނިސްޓްރީން މިއަދު ބުނީ ފަތުރުވެރިކަން ތަރައްގީވެފައިނުވާ އަތޮޅުތަކުގައި ފަތުރުވެރިކަން ފުޅާކުރެއްވުމަށް ރައީސް މުއިއްޒު ވެވަޑައިގެންފައިވާ ވައުދުފުޅުގެ ދަށުން ރާއްޖޭގެ ފަސް ސަރަހައްދެއްގައި ހަލާލު ޓޫރިޒަމް ތަރައްގީ ކުރެއްވުމަށް ނިންމާފައިވާ ކަމަށެވެ.

މި ނިންމުމާއެކު ރާއްޖޭގެ ފަތުރުވެރިކަމުގެ ސިނާއަތަށް އާ ދޮރެއް ހުޅުވިގެންދާނެ ކަމަށް ވެސް ބުންޏެވެ.

ހަލާލު ޓޫރިޒަމަކީ ހާއްސަކޮށް މުސްލިމުން ފަތުރުވެރީންގެ ބޭނުންތަކަށް ރިއަޔަތްކޮށް އެހެން ހުރިހާ މެހެމާނުންނަށް ވެސް މެހެމާންދާރީ އަދާކުރެވޭ ގޮތަށް ފަރުމާ ކުރެވިފައިވާ ހިދުމަތެއް ކަމަށް ބުންޏެވެ. އަދި ބުނީ މި ކޮންސެޕްޓް ތަންފީޒު ކުރެވިގެން ދާނީ ރިސޯޓް ތަަރައްޤީ ކުރެވޭ މަރުހަލާގެ ތެރެއިންނާއި ރިސޯޓް އޮޕަރޭޝަންސް މަރުހަލާގައި ކަމަށެވެ.

މިނިސްޓްރީން ބުނި ގޮތުގައި ހަލާލު ޓޫރިޒަމަށް ރާއްޖޭގެ ފަސް ސަރަހައްދަކުން ކަނޑައެޅޭ ރަށްތަކެއް ފަތުރުވެރިކަމަށް ހުޅުވާލާނެ އެވެ. އަދި ހަލާލު ޓޫރިޒަމް ކޮންސްޕެޓަށް ތަރައްގީކޮށް ހިންގުމަށް ޝައުގުވެރިވާ އިންވެސްޓަރުންނަށް ދޭނެ ލުއިތައްވެސް ވަނީ އާންމުކޮށްފަ އެވެ.

* ލީސް އެކުއިޒިޝަން ކޯސްޓް އިތުރު 20 އިންސައްތަ ދަށްކުރުން,

* ލީސް އެކުއިޒިޝަން ބަހާލައިގެން ދެއްކޭނެ މަގު ފަހި ކުރުން. މި ގޮތުން ރިސޯޓް ތަރައްޤީ ކުރުމަށް ދެވޭ މުއްދަތުގެ ތެރޭގައި ލީސް އެކުއިޒިޝަން 6 ވަނަ އަދި 6 ވަނަ އަހަރުގެ ފުރަތަމަ ކުއާޓާގައި ދައްކާ ގޮތަށް ހަމަޖެއްސުން,

* ރިސޯޓް ތަރައްޤީ ކުރުމަށް ދީފައިވާ މުއްދަތު (ގްރޭސް ޕީރިއަޑް) ގެ ކުރީން ރަށް ނުވަތަ ފަޅު އޮޕަރޭޓް ކުރެވޭ ޙާލަތުގައި އެ ދުވަހުން ފެށިގެން ގްރޭސް ޕީރިއަޑްގެ ބާކީ އޮތް މުއްދަތަށް އަރާ ބިމު ކުލި ފަސްކޮށްދިނުމުގެ ބަދަލުގައި އެއްކޮށް މަޢާފުކޮށް ދިނުން,

މީގެ އިތުރުން ރިސޯޓެއް ތަރައްގީ ކުރުމަށް ގެންނަ ތަކެއްޗަށް 20 އިންސައްތަ އާ ހަމައަށް ޑިއުޓީ މައާފުކޮށް ދޭނެ އެވެ. އަދި ތަންތަން ތަރައްގީ ކުރުމަށް ގެންނަ ފަރުނީޗަރާއި ކިޗަން އެޕްލައިސްސް އާއި އިލެކްޓްރޯނިކް އަދި އެހެނިހެން އެމެނިޓީސް ޑިއުޓީ މައާފުކޮށް ކެޓަގަރީއަށް އިތުރުކުރާނެ ކަމަށް މިނިސްޓްރީން ވަނީ ބުނެފަ އެވެ.