ރަށު އެކްސްޕޯ 2025 ގެ ވެނިއު ޕާޓްނަރަކަށް އެޗްޑީސީ

ދަ ޓްރެވަލް ގައިޒްއިން އިންތިޒާމްކޮށްގެން ބޭއްވުމަށް ތައްޔާރުވަމުންދާ "ރަށު އެކްސްޕޯ 2025" ގެ ވެނިއު ޕާޓްނަރަކަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ހަމަޖައްސައިފިއެވެ.

ދިވެހިރާއްޖޭގެ ފަތުރުވެރިކަމާއި، މުޖުތަމަޢުގެ ކުރިއެރުމަށާއި،  ރާއްޖޭގެ ވިޔަފާރިތައް ކުރިއެރުވުމަށް އެޗްޑީސީން ދޭ އެއްބާރުލުން ފާހަގަކޮށް ދަ ޓްރެވަލް ގައިޒް އިން ބުނީ، ހުޅުމާލޭގެ ސެންޓްރަލް ޕާކުގައި ބޭއްވުމަށް ހަމަޖެހިފައިވާ ރަށު އެކްސްޕޯ އަކީ ދިވެހިރާއްޖޭގެ އެކި ކަންކޮޅުތަކުގައި ހުރި ގެސްޓްހައުސްތަކުގެ ޚިދުމަތްތައް ދައްކުވައިދީ، ޚާއްޞަ ޕެކޭޖުތައް ސީދާ ރާއްޖޭގެ ރައްޔިތުންނަށް ވިއްކުމަށް ލިބޭނެ ހަރުދަނާ މަންސައެއްކަމަށެވެ. ހުޅުމާލޭ ސެންޓްރަލް ޕާކަކީ އެޗްޑީސީގެ ބެލުމުގެެލުމުގެ ދަށުގައިވާ ތަނަކަށްވުމާއެކު، މި ޕާޓްނާޝިޕްގެ ސަބަބުން ރާއްޖޭގެ ފަތުރުވެރިކަން ކުރިއެރުވުމަށް ރަނގަޅު ވެނިއުއެއް ލިބިގެންދާނެއެވެ.

ދަ ޓްރެވަލް ގައިޒް އިން ބުނި ގޮތުގައި  ފަސޭހައިން ވަދެވޭގޮތަށް ހުރުމާއި، މުޖުތަމަޢަށް އަމާޒުކޮށްގެން ފަރުމާކުރެވިފައިވާ ގޮތުން ސެންޓްރަލް ޕާކަކީ  ރާއްޖޭގެ ވިޔަފާރިތަކާއި ދިވެހި ދަތުރުވެރިންނާ ގުޅުން ބަދަހިކުރުމަށް ޚާއްޞަކުރެވިފައިވާ މިފަދަ އިވެންޓަކަށް އެންމެ އެކަށޭނަތަނެވެ.

މިކަމާއި ގުޅޭގޮތުން ވާހަކަފުޅު ދައްކަވަމުން ދަ ޓްރެވަލް ގައިޒްގެ ޑިރެކްޓަރ ޑރ. ޙުސައިން ސަނީ ޢުމަރު ވިދާޅުވީ، މި ޕާޓްނާޝިޕާއި މެދު ފަޚުރުވެރިވެލައްވާކަމަށާއި، އަމާޒަކީ އެޗްޑީސީގެ އެހީއާއިއެކު މިއީ ބައިވެރިވާ ފަރާތްތަކަށާއި ޒިޔާރަތްކުރާ ފަރާތްތަކަށް ފައިދާހުރި އެކްސްޕޯއަކަށް ހެދުންކަމަށެވެ.

"ރަށު އެކްސްޕޯ 2025" ބޭއްވުމަށް ހަމަޖެހިފައިވަނީ، އަންނަ ފެބުރުއަރީމަހުގެ 13 އިން 15 އަށް ހުޅުމާލޭ ސެންޓްރަލް ޕާކްގައެވެ. ރަށު އެކްސްޕޯއަކީ ދިވެހިރާއްޖޭގެ ރަށްތަކުގެ ރީތިކަމާއި ސަގާފަތާއި އެކިއެކި ހަރަކާތްތައް ދައްކުވައިދޭގޮތަށް ރާއްޖޭގައި ފުރަތަމަ ފަހަރަށް އިންތިޒާމުކުރާ މިބާވަތުގެ ފުރަތަމަ އެކްސްޕޯއެވެ.

"ރަށު އެކްސްޕޯ 2025"ގެ އިތުރު ޕާޓްނަރުންގެ ތެރޭގައި ޓޫރިޒަމް މިނިސްޓްރީ، މޯލްޑިވްސް މާކެޓީން ޕީއާރު ކޯޕަރޭޝަން، ފާހަގަކޮށްލެވެއެވެ. މި އެކްސްޕޯގެ މީޑިއާ ޕާޓްނަރަކީ ވޮއިސް އެވެ.