މިސްކިތްތައް މަރާމާތުކޮށް ބެލެހެއްޓުމާއި ގުޅޭގޮތުން ޑރ. ޝަހީމް، ޢާޒިމްއާއެކު މަޝްވަރާ ކޮށްފި!

މާލެ ސިޓީގެ އައު މޭޔަރު އާދަމް އާޒިމާއި އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ބައްދަލު ކުރައްވައިފިއެވެ.

އިސްލާމިކް މިނިސްޓްރީން ބުނީ މި ބައްދަލުވުމުގައި ދެބޭފުޅުން މާލެ ސިޓީގެ މިސްކިތްތައް ބެލެހެއްޓުމާ ބެހޭ ގޮތުން މަޝްވަރާކުރައްވާފައި ވާއިރު މިނިސްޓްރީން ކައުންސިލަށް ދެމުންދާ އެއްބާރުލުމާ ބެހޭ ގޮތުން ޚިޔާލު ބަދަލު ކުރެވުނު ކަމަށެވެ.

މީގެ އިތުރުންވެސް މިނިސްޓަރު ޑރ.ޝަހީމް ވަނީ ކުރިއަށް އޮތް ރަމަޟާން މަހުގެ ކުރިން މިސްކިތްތަކުގެ ހާލަތު ދެނެގަނެ، މިސްކިތްތަކަށް ބޭނުންވާ މަރާމާތުތައް ފެށުމުގެ ގޮތުން މިސްކިތްތައް ހުރި ހާލަތު ބަލައި، ބޭނުންވަނީ ކޮން މަރާމާތުތަކެއް ތޯ ބެލުމަށް ދެ ވުޒާރާއިން މާލެ ސިޓީގައި ހުރި މިސްކިތް ތަކަށް ޒިޔާރަތް ކުރުމަށް ވެސް މި ބައްދަލުވުމުގައި އަލި އަޅުއްވާ ލައްވާފައެވެ.

މާލެ ސިޓީގެ މޭޔަރު އާޒިމް ވަނީ މިސްކިތް ތަކާއި ބެހޭގޮތުން އެބޭފުޅާގެ ތަސައްވުރު މިނިސްޓަރ ޑރ.ޝަހީމް އާއި މި ބައްދަލުވުމުގެ ތެރެއިން ހިއްސާ ކުރައްވާފައެވެ. މީގެ ތެރޭގައި ސީދާ ސިޓީ ކައުންސިލުން މިސްކިތްތައް ބެލެހެއްޓުމާއި، މިސްކިތްތައް ބެލެހެއްޓުމަށް ހާއްސަކޮށްގެން މުވައްޒަފުން ވަޒީފާއަށް ނެގުމާއި، މިސްކިތްތައް ބެލެހެއްޓުމަށް މުއައްޒަފުން ނަގާއިރު، ދިވެހީންނަށް އިސްކަން ދިނުން ހިމެނެއެވެ.

މިބައްދަލުވުމުގައި މިނިސްޓަރ ޑރ.ޝަހީމް ވަނީ މާލެ ސިޓީގެ މޭޔަރު ކަމަށް ހޮވިވަޑައިގެންފައިވާތީ އާޒިމަށް މަރުހަބާ ވެސް ވިދާޅުވެފައެވެ. ދެވުޒާރާގެ އިސްވެރިންގެ މެދުގައި ކުރިއަށް ދިޔަ މި ބައްދަލުވުމަކީ ކާމިޔާބު ބައްދަލުވުމެއް ކަމަށް އިސްލާމިކް މިނިސްޓްރީން މައުލޫމާތުދެއެވެ.