ބިދޭސީން ލައްވާ ހަށިވިއްކުމުގެ ވިޔަފާރި ކުރުވާ ދިވެހިންނާ ދެކޮޅަށް ހިޔުމަން ޓްރެފިކިންގެ ތަހުގީގެއް ކޮށް ބޮޑު އަދަބުދެނީ!

ރާއްޖެ ގެންނަ ބިދޭސީންލައްވާ މަސާޖު ޕާލަރު ތަކުގައި ހަށިވިއްކުމުގެ ވިޔަފާރި ކުރުވާ ދިވެހިންނާ ދެކޮޅަށް ހިޔުމަށް ޓްރެފިކިންގ ގެ ތަހުގީގެއް ކުރުމާއެކު، އެމީހުން ޖޫރިމަނާކޮށް ޕާސްޕޯޓު ހިފަހައްޓާނެ ކަމަށް ދާޚިލީ ސަލާމަތާ ބެހޭ ވުޒާރާގެ ވަޒީރު ޢަލީ އިހުސާން ވިދާޅުވެއްޖެއެވެ.

ސިއްޙަތާއި ބެހޭ ވުޒާރާއާއި, އިގްތިޞާދީ ތަރައްގީއާ ބެހޭ ވުޒާރާއާއި، ދާޚިލީ ސަލާމަތާ ބެހޭ ވުޒާރާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި އިހުސާން ވިދާޅުވީ މީހުން ދިރިއުޅޭ އެއްވެސް ރަށެއްގައި މަސާޖު ޕާލާއެއް ހިންގުމަށް އެއްވެސް އިދާރާއަކުން ހުއްދައެއް ދެވިފައި ނުވާނެ ކަމަށެވެ. މަސާޖުގެ ހިދުމަތް ދެމުން އަންނަނީ ސެލޫންތަކުގެ ނަމުގައި ހުޅުވައިގެން ހުންނަ ތަންތަނުން ކަމަށް އިހުސާން ވިދާޅުވިއެވެ.

"އެހެންވީމަ އެހިސާބުން އެއޮތީ އަސްލު މިހާރު ވިޔަފާރި ބަންދު ކުރެވޭނެ ހާލަތު އައިސްފައި. އެއީ ހުއްދަ ނުދޭ މަސައްކަތެއް އެތަނުގައި ކުރުން،" އިހުސާން ވިދާޅުވިއެވެ.

މިއާއެކު އިޙްސާން ވިދާޅުވީ، މިއަދުން ފެށިގެން ޓާސްކް ފޯހުން ވަންނަ އެފަދަ ކޮންމެ ތަނެއް ބަންދު ކުރާނެ ކަމަށާ، ހުއްދަ ނުދޭ ހިދުމަތްތަކެއް ނުވަތަ އެހެން ކަމެއް ނަމަވެސް އެތަނެއްގައި ކުރާނަމަ ދެން އެތަނެއް ބަންދު ކުރާނެ ކަމަށާ، އަދި އެފަދަ ތަންތަން ހިންގުމުގެ އަޑީގައި ތިބޭ ދިވެހިންނާއި މެދުވެސް ފިޔަވަޅުތައް އަޅާނެ ކަމަށެވެ.

"ދެ އޭންގަލް އަކުން އަޅުގަނޑުމެން އެކަން (ފިޔަވަޅުތައް) އަޅާނީ. އެއް ކަމަކީ ހިއުމަން ޓްރެފިކިން އޭންގަލް އިން އަޅުގަނޑުމެން ތަހުގީގު ކުރަން ފަށާނަން. މިފަދަ (ހަށިވިއްކުން ފަދަ) ކަމެއް ފާހަގަވެއްޖިއްޔާ. ދެވަނަ ކަމަކީ ގަވާއިދާ ހިލާފަށް ހުއްދަ ނެތި ވިޔަފާރިއެއް ކުރުން. މީގެތެރެއިން މިނިސްޓްރީގެ ތެރެއިން އަޅަންޖެހޭ ފިޔަވަޅުތައް ޓާސްކް ފޯސް އިން އައިޑެންޓިފައި ކުރެވި އަޅަމުން ގެންދާނެ،"

ވަޒީރު ޢަލީ އިހްސާން

“ތިންވަނަ އޭންގަލްއަކީ، ބިދޭސީން ލައްވާ ގަވާއިދާ ޚިލާފަށް މަސައްކަތްކުރުވުން. ނުވަތަ ބިދޭސީން އެކްޕްލޮއިޓް ކުރުން. އޭގެ ފިޔަވަޅުތައް މިއަދުންފެށިގެން އަޅުގަނޑުމެން އަޅަންފަށާނަން. އެއީ 50،000 ރުފިޔާއާ ހަމައަށް ޖޫރިމަނާ ކުރުމާ، އޭގެ އިތުރުން ޕާސްޕޯޓް ހިފެހެއްޓުމުގެ ކަންކަން.” އިޙްސާން ވިދާޅުވިއެވެ.

ބިދޭސީންގެ މައްސަލައާއި ގުޅިގެން، ސަރުކާރުގެ ފަރާތުން، ވަޒީފާއާ ބެހޭ ގާނޫނަށް މިހާރު ހުށަހާލާފައިވާ އިސްލާޙުގައިވެސް، ގަވާއިދާ ޚިލާފަށް ބިދޭސީން ލައްވާ މަސައްކަތްކުރުވާ ދިވެހިންގެ އަތުން، އެމީހުން ގެނެސްފައިވާ ކޮންމެ ބިދޭސީއަކަށް 50،000 ރުފިޔާއާ ހަމައަށް ޖޫރިމަނާ ކުރުމަށް އިސްލާހް ހުށަހަޅާފައިވާ ކަން ފާހަގަކުރައްވައި އިހްސާން އިތުރަށް ވުދާޅުވީ، މި މައްސަލައަކީ ސަރުކާރުން ވަރަށް ބޮޑު އަހައްމިއްޔަތު ކަމެއް ދޭ މައްސަލައެއް ކަމަށެވެ.