އަލްހާނާއި އޭނާގެ ދެ ކޮއްކޮގެ ޝަރީއަތް ފަށައި ވަކީލުން އައްޔަނުކުރަން 15 ދުވަސް ދީފި

ކިންގްސް ކެޕިޓަލްސް ހޯލްޑިންގްސް ކުންފުނިން ދިވެހިރާއްޖޭގެ ގާނޫނާ ހިލާފަށް ޕޮންޒީ ސްކީމެއް ހިންގި ކަމުގެ ތުހުމަތުގައި މަޖިލީހުގެ ކުރީގެ މެމްބަރު އަލްހާން ފަހުމީ އާއި އޭނާގެ ދެ ކޮއްކޮ ކަމުގައިވާ މީޑިއާ ކައުންސިލުގެ ކުރީގެ ރައީސް ސަހުބާން ފަހުމީ އަދި ޝަޒުބާން ފަހުމީގެ މައްޗަށް ދައުލަތުން ކޮށްފައިވާ ދައުވާގެ ޝަރީއަތް މިއަދު ފަށައިފިއެވެ.

މި މައްސަލައިގައި ޕްރޮސެކިއުޓަރ ޖެނެރަލް (ޕީޖީ) އޮފީހުން ވަނީ  އަލްހާންގެ އިތުރުން އޭނާގެ ކޮއްކޮ ޝަހުބާން ފަހުމީ އާއި ޝަޒްބާން ފަހުމީގެ މައްޗަށް ޓެކުމުގެ 13 ދައުވާއެއް ކުރަން ފޮނުވުމުގެ އިތުރުން މި މައްސަލައާ ގުޅިގެން މިހާތަނަށް ޖުމްލަ 39 ދަޢުވާއެއް ކޮށްފައިއެވެ.

ކްރިމިނަލް ކޯޓުގައި މިއަދު ކުރިއަށް ދިޔަ މި މައްސަލައިގެ ފުރަތަމަ އަޑު އެހުމުގައި ގާޒީ އިސްމާއިލް ޝަފީއު ވަނީ ތިން މީހުންނަށް ވެސް ހައްގުތައް ވިދާޅުވެ، މައްސަލައިގައި ކުރިއަށް ދާން ބޭނުންވަނީ ވަކީލަކާ އެކުތޯ ސުވާލުކުރައްވާފައެވެ.

އެއާއެކު ތިން މީހުން ވެސް އަމިއްލައަށް ވަކީލަކު އައްޔަނު ކުރަން ބޭނުންވާ ކަމަށް ބުނިނަމަވެސް މާލީ ހާލަތު ހުރި ގޮތުން ވަކީލަކު ހަމަޖެއްސުމަށްޓަކައި މަސް ދުވަހުގެ މުއްދަތެއް ދިނުމަށް ވަނީ އެދިފައެވެ.

ޖިނާއީ އިޖުރާއަތުގެ ގާނޫނު ބަޔާންކުރާ ގޮތުގައި އެހާ ގިނަ ދުވަސް ވަކީލުން އައްޔަނު ކުރަން ނުދެވޭނެކަން ފާހަގަކުރައްވަމުން ގާޒީ ވަނީ ވަކީލުން އައްޔަނުކުރަން ތިން މީހުންނަށް ވެސް 15 ދުވަހުގެ މުއްދަތެއް ދެއްވާފަ އެވެ. އަދި ދެން އޮންނަ އަޑުއެހުމަކަށް ވަކީލަކު ނުލާ އައިސްފި ނަމަ އަމިއްލައަށް ދައުވާއަށް ޖަވާބުދާރީވާން ޖެހޭނެ ކަމަށް ވެސް ގާޒީ ވިދާޅުވިއެވެ.

އިންވެސްޓަރުންނަށް މަންފާ ލިބޭނެ ކަމަށް ދައްކައިގެން ކިންގްސް ކުންފުނިން އާންމުންނަށް ހުޅުވާލައިގެން އިންވެސްޓްމަންޓް ސްކީމެއް ހިންގައި އެ ސްކީމަށް އެކި މީހުން 98 މިލިއަނަށްވުރެ ގިނަ ދިވެހި ރުފިޔާ ވަނީ އިންވެސްޓްކޮށްފައެވެ.

މީގެ ކުރިން ޕީޖީ އޮފީހުން ވަނީ މި މައްސަލައިގައި ގެއްލުން ލިބުނު އިތުރު މީހުންގެ މައްސަލަތަށް ފުލުހުން ތަހުގީގު ކުރަމުންދާ ކަމަށާއި ތަހުގީގުގެ މަރުހަލާ ނިމުމުން ދައުވާ ކުރާނެ ގޮތާއި މެދު ގޮތެއް ނިންމާނެކަމަށް ބުނެފައެވެ.

އަލްހާން, ސަހުބާން އަދި ޝަޒްބާންގެ އާއިލީ ކުންފުނި, ކިންގްސްގެ އެކައުންޓްތައް ވެސް މީގެ ކުރިން ބޭންކުން ފްރީޒް ކުރި  ނަމަވެސް އެ މައްސަލައިގައި ސިވިލް ކޯޓުން ވަނީ އެ ކުންފުނީގެ އެކައުންޓްތައް ހިފެހެއްޓީ ގާނޫނާ ހިލާފަށް ކަމަށް ބުނެފައެވެ.

މި މައްސަލަ އާއި ގުޅިގެން ދާދި ފަހުން ކިންގްސް ކެޕިޓަލް ހޯލްޑިންގްސް ކުންފުނިން ޕޮންޒީ ސްކީމަށް އިންވެސްޓުކުރި މީހަކަށް 145،000 ރުފިޔާ ދައްކަން އަލްހާން ގެ މައްޗަށް ސިވިލް ކޯޓުން ހުކުމްކޮށްފައިވާކަން ވެސް ފާހަގަކޮށްލަން ޖެހެއެވެ.