ގުރޫޕް ޑީގެ އެއްވަނަ ޓީމުގެ ގޮތުގައި އޮސްޓްރިއާ ދެވަނަ ބުރަށް

ޔުއެފާ ޔޫރޯ 2024 ގެ ގުރޫޕް ޑީގައި 3-2 ގެ ނަތީޖާއަކުން ވަރުގަދަ ނެދަލޭންޑްސް ބަލިކޮށް ގުރޫޕްގެ އެއްވަނަ ޓީމުގެ ގޮތުގައި އޮސްޓްރިއާ މުބާރާތުގެ ދެވަނަ ބުރުން ޖާގަ ހޯދައިފިއެވެ.

މުބާރާތުގައި އޮސްޓްރިއާ ކުޅުނު ފުރަތަމަ މެޗުގައި 1-0 ގެ ނަތީޖާއަކުން ފުރާންސް އަތުން ބަލިވި ނަމަވެސް ދެވަނަ މެޗުގައި އެޓީމުން ވަނީ 3-1 ގެ ނަތީޖާއަކުން ޕޮލެންޑް ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އޮސްޓްރިއާ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މިހާފުގައި ދެޓީމުންކުރެ ކޮންމެ ޓީމަކުންވެސް ވަނީ އިތުރު ދެލަނޑު ކާމިޔާބުކޮށްފައެވެ.

އެގޮތުން މިމެޗުގައި އޮސްޓްރިއާގެ ރޮމާނޯ ޝްމިޑެ އަދި މާސެލް ސަބިޓްޒާ މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، އެޓީމުގެ އަނެއް ލަނޑަކީ ނެދަލޭންޑްސްގެ ޑޮންޔެލް މަލެން އަތުން ބައިކޮޅަށް ވަން ލަނޑެކެވެ.

މީގެއިތުރު މިމެޗުގައި ނެދަލޭންޑްސްގެ ކޯޑީ ގައްޕޯ އަދި މެމްފިސް ޑިޕާއީ މިއިން ކޮންމެ ކުޅުންތެރިއަކު އެއް ލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އޮސްޓްރިއާގެ ކެޕްޓަން މާސެލް ސަބިޓްޒާ އެވެ.

މިމެޗުން ލިބުނު ތިން ޕޮއިންޓާއެކު ގުރޫޕް ސްޓޭޖުގައި ކުޅުނު ތިން މެޗުން އޮސްޓްރިއާއަށް ހަ ޕޮއިންޓް ލިބިފައިވާއިރު، ގިނަ ބަޔަކު ހައިރާން ކޮއްލުމަށްފަހު އެޓީމު ދެވަނަ ބުރުން ޖާގަ ހޯދީ ގުރޫޕްގެ އެއްވަނަ ޓީމުގެ ގޮތުގައެވެ. އަދި މިމެޗުން ބަލިވި ނެދަލޭންސް ގުރޫޕް ސްޓޭޖުގެ މެޗުތައް ނިންމާލީ ކުޅުނު ތިން މެޗުން ލިބުނު ހަތަރު ޕޮއިންޓާއެކު ގުރޫޕްގެ ތިންވަނައިގައެވެ.

މިމެޗުން ބަލިވި ނަމަވެސް، އެޓީމަށް މުބާރާތުގެ ދެވަނަ ބުރުން ޖާގަ ލިބިފައިވަނީ، މުބާރާތުގެ ހަ ގުރޫޕުން ތިންވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދި ހަތަރު ޓީމުގެ ތެރޭގައި ހިމެނިގެންނެވެ.