އާޒިމާ މަސައްކަތް ކުރައްވާނީ އަޅުގަނޑަށް އޭރު ނުކުރެވުނު ކަންތައްތައް ކޮށްދެއްވުމަށް: ރައީސް

ސަރުކާރުގެ ފަރާތުން މާލޭ މޭޔަރުކަމަށް ވާދަކުރައްވާ އުސްތާޛާ އާޒިމާ މަސައްކަތް ކުރައްވާނީ މިހާރުގެ ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވުމުގެ ކުރިން މާލޭ މޭޔަރުކަމުގައި ހުންނަވައިގެން އެމަނިކުފާނު ކުރައްވަން މަސައްކަތް ކުރެއްވި ކަންތައްތައް ފުރިހަމަ ކުރެއްވުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު އެފަދައިން ވިދާޅިވެފައިވަނީ މާލޭގެ މޭޔަރު ކަމަށް ޕީއެންސީގެ ފަރާތުން ވާދަކުރައްވާ އާއިޝަތު އާޒިމާ ޝަކޫރުގެ ކެމްޕެއިން މެނިފެސްޓޯ އިފުތިތާހު ކުރުމަށް ރޭ ބޭއްވި ހަފުލާގައި ވާހަކަފުޅު ދައްކަވަމުންނެވެ.

ރޭގެ ހަފުލާގައި ރައީސް ވިދާޅުވީ މާލޭގެ ރައްޔިތުންގެ ވަރަށް ތަނަވަސް އަޤުލަބިއްޔަތަކުން އެމަނިކުފާނު މާލޭގެ މޭޔަރުކަމަށް އިންތިހާބުކުރެއްވި ހިސާބުން މާލޭގެ ރައްޔިތުންނަށް އޭރުވެވަޑައި ގެންނެވި ވަޢުދުތައް ފުއްދެވުމުގެ މަސައްކަތް ފެއްޓިވިކަމަށެވެ.

"ބައެއް ކަންކަމަކީ ކައުންސިލަށް ލިބޭ ބަޖެޓުން ކުރެވޭ ކަންކަން. ބައެއް ކަންކަމަކީ އަޅުގަނޑުމެންނަށް ލިބޭ އާމްދަނީ އިތުރު ކޮށްގެން ކުރެވެން ހުރި ކަންކަން. އަދި ބައެއް ކަންކަމަކީ ސަރުކާރުން އެއްބާރުލުން ދީފިއްޔާ އެކަނިވާ ވަރުގެ ކަންކަން"

ރައީސް ވިދާޅުވިއެވެ.

ރައިސް ވިދާޅުވީ އެމަނިކުފާނުގެ މޭޔަރުކަމުގައި ގިނަ ކަންތައްތަކެއް ހާސިލްވެފައިވީ ނަމަވެސް އޭރުގެ ސަރުކާރުން އެއްބާރުލުން ލިބިގެން ނޫނީ ނުކުރެވޭ ވަރުގެ ބޮޑަތި ބިޔަ މަޝްޜޫޢުތައް ނުކޮށް މަޑުކޮށްލަން މަޖުބޫރުވެގެން ދިޔަ ކަމަށެވެ.

"ހައުސިން މައްސަލަ ބޯހިޔާވަހިކަން ހައްލު ކުރުމަށް މާލެއާއި ވިލިމާލޭގައި ފްލެޓްތަކެއް އެޅުމަށް ހުރިހާ ކަމެއް ނިންމިން. އެކަމަކު ސަރުކާރުން ދޭން ޖެހޭ އެއްބާރުލުން ނުދެއްވުމުން އެ ފްލެޓްތައް އެހެރީ ނޭޅި. މަގު ހަދަމުން ދަނިކޮށް އެ މަޝްރޫއު އަތުލި. ޕާކިން މައްސަލަ ހައްލު ކުރުމަށް ނިންމުމުން ސަރުކާރުން ދެއްވަން ޖެހޭ އެއްބާރުލުން ދީގެން އެކަން ނުވީ"

ރައީސް ވިދާޅުވިއެވެ.

އެކަންތައްތައް އެހެން ހުރުމާއި އެކު ރައީސް ތަކުރާރުކޮށް އެދި ވަޑައިގެންނެވީ މިފަހަރުގެ މާލޭ މޭޔަރުގެ އިންތިހާބުގައި އެމަނިކުފާނުގެ ކެންޑިޑޭޓަށް ވޯޓް ދެއްވުމަށެވެ.

"އަޅުގަނޑުމެންގެ ކެނޑިޑޭޓް މަސައްކަތް ކުރައްވާނީ އަޅުގަނޑަށް އޭރު ނުކުރެވުނު ކަންތައްތައް އަދި ދެންމެ ހުށަހެޅި ފުރިހަމަ މެނިފެސްޓޯގައި ހުރި އިންކްލޫސިވް ސޮސައިޓީ، ހުރިހާ ރައްޔިތުންނަށް ފައިދާ ހުރި ކަންކަން ކޮށްދިނުމުގަ ސަރުކާރުގެ ސިޔާސަތާއި ގުޅިލާމެހިގެން، މާލޭގެ ރައްޔިތުން އެދޭ ގޮތަށް ތިރިން މައްޗަށް ރައްޔިތުން އެދޭ ކަންތައްތައް ކޮށްދިނުމުގަ" އާޒިމާއަށް ވޯޓުދެއްވުން އެދި ރައީސް ވިދާޅުވިއެވެ.