ސިފައިންނާއި ފުލުހުންނަކީ ރާއްޖޭގެ އެންމެ ވަރުގަދަ ދެ މުއައްސަސާ؛ އެއަށް ނަގަންވާނީ އެންމެ ޤާބިލު މީހުން: ޔާމީން

ސިފައިންނާއި ފުލުހުންގެ މުވައްސަސާއަކީ ރާއްޖޭގެ އެންމެ ވަރުގަދަ ދެ މުއައްސަސާ ކަމަށާ އެ ދެ މުއައްސަސާއަށް ނަގަންވާނީ އެންމެ ޤާބިލު މީހުން ކަމަށް ކުރީގެ ރައީސް ޔާމީން އަބްދުލްޤައްޔޫމް ވިދާޅުވެއްޖެއެވެ.

ޕީއެންއެފްއިން ރޭ ބޭއްވި ޖަލްސާއެއްގައި އެކަމަށް އަލިއަޅުވާލައްވައި ވާހަކަ ދައްކަވަމުން ޔާމީން ވިދާޅުވީ، ސިފައިންނާއި ފުލުހުންނަށް މީހުން ނަގަނީ ”ފޮޅައި ސާފުކުރަން ނޫން“ ކަމަށާ، އެމީހުންގެ ޢިލްމީ ޤާބިލުކަން ހުންނަންޖެހޭ ކަމަށެވެ. އަދި އެމީހުންނަކީ ހަމައެކަނި މަގުމައްޗަށް ނުކުމެ ތިބެންޖެހޭ ބައެއް ނޫން ކަމަށާ އެއީ ތަޢުލީމީ ޤާބިލުބައެއްކަން ސާބިތު ކޮށްދީފައިވާ ބަޔަކަށް ވާންޖެހޭ ކަމަށެވެ.

”ކުރިއަށް ކިޔެވޭނެ ގޮތް ނެތް މީހުން. ނޫނީ ޖީސީއިން ރަނގަޅަށް ފާސް ނުވާ. މިއެއް ނޫން އަޅުގަނޑުމެން ބޭނުންވަނީ ސިފައިންނާއި ފުލުހުންނަށް. ސިފައިންނާއި ފުލުހުންނަކީ ރާއްޖޭގެ އެންމެ ވަރުގަދަ ދެ މުއައްސަސާ. މިތަނަށް މީހުން ނަގަން ވާނީ އޮން މެރިޓް، އެ ތަންތަނަށް ވަންނާނެ މީހުން މިހާރު ވާނެ،"

ކުރީގެ ރައީސް ޔާމީން

މިއާއެކު ޔާމީން ވިދާޅުވީ، ބަޔަކަށް ވަޒީފާ ލިބުމަކީ އެމަނިކުފާނަށް އުނދަގޫ ވާ ކަމެއް ނޫން ކަމަށެވެ. އެހެން ނަމަވެސް، ސިފައިންނާއި ފުލުހުންނަށް ކުރަން ޖެހޭ ޚަރަދުތައް ސަރުކާރުގެ ބަޖެޓުގައި ނެތް ކަމަށެވެ.

"ފަސް އަހަރާ ހަމައަށް ދާންވާއިރަށް 5،000 އާ ސިފައިން ތިބެން އެބަޖެހޭ، 5،000 އާ ސިފައިން ތިބެން ޖެހޭއިރު އަޅުގަނޑު ދެންމެ ހިސާބެއްކޮށްލީ. ސިފައިން ކެޑޭޓުން ގޮތަށް ފުރަތަމަ މި ވައްދާ މީހުން 13،000 ރުފިޔާގައި މި ވައްދަނީ، ފުރަތަމަ މި އޮންނަ ޓްރެއިނިން ޕްރޮގްރާމް ނިމުނީމާ 15،500 ލިބެނީ. އެއްހާސް މީހުންނަށް އެއް އަހަރަށް މި ޖެހެނީ 186 މިލިއަން،"

ކުރީގެ ރައީސް ޔާމީން

ޔާމީން ވިދާޅުވީ ގާތް ގަނޑަކަށް ދެ މިލިއަން ސިފައިންނަށް ޚަރަދުވާއިރު، 1000 ފުލުހުން ނަގާނަމަ، ފުލުހުންގެ ބަޖެޓު ވެސް އެ އަދަދަށް އަރާނެ ކަމަށެވެ.

"ކޮންތާކުންހޭ މި ދެކޮޅު ޖައްސަނީ؟ މިހާރު މަޖިލިސްގެ ގިނަ މެންބަރުން މި ކުރާ ޝަކުވާއަކީ ބަޖެޓެއްގެ ނަންބަރުތަކެއް ފޮނުވާފައި އޮތީއޭ. ނަންބަރަކީ ހަމަ ބަޖެޓު ނަންބަރު. އެއީ އެޗީވް ކުރެވޭނެ އެއްޗެއް ނޫން. އޭގެ ތަފުސީލްތަކެއް ދޭން ޖެހޭ. އޭގެ ތަފުސީލުތައް ދިނީމާ އެނގޭނީ މިއީ އެޗީވެބުލް އެއްޗެއްތޯ ނޫންތޯ. އެކަމެއް ނުކުރޭ.

ކުރީގެ ރައީސް ޔާމީން

ޔާމީން މިހެން ވިދާޅުވެފައިވާއިރު، ކިޔެވުމުގެ ފުރުޞަތު ނެތް ނުވަތަ ވަޒީފާއެއް ނެތް ކޮންމެ ޒުވާނަކު ސަލާމަތީ ބާރުތަކުގެ ތަމްރީނުތަކުގައި ބައިވެރިކުރެވޭނެ ގޮތަށް، ޤައުމީ ޚިދުމަތުގެ ނިޒާމެއް ތަޢާރަފްކުރަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ.