ކައިބާނަށް ވިސާ ދިނުމަށް އެދި ދިވެހި ސަރުކާރުގެ ޚާއްސަ ސިޓީއެއް!
ސިއްހީ މައްސަލަތަކެއް ހުރުމުގެ ސަބަބުން އޮސްޓްރޭލިޔާއިން ޑިޕޯރޓްކުރުމުގެ ބިރުއޮތް ދިވެހި ކުއްޖެއްކަމުގައިވާ ކައިބާން ޖަމްޝީދުގެ މައްސަލައިގައި، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ފޮރިން މިނިސްޓަރ އަބްދުﷲ ޝާހިދުގެ ސިޓީއެއް އޮަސްޓްރޭލިޔާގެ ސަރުކާރަށް އަރުވައިފިއެވެ.
މި ސިޓީ އަރުވާފައިވާކަން މިނިސްޓަރ އަބްދުﷲ ޝާހިދު ވަނީ ޓްވިޓަރ މެދުވެރިކޮށް ޔަގީންކޮށްދެއްވާފައެވެ.
މިނިސްޓަރ ޝާހިދު ވިދާޅުވީ އޮސްޓްރޭލިޔާގެ ޑެޕިއުޓީ ފޮރިން ސެކްރެޓަރީ ރިޗާޑް މައުޑޭ އާއި ބައްދަލުކުރައްވައި އިންސާނިއްޔަތުގެ ހަަމައަށް ބިނާކޮށް ކައިބާންއަށް ވިސާ ދިނުމަށް އޮސްޓްރޭލިޔާގެ ބޮޑުވަޒީރާއި ފޮރިން މިނިސްޓަރަށް ދިވެހި ސަރުކާރުން ފޮނުވި ސިޓީތަކުގެ ވާހަކަ ދައްކަވާފައިވާ ކަމަށެވެ.
ދިވެހި ސަރުކާރުގެ ފަރާތުން މި ސިޓީތައް ފޮނުއްވީ ފޮރިން މިނިސްޓަރ އަބްދުﷲ ޝާހިދާއި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ.
ކައިބާން ޖަމްޝާދަކީ ހީމޯފީލިއާގެ ސަބަބުން ލޭ ގަނޑުވުމުގެ މައްސަލަތަކަކާއި ވިހެއުމުގައި ވެސް ސިކުނޑިއަށް ގެއްލުންތަކެއް ލިބިފައިވާ ކުއްޖެކެވެ. އޮސްޓްރޭލިއާއަށް އުފަން ކައިބާންއަށް ވިސާ ނުދީ ޑިޕޯޓް ކުރަނީ އޮސްޓްރޭލިއާގެ ސަރުކާރުގެ ޚަރަދުގައި ކައިބާންއަށް ބޭސްފަރުވާ ކުރާނަމަ ބޮޑު ޚަރަދެއް އެ ގައުމުން ކުރަން ޖެހޭ ކަމެއް ބުނެއެވެ. ނަމަވެސް ކައިބާންގެ ބޭސްފަރުވާގެ ހުރިހާ ޚަރަދެއް ކުރަނީ އާއިލާއިން ކަން ފާހަގަކޮށްލެވެއެވެ.
ކައިބާން ޑިޕޯޓްކޮށްލައިފިނަމަ އޭނާގެ ފުރާނަައަށް ނުރައްކާވުމުގެ ފުރުސަތު އެބައޮތެވެ. ސަބަބަކީ ކައިބާންއަށް އެދެވޭނެ ފަރުވާއެއް ދިވެހިރާއްޖޭގައި ލިބެން ނެތުމެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
