މާލޭގެ މިސްކިތެއްގައި އަލިފާން ރޯކުރަން މަސައްކަތް ކޮށްފި
މާލޭގެ މިސްކިތެއްގައި އަލިފާން ރޯކުރަން މަސައްކަތް ކޮށްފިއެވެ.
މިއަދު މާލެ ސިޓީ ކައުންސިލުން ހާމަ ކުރެއްވި ގޮތުގައި، ބަޔަކު ވަނީ ޖަމީލްދީދީ މިސްކިތުގެ ތަޅުގައި އަލިފާން ރޯކުރަން މަސައްކަތް ކޮށްފައެވެ.
ސިޓީ ކައުންސިލުން ވަނީ، މިސްކިތުގެ ތަޅަށް ދީފައިވާ ގެއްލުން ފެންނަ ފޮޓޯއެއްވެސް މީސްމީޑިޔާގައި ހިއްސާ ކޮށްފައެވެ. ފޮޓޯ އިން ފެންނަ ގޮތުގައި، ދޮރުގެ އަތްގަނޑާއި ދޮރުގެ ބަޔަކަށް ވަނީ، އަލިފާން ރޯކުރުމުގެ ސަބަބުން ދެލި އަރާފައެވެ.
މި ކަމާ ގުޅިގެން މާލެ ސިޓީ ކައުންސިލުން ވަނީ މިސްކިތްތަކުން ވައްކަންކޮށް ތަކެއްޗަށް ގެއްލުންދީ މިސްކިތުގެ ކަރާމާތް ނަގާލުމަށް މަސައްކަތްކުރާ ފަރާތްތަކާމެދު ހަރުކަށި ފިޔަވަޅު އެޅުމަށް ގޮވާލާފައެވެ.
މިސްކިތްތަކުން ވައްކަން ކުރާ މައްސަލަ، ބޮޑުވަމުން ދާތީ، މީގެ ކުރިންވެސް މާލެ ސިޓީ ކައުންސިލުންވަނީ، މިސްކިތްތަކުން ވައްކަން ނުކުރުމަށް އިލްތިމާސްކޮށް، ވައްކަމުގެ ގިނަ މައްސަލަތަކެއް ފުލުހަށް ވެސް ހުށަހަޅާފައެވެ. އެގޮތުން މިދިޔަ ހުކުރުވިލޭރޭ ޢީދު މިސްކިތުން ފަންކާއެއް ވަގަށް ނަގާފައިވާތީ ފުލުހަށް ހުށަހަޅާފައިވާއިރު، ތަޤުވާ މިސްކިތުންނާއި، ދަރުމަވަންތަ މިސްކިތުންވެސް ފަންކާ ވަގަށް ނަގާފައިވާކަން ފާހަގަކޮށްލެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
