ޑިޕްލޮމެޓިކް ޕްލޭޓް ހަވާލުނުކުރި މައްސަލައެއް ފެންމަތިވެއްޖެ

މެލޭޝިޔާގައި ހުންނަ ދިވެހިރާއްޖޭގެ އެމްބަސީގައި އިސް މަގާމުތަކެއް އަދާކުރި ފަރާތްތަކެއް މަގާމުން ވަކިވުމަށް ފަހުގައިވެސް ޑިޕްލޮމެޓިކް ޕްލޭޓް ބޭނުންކުރަމުން އަންނަ މައްސަލައެއް ފެންމަތިވެއްޖެއެވެ.

އެގޮތުން މިދިޔަ ސަރުކާރުގައި މެލޭޝިޔާގައި ހުންނަ ދިވެހިރާއްޖޭގައި އެމްބަސީގައި ޓްރޭޑް ރެޕްރެޒެންޓޭޓިވްއެއްގެ މަގާމު އަދާކުރެއްވި އައްބާސް އާދިލް ރިޒާގެ ދޮން ދަރިފުޅު ބޭނުންކުރާ ކާރުގައި އަދިވެސް ޑިޕްލޮމެޓިކް ލައިސަންސް ޕްލޭޓެއް އިން ފޮޓޯއެއް ވަނީ އާންމުވެފައެވެ.

މީގެ އިތުރުން އެ އެމްބަސީގެ އިސްމަގާމެއްގައި ހުންނެވި ފައިސަލް އިބްރާހިމް (ޕީއެންސީގެ ރައީސް އަބްދުއްރަހީމް އަބްދުﷲ ގެ ދަރިކަލުން)ވެސް އެބޭފުޅާގެ ޑިޕްލޮމެޓިކް ލައިސަންސް ޕްލޭޓް އަނބުރާ ހަވާލުކޮށްފައި ނުވާކަން ވޮއިސްއަށް ވަނީ އެނގިފައެވެ.

މިކަމާއި ގުޅިގެން ވޮއިސްއިން ކުރި ސުވާލަކަށް ޖަވާބުދެއްވަމުން ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރ މިއުވާން މުހައްމަދު ވިދާޅުވީ ކަނޑައެޅިފައިވާ އޮންނަ އުސޫލެއްގެ ގޮތުން ޑިޕްލޮމެޓިކް ލައިސަންސް ޕްލޭޓްތައް ބޭނުންކުރާނީ އެމްބަސީގެ މުވައްޒަފުންނާއި އެމްބަސީގެ ވެހިކަލްތަކުން ކަމަށެވެ.

އާންމު އުސޫލެއްގެ ގޮތުން ޑިޕްލޮމެޓިކް މަގާމުތަކުގައި ތިބޭ ފަރާތްތަކުގެ ވަޒީފާ ގެއްލުމުން އެފަރާތްތަކުގެ އަތުގައި އޮންނަ ޑިޕްލޮމެޓިކް ޕާސްޕޯޓާއި ވެހިކަލް ޕްލޭޓް ފަދަ ތަކެތި އަނބުރާ ހަވާލުކުރަންޖެހެއެވެ. ނަމަވެސް އައްބާސް އާދިލް ރިޒާއާއި ފައިސަލްގެ ފަރާތުން މިފަދައިން އަމަލުކޮށްފައި ނުވުމުން، އާދައިގެ ލައިސަންސް ޕްލޭޓަކަށް ދައްކާ ފީވެސް ނުދައްކާކަން ހާމަވާކަމަށް ބައެއް ފަރާތްތަކުން ދަނީ ބުނަމުންނެވެ.