ރައީސް ޔާމީން ވަނީ އިންޑިއާ ސިފައިން ދިޔުމަށް އަމުރުކޮށްފައި: އުމަރު ނަސީރު

އުމަރު ނަސީރު ހޯމް މިނިސްޓަރު ކަމުގައި ހުންނެވި އިރު ރާއްޖޭގައި އިންޑިއާ ސިފައިން ތިބި ތިބުމަށް އޭނާ ރައްދުދެއްވައިފިއެވެ.

އުމަރު ނަސީރު މީސް މީޑިއާ މެދުވެރިކޮށް ނެރުނު ބަޔާނުގައި ވިދާޅުވެފައިވާގޮތުގައި އޭނާ ހޯމް މިނިސްޓަރު ކަމުގައި ކެބިނެޓްގެ ނެޝަނަލް ސެކިއުރިޓީ ކައުންސިލްގައި ހިމެނިގެން 2014 ވަނަ އަހަރު ނިންމާފައިވަނީ ރައީސް ނަޝީދު ސަރުކާރުން އިންޑިއާއެކު 2010 ވަނަ އަހަރު ވެފައިއޮތް އެއްބަސްވުން އިތުރަށް އާނުކުރުމަށާއި، އެޤްރީމެންޓް ހަމަވުމުން ސިފައިން އަނބުރާ ފޮނުވާލުމަށްކަމަށެވެ.

"އަޅުގަނޑު ސަރުކާރުން ވަކިވިފަހުން، އެއެއްބަސްވުމުގެ މުއްދަތު ހަމަވި ދުވަހު. ރައީސް ޔާމީން ސަރުކާރުން ވަނީ އެދުވަހުގެ ނިންމުން ތަންފީޒް ކުރައްވައި، ސިފައިން އަނބުރާ ދިޔުމަށް އަމުރުކޮށްފައި. މި ސަރުކާރުން އެ އެގްރީމެންޓް އަލުން އާކޮށްދިނީ، އިންޑިއާގެ އިތުރު މިލިޓަރީ އެސެޓްތައް ރާއްޖެއަށް ގެނައުމަށް މިވަނީ އެއްބަސްވެފައި. ހެލިކަޕްޓަރ، ޑޯނިޔާ މަތިންދާބޯޓު، ރާޑަރ ފަދަ އިންޑިއާގެ މިލިޓަރީ ހާޑްވެއާ ތަކަކީ މި ޤައުމުގެ މިނިވަންކަން އަތުލާ ދުވަހު އަޅުގަނޑުމެނާ ދެކޮޅަށް ބޭނުންކުރާނެ ވަސީލަތްތައް" އުމަރުގެ ބަޔާނުގައި ވިދާޅުވެފައިވެއެވެ.

މިއީ "ސްލޯ އިންވޭޝަން"އެއް ކަމަށާއި އެސަބަބަށްޓަކައި ދިވެހި ޤައުމިއްޔަތު ހޭލައްވާލާން ކުރާ މަސައްކަތެއްކަމަށް އުމަރު ނަޝީރު ވަނީ ވިދާޅުވެފައެވެ.

މި ހަފްތާތެރޭގައި އިންޑިއާގެ އިސްތިއުމާރާ ދެކޮޅަށް މާލޭގައި ބޭއްވި ބައްދަލުވުމެއްގައި އުމަރު ވަނީ ބައިވެރިވެފަ ޤައުމީ ހަރަކާތެއް ފަށާނެކަން އިއުލާންކުރައްވާފައެވެ. މި ބައްދަލުވުމުގައި ވިލިމާލެ ދާއިރާގެ މެންބަރު ނިހާން، ކުރީގެ ޑީރާރުޕީގެ ލީޑަރު ކާނަލް ނަޝީދު ބައިވެރިވަޑައިގެންނެވިއެވެ.