މީސްމީޑިއާގައި ދީނަށް ފުރައްސާރަ ކުރި މީހާ ހޯދަން އިއުލާން ކޮށްފި

ސޯޝަލް މީޑިއާގެ އެކި ޕްލެޓް ފޯމްތަކުގައި އިސްލާމް ދީނަށް ތައުހީނުކޮށް، ފުރައްސާރަކުރި މީހާ ހޯދަން ފުލުހުން އިއުލާން ކޮށްފިއެވެ.

ފުލުހަށް ހާޒިރުވާން އަންގާފައިވަނީ، އަޙްމަދު ޢާމިރު (51އ)، ހ. ފިލިކުރިގެ / މާލެ އެވެ.

މީސް މީޑިއާ މަންސައެއް ކަމަށްވާ ޓިކްޓޮކްގައި ލައިވްވެ، މި މީހާ ވަނީ އިސްލާމްދީނުގެ އަސާސްތަކަށް ފުރައްސާރަކޮށްފައެވެ. އެގޮތުން ހިތާނު ކުރުމާ ދެކޮޅަށް ވާހަކަދައްކައި އެކަމަށް ފުރައްސާރަކޮށްފައިވެއެވެ.

ފުލުހުން ބުނީ، އޭނާ ހޯދަން އިއުލާން ކުރީ، ސޯޝަލްމީޑިއާގައި ދީނަށް ފުރައްސާރަކޮށް، ދިވެހި ރައްޔިތުންގެ ދީނީ އެއްބައިވަންތަކަމަށް ބުރޫއަރާފަދަ ވާހަކަ ދެއްކުމާއި އިސްލާމީ ކަންތައްތަކާ ބެހޭ ވުޒާރާ ނައްތާލުމަށް ގޮވާލައި ވާހަކަ ދައްކާފައިވާ މައްސަލައާ ގުޅިގެން ފުލުހުން ތަހުގީގު ކުރަމުންދާ މައްސަލައެއްގެ ތަހުގީގަށް ކަމަށެވެ.

އަދި އޭނާ ފުލުހަށް ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާ ކަމަށްވެސް ބުންޏެވެ.

އޭނާ ހާޒިރުވާން އަންގާފައިވަނީ، ސާޖަންޓް އާދަމް ހަލީމް ކުރިމިނަލް އިންވެސްޓިގޭޝަން ބިލްޑިންއަށް، މި އަންނަ މަހުގެ 10 ވަނަ ދުވަހުގެ ހަވީރު 4:00 އަށެވެ.