މަޖީދިއްޔާ ސްކޫލުގެ ކެޕްސޫލް ގެއްލުމާއި ގުޅިގެން ހިނގާލުމެއް ބާއްވައިފި

ދިވެހިރާއްޖޭގެ އެންމެ ދުވަސްވީ ސްކޫލްކަމުގައިވާ މަޖީދިއްޔާ ސްކޫލްގެ 100ވަނަ އަހަރީ ދުވަސްކަމުގައިވާ 19 އެޕްރީލް 2027 ގައި ނަގާގޮތަށް 1993ވަނަ އަަހަރުގައި ވަޅުލި ޓައިމް ކެޕްސޫލް ގެއްލުމާއި ގުޅިގެން ހިނގާލުމެއް ބާއްވައިފިއެވެ.

މި ހިނގާލުން ބާއްވާފައިވަނީ މަޖީދިއްޔާ ސްކޫލް ހިމެނޭ ސަރަހައްދު ވަށާލައިއެވެ. މި ހިނގާލުން އިންތިޒާމްކޮށްފައިވަނީ އެ ސްކޫލްގެ މުސްކުޅި ދަރިވަރުންތަކެކެވެ.

އެ ސްކޫލުގެ ޓައިމް ކެޕްސޫލް ގެއްލުނު ކަމުގެ މައުލޫމާތު މީޑިޔާގައި އާންމުވުމާއި ގުޅިގެން ސްކޫލްގެ މުސްކުޅި ދަރިވަރުންކޮޅެއް ވަނީ ވައިބަރ ގްރޫޕެއް ހަދައި، އެ ކެޕްސޫލް ހޯދުމުގެ މަސައްކަތް ފަށާފައެވެ. އެގޮތުން އެ ދަރިވަރުން ވަނީ އިއްޔެގެ ވަގުތެއްގައި އެ ކެޕްސޫލް ވަޅުލި ސަރަހައްދު ކޮނެގެން ބަލާފައެވެ.

ފާހަގަކޮށްލެވޭ ގޮތުގައި އެ ސަރަހައްދު ބެލިއިރު އެ ޓައިމް ކެޕްސޫލެއް ނެތެވެ. ނަމަވެސް ކެޕްސޫލަށްލީ ބައެއް ތަކެތި އެ ސަރަހައްދުން ވަނީ ފެނިފައެވެ. މި ކެޕްސޫލް ހޯދުމަށް މަޖީދިއްޔާގެ މުސްކުޅި ދަރިވަރުންކޮޅެއް މިއަދުގެ ވަގުތެއްގައި ވަނީ ތިލަފުއްޓަށްވެސް ޒިޔާރަތްކޮށްފައެވެ.

އެ ޓައިމް ކެޕްސޫލް ވަޅުލީ އޭރުގެ މަޖީދިއްޔާ ސްކޫލްގެ ކްލާސްރޫމެއްގެ ތެރޭގައެވެ. ފަހުން މަޖީދިއްޔާ ސްކޫލާއި ދަރުމަވަންތަ ސްކޫލް ފަޅިކޮށްލިއިރު، އެ ކެޕްސޫލް އޮތީ ދަރުމަވަންތަ ފަޅީގައެވެ.

ބައެއް ފަރާތްތަކުން ބުނަމުންދާ ގޮތުގައި އެ ކެޕްސޫލަށް ގެއްލުން ލިބި، އެ ގެއްލިފައިވަނީ ދަރުމަވަންތަ ސްކޫލްގެ އިމާރާތް ތަޅާލަން އުޅުުމުގެ ތެރޭގައި އެކްސްކަވޭޓަރެއް ގަނބައިގަނެގެން ހިނގި ކަންތައްތަކެއްގެ ތެރެއިންނެވެ. މިކަމާއި ގުޅިގެން ގިނަބަޔަކު ދަނީ ހިތާމަ ފާޅުކުރަމުންނެވެ.

މި ހާދިސާއާއި ގުޅިގެން އެޑިއުކޭޝަން މިނިސްޓްރީ އަދި މަޖީދިއްޔާ ސްކޫލުންވެސް ވަކި އެއްޗެއް މިހާތަނަށް ބުނެފައެއް ނުވެއެވެ.