ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ޑޮލަރު ދައްކަން ލާޒިމްކުރަނީ
ރާއްޖޭގައި މިހާރު ކުރިމަތިވެފައިވާ ޑޮލަރުގެ ދަތިކަން ހައްލުކުރުމަށްޓަކައި، ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ދައްކަންޖެހޭ ފައިސާ ޑޮލަރުން ދެއްކުމަށް ލާޒިމްކުރުމަށް ސަރުކާރުން ނިންމައިފިއެވެ.
މިކަން ހާމަކުރައްވާ މިއަދު ބޭއްވި ޕްރެސްގައި ނޫސްވެރިންނާ ވާހަކަދައްކަވަމުން ބަންޑާރަނައިބު އަހްމަދު އުޝާމް ވިދާޅުވީ، މި ބަދަލު ގެނައުމަށް ބައެއް ގާނޫނުތަކަށް އިސްލާހު ގެންނަން ޖެހޭނެ ކަމަށެވެ. މި އިސްލާހުތައް ކުރިއަށް އޮތް ހަފުތާއެއް ނުވަތަ ދެ ހަފުތާގެ ތެރޭގައި ރައްޔިތުންގެ މަޖިލީހަށް ހުށަހަޅައި ނިންމާނެ ކަމަށް އޭނާ ވިދާޅުވިއެވެ.
"މި ބަދަލު ގެނައުމަށް ބައެއް ގާނޫނުތަކަށް އިސްލާހު ގެންނަން ޖެހޭނެ، މި އިސްލާހުތައް ކުރިއަށް އޮތް ހަފުތާއެއް ނުވަތަ ދެ ހަފުތާގެ ތެރޭގައި ރައްޔިތުންގެ މަޖިލީހަށް ހުށަހަޅައި އެކަން ނިންމާނަން"
ބަންޑާރަނައިބު އަހްމަދު އުޝާމް
މި ނިންމުމުގެ ދަށުން، ޑޮލަރުން އާމްދަނީ ލިބޭ ކުންފުނިތަކުންނާއި ޑޮލަރުން މުސާރަދޭ ކުންފުނިތަކުން ދައުލަތަށް ފައިސާ ދައްކަންޖެހޭނީ ޑޮލަރުންނެވެ. މީގެ އިތުރުން، ޑޮލަރުން އާމްދަނީ ލިބޭ ކުންފުނިތަކުން އެތެރެކުރާ މުދަލަށް ދައްކަންޖެހޭ ކަސްޓަމްސް ޑިއުޓީވެސް ދައްކަންޖެހޭނީ ޑޮލަރުންނެވެ.
ބަންޑާރަނައިބު ވިދާޅުވި ގޮތުގައި، މިހާރު ޑޮލަރުން އާމްދަނީ ލިބޭ ބައެއް ކުންފުނިތަކުން ދައުލަތަށާއި މީރާއަށް ފައިސާ ދައްކަނީ ރުފިޔާއިންނެވެ. މީގެ ސަބަބުން، ބައެއް ކުންފުނިތަކުން ކަޅު ބާޒާރުގައި ޑޮލަރު މާރުކުރާ ކަމުގެ ޝަކުވާ ލިބޭތީ، މި ބަދަލު ގެނައުމަށް ނިންމީ ކަމަށް އޭނާ ވިދާޅުވިއެވެ.
މި ބަދަލުތައް ގެނައުމަށް ބައެއް ގާނޫނުތަކަށް އިސްލާހު ގެންނަންޖެހޭ ނަމަ، އެކަން ވެސް ކުރިއަށް އޮތް ދެ ހަފުތާގެ ތެރޭގައި ނިންމާނެ ކަމަށް ބަންޑާރަނައިބު އަހްމަދު އުޝާމް ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
