މަސްވެރިކަން ކުރާ ދޯނިތަކާއި މަސް ބަންދުކުރާ ކާރުހާނާތަކުގެ ޚަރަދުގެ %35 އިއާދަކުރުވަނިވި ހަކަތައަށް ބަދަލުކުރަނީ

ދިވެހިރާއްޖޭގައި މަސްވެރިކަން ކުރާ އުޅަނދު ތަކާއި، ދިވެހިރާއްޖޭގައި މަސް ޕްރޮސެސްކުރާ ކާރުޚާނާ ތަކުގެ ހިންގުމުގެ ޚަރަދު ކުޑަކުރުމަށް މަސް ދޯނިތަކާއި ކާރުޚާނާތަކުގެ ޚަރަދުގެ %35 އިއާކުރުވަނިވި ހަކަތައަށް ބަދަލުކުރުމަށް ނިންމައިފިއެވެ.

މަސްވެރިކަމާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ވުޒާރާގެ ވަޒީރު އަހުމަދު ޝިޔާމް ވިދާޅުވީ، ދިވެހި މަސްވެރިން ވާދަކުރަންޖެހިފައިވަނީ، ވަރަށް ޚަރަދު ކުޑަކޮށް ފައިދާ ބޮޑުކޮށް މަސްވެރިކަން ކުރަމުން އަންނަ ގައުމުތަކަކާ ކަމަށެވެ. އެގޮތުން އެ ގައުމު ތަކުން ދާ ޖަހައިގެން ނުވަތަ ލޭނު އަޅައިގެން މަސްވެރިކަން ކުރަމުންދާއިރު މަސް ބާނަން ކުރަންޖެހޭ ޚަރަދު ކުަޑަކަމަށް ވަޒީރު ވިދާޅުވިއެވެ.

އެހެން ނަމަވެސް، ދިވެހިރާއްޖެ އަކީ ދެމެހެއްޓެނިވި މަސްވެރިކަންކުރާ ގައުމަކަށް ވުމާއިއެކު، މަސްވެރިން މަސް ބާނަން ބޮޑު ހޭދައެއް ކުރަންޖެހޭ ކަމަށް ޝިޔާމް ވިދާޅުވިއެވެ. އެހެންކަމުން، މަސްވެރިކަމުގެ މާކެޓް ތަކުގައި ބޭރުގެ ގައުމުތަކާއި ވާދަކުރާއިރު ގޮންޖެހުންތަކާއި ކުރިމަތިލާން ޖެހޭ ކަމަށް ޝިޔާމް ވިދާޅުވިއެވެ.

ކަންމިހެން ހުރުމުން, ދެމެހެއްޓެނިވި މަސްވެރިކަން ކުރުމުގައި ޚަރަދުކުޑަ ގޮތްތަކެއް ރާއްޖެއިން ހޯދަންޖެހޭ ކަން ޝިޔާމް ފާހަގަކުރެއްވިއެވެ.

އެގޮތުން އަޅުގަނޑުމެންގެ އަމާޒެއް އެއީ، ދިވެހިރާއްޖޭގައި މަސްވެރިކަން ކުރާ އުޅަނދު ތަކާއި، ދިވެހިރާއްޖޭގައި މަސް ޕްރޮސެސްކުރާ ކާރުޚާނާ ތަކުގެ ހިންގުމުގެ ޚަރަދު ކުޑަކުރެވޭނެ ގޮތަކަށް އަޅުގަނޑުމެންގެ މުޅި ސިޔާސަތު ބަދަލުކުރުން. އެގޮތުން އަޅުގަނޑުމެންގެ މިހާރުގެ އަމާޒަކީ ރާއްޖޭގައި މަސްވެރިކަންކުރާ އުޅަދުފަހަރާ، އަދި މަސް ޕްރޮސެސްކުރާ ކާރުޚާނާ ތަކުގެ، މިހާރު މި ހިނގާ ޚަރަދު ތަކުގެ 35 އިންސައްތަ އިއާދަކުރުވަނިވި ހަކަތައަށް ބަދަލުކުރުން.

އަހުމަދު ޝިޔާމް

ޝިޔާމް ވިދާޅުވީ، މަސްދޯނިތަކާއި ފެކްޓްރީ ތަކާއި މަސްދޯނިތަކުގެ ޚަރަދު އިއާދަކުރުވަނިވި ހަކަތައަށް ބަދަލުކުރުމަކީ އިންވެސްޓްމަންޓް ބޭނުންވާނެ ކަމެއް ކަމަށެވެ. އަދި އެއިން ބައެއް ވޯލްޑް ބޭންކުގެ ޕްރޮޖެކްޓްގެ ތެރެއިން ލިބިގެންދާ ކަމަށްވެސް ވަޒީރު ވިދާޅުވިއެވެ.