ގުނަވަން ބަދަލުކުރާ ބިލް އަނބުރާ ފޮނުވާލީ ގައިދީންގެ ގުނަވަން ދެވޭ ގޮތަށް އޮތުމުން: ރައީސް

އިންސާނުންގެ ގުނަވަން ޓްރާންސްޕްލާންޓް ކުރުމާ ބެހޭ ބިލް އަނބުރާ މަޖިލީހަށް ފޮނުވާލެއްވީ، ގުނަވަން ނުދެވޭ މީހުންގެ ތެރެއިން ބަންދުމީހުންނާއި، ގައިދީން އުނި ކުރުމުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ގުނަވަން ޓްރާންސްޕްލާންޓް ކުރުމުގެ ބިލު މަޖިލީހުން ފާސްކުރީ މި މަހުގެ 14 ވަނަ ދުވަހު އެވެ. އެ ބިލް ތަސްދީޤު ނުކުރައްވަން ނިންމަވައި އަނބުރާ މަޖިލީހަށް ފޮނުއްވީ އެ މަހުގެ 31 ވަނަ ދުވަހުއެވެ.

އެގޮތުން ބިލާމެދު ވިސްނެވުމަށްފަހު ބަންޑާރަ ނާއިބުގެ ލަފާއާއެކު ބިލު މަޖިލީހަށް ފޮނުއްވި ސަބަބު ހާމަކުރައްވައި ރައީސް ފޮނުއްވި ސިޓީ ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ އިއްވާފައެވެ.

އެ ސިޓީގައި ރައީސް ވިދާޅުވީ، ބިލުގެ 7 ވަނަ މާއްދާގެ ށ ގައި ގުނަވަން ހަދިޔާ ކުރާ މީހާގެ ޝަރުތުތަކުގެ ތެރޭގައި، "ދައުލަތުގެ ބެލުމުގެ ދަށުގައި ހުރި މީހެއްކަމުގައި ނުވުން" އަދި "ކުށުގެ ތުހުމަތުގައި ނުވަތަ ޝަރުއީ ހުކުމެއް ތަންފީޒުކުރަމުންދާ މީހެއް ކަމުގައި ނުވުން" އެ ދެ ޝަރުތު އުނިކޮށްފައިވާ ކަމަށެވެ.

ރައީސް ވިދާޅުވިގޮތުގައި ސަރުކާރުން އެ ބިލު ހުށަހެޅިއިރު އެ ދެ ޝަރުތު ވާނީ ހިމަނާފައެވެ. އަދި އެ ޝަރުތު ހިމެނުއްވީ ގައިދީންނާއި ބަންދުގައި ތިބޭ މީހުންނަކީ އެއްވެސް މަޖުބޫރުކަމެއް ނެތި، ފުރިހަމަ މިނިވަން ރުހުމެއްގެ ދަށުން ގުނަވަން ހަދިޔާކުރެވިދާނެ ބައެއް ކަމަށް ގަބޫލުނުކުރެއްވޭތީ އެވެ. ނަމަވެސް، މަޖިލީހުން ބިލު ފާސްކުރިއިރު އެ ދެ ޝަރުތު ވަނީ އުނިކޮށްފައެވެ.

ރައީސްގެ ސިޓީގައި އިތުރަށް ވިދާޅުވީ، ”ބަންދެއްގައި ތިބޭ މީހުންނަކީ އަމިއްލަ އިޚްތިޔާރާއި މިނިވަންކަން ހަނިވެ، ވަކި ޚާއްސަ ޙާލަތެއްގައި ތިބޭ ބަޔަކަށް ވާއިރު، އެމީހުންނަކީ ފުރިހަމަ ރުހުމާއެކު، އެއްވެސް ބާވަތެއްގެ މަޖުބޫރުކަމެއް ނެތި ގުނަވަން ހަދިޔާކުރުން ފަދަ ކަމަކަށް ރުހުން ދެވިދާނެ ބަޔަކަށް ބެލެވިދާނެ ކަމަށް ނުފެންނަ“ ކަމަށެވެ.

އަދި އެއްވެސް މަޖުބޫރުކަމެއް ނެތި ރުހުމުގައި ގުނަވަން ހަދިޔާކުރުން ކަށަވަރުކުރުމަކީ ޑިމޮކްރަޓިކް މުޖުތަމައުތަކުގައިވެސް ބަލައިގަންނަ ބައިނަލްއަގުވާމީ މިންގަނޑެއްކަމަށާ، ބަންދުގައި ތިބޭ މީހުން ގުނަވަން ހަދިޔާ ކުރެވޭ ގައުމުތަކުގައިވެސް އެކަން ކުރަނީ ވަރަށް ގިނަ ކަންކަން ފުރިހަމަވޭތޯ ބަލައި ކަށަވަރުކުރުމަށްފަހުގައި ކަން އެމަނިކުފާނު ފާހަގަކުރެއްވިއެވެ.

ކަންމިހެން ހުރުމުން، ބަންދުގައި ތިބޭ މީހުން ގުނަވަން ހަދިޔާ ކުރުމާގުޅޭ އިތުރު ހަރުދަނާ އުސޫލުތަކެއް ކަނޑައެޅުމެއް ނެތް ގޮތަށް އެމީހުންނަށް ގުނަވަން ހަދިޔާކުރުމުގެ ފުރުސަތު ދިނުމަކީ ގާނޫނު ތަންފީޒުކުރުމުގައި ގިނަ ގޮންޖެހުންތަކެއް ކުރިމަތިވެދާނެ ކަމެއް ކަމަށްވެސް ރައީސް ވިދާޅުވިއެވެ.

މި މާއްދާގެ އިތުރުންވެސް އިތުރު ދެ މާއްދާއަކަށް މަޖިލީހުން ގެނެސްފައިވާ ބަދަލުތަކުގެ ސަބަބުން ޤާނޫނު ތަންފީޒުކުރުމުގައި ދިމާވާނެ ދަތިތައް ފާހަގަކުރައްވައި އެކަންކަން ހައްލުކުރުމަށް ރައީސުލްޖުމްހޫރިއްޔާ ވަނީ އެދިވަޑައިގެންފައެވެ.

މިއަދުގެ ޖަލްސާގައިވަނީ، ބިލު އަލުން ބަލައިގަނެ ދިރާސާކުރުމަށް ކޮމިޓީއަށް ފޮނުވައިލުމަށް ޕީއެންސީގެ ނައިބު ރައީސް އަދި ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވާފައެވެ. ހޯރަފުށި ދާއިރާގެ ޕީއެންސީ މެންބަރު ޢަލީ މޫސާ ތާއީދުކުރެއްވި އެ ހުށަހެޅުން ބަލައިގަތީ ވޯޓުގައި ބައިވެރިވި 62 މެންބަރުންގެ އިއްތިފާގުންނެވެ.